Filipai
3 Bhiriọ, ibhio mẹn, bha wo ha sọnyẹnmhẹn bhi oga ọsi Ebeanlẹn imhan. Egbe bha lọ mẹn rẹ kie gbẹn ene emhin nan ji bha, ranmhude, mẹn guanọ nin emhin mhẹn nin bha.
2 Bha mhọn ẹwanlẹn bhi egbe ẹbho ne lu emhin bii awa; bha mhọn ẹwanlẹn bhi egbe eria ne si ikuan-egbe ji ẹbho; bha mhọn ẹwanlẹn bhi egbe ẹbho ne yọle ghe oko nọn nan rẹ ruẹ. 3 Imhan ne ga Osẹnobulua hi ene gene ruẹ. Ẹlinmhin nọn khiale, ọle dia mhan. Sẹyẹ, Jesu Kristi mhan mun udu nyan, ọ iyi ebi mhan khin, 4 arẹmiẹn mẹn bhọ mhọn emhin nọn ha sabọ re imẹn ha dẹgbọ.
A ha yọle nan ha dẹgbọ ranmhude ebi ọria khin, imẹn bhọ ha manman sabọ dẹgbọ nẹ ranmhude ebi mẹn mhọnlẹn: 5 ukpẹdẹ nọnzi elẹnlẹn wo gba, a da ruẹ mẹn; agbaẹbho ọsi Izrẹl mẹn na vae, bhi ulin-uwa ọsi Bẹnjamin; ibhokhan Hibru aba imẹn bi inẹn mẹn khin; obhokhan Farisi mẹn khin, mẹn wo mun uhi gba bhi uhọnmhọn; 6 ranmhude ọhubhudu nin mẹn ha mhọnlẹn, mẹn da ha kpokpo agbotu nọnsi Osẹnobulua; a bha miẹn eji ọ da kẹ mẹn re, mẹn wo lu rẹkhan ebi ọne uhi tale tee. 7 Ọrẹyiriọ, ene emhin nan rebhe nin mẹn rẹ mun gba bhi uhọnmhọn, kiẹn ihoho bhi ẹlo nọnsẹmhẹn* ranmhude Kristi. 8 Bhi ọsi ẹmhọanta, okpemhin nọn rẹji mẹn nin mẹn rẹ dọ lẹn Jesu Kristi nin Ebeanlẹn mhan. Ranmhude ọnan, emhin nekẹle rebhe nin mẹn mhọnlẹn kiẹn ihoho rẹji mẹn. Mẹn fikekegbe emhin rebhe yẹ ha ghe ele bi iku bi eyaya ranmhude Kristi, beji mẹn ha da sabọ lu ebe ti ọle bhọ 9 yẹ ha ribhi ibo nọnsọle. Ọ iyi ranmhude mẹn lu emhin rebhe nin uhi tale re imẹn kiẹn ọria nọn khiale. Nin mẹn rẹ mhọn urẹọbhọ da Kristi zẹle. Osẹnobulua hi ọnọn tie ọria ọnọn khiale, ranmhude urẹọbhọ nin ọne ọria mhọnlẹn. 10 Ebi mẹn guanọ, ọle hi nin mẹn rẹ lẹn Kristi, bi ahu ọsi ọnọn riọ ọle kpanọ. Mẹn muegbe nin mẹn rẹ loya beji ọle rẹ loya. Mẹn bhọ muegbe nin mẹn rẹ yu beji ọle rẹ yu, 11 beji mẹn ha da miẹn isẹhoa rẹ riọkpanọ ẹghe nan ha rẹ riọ ẹbho kpanọ bhi ọsi ọhẹnhẹn.
12 Ọne elele bha sẹ sẹ imẹn bhi obọ fo, ọ bha sẹyẹ gba nin mẹn fo. Ọkpakinọn, mẹn wo ha lu eka nin mẹn ha sabọ lu, beji a da miẹn ghe, ebezẹle nin Jesu Kristi da zẹ imẹn ki sabọ sẹ imẹn obọ. 13 Ibhio, mẹn bhọ bha riale ghe ọne ive sẹ imẹn bhi obọ fo. Ọkpakinọn, ebi mẹn lu hi: Mẹn re ọkhọle sibhi emhin nin mẹn fikekegbe re, yẹ ha khu ọbhi emhin nọn ribhi odalo mẹn. 14 Mẹn wo ha wẹnna kaka beji ọne ihaosa ha da sẹ mẹn bhi obọ. Ọne ihaosa hi nan rẹ dọ nyẹnlẹn bhi okhun. Osẹnobulua hi ọnọn ha re ọne ihaosa nin mhan rẹ na obọ Jesu Kristi. 15 Bhiriọ, ọkhẹke nin mhan rebhe ne wanre bhi oga re inian ha ghe ọne ẹmhọn nan nin mẹn taman ibha. Osẹnobulua dẹ rẹkpa bha rẹ re inian ha ghe ọne ẹmhọn nan sade uwedẹ ikẹ ibha rẹ ha ghe ọle. 16 Uwedẹ nọn hi ki rẹ khin nin mhan da sẹ lu re alo, bha ji mhan wo re obọ iriọ.
17 Ibhio, ibha rebhe dọnmhegbe rẹ ha lu rẹkhan ijiẹmhin nọnsẹmhẹn. Bha yẹ re egbe khọkhọ ẹbho ne wo ha lu rẹkhan ijiẹmhin nin mhan re nin bha. 18 Ẹbho ne bunbun ribhọ ne re egbe ele kiẹn eghian Kristi, yẹ re ẹlo gbe uyumhin nin ọle yu bhi okhun oran* an. Mẹn ka wo tẹmhọn ele man bha khẹ, ejayenan nian, eviẹ mẹn ye beji mẹn gbo ha tẹmhọn ele man bha nian. 19 Ugbekhuelo ele ha miẹn; ẹkẹ nọnsele,* ọle hi osẹ nọnsele; ele re emhin ẹkhọle nin ele lu rẹ ha dẹgbọ; emhin ọsi ọne agbọn nan ọkpa ele ria ẹmhọnlẹn. 20 Sokpan, okhun hi isẹmhan. Mhan wo khẹ ọnọn ha na bhi okhun vae dọ miẹn mhan fan, ọle hi Jesu Kristi nin Ebeanlẹn mhan. 21 Ọle dẹ fi egbe nọnsẹmhan nọn wẹghẹ denọ, yẹ re ọle kiẹn egbe nọn mhọn uyi beji ọsọle dia. Okpahu nọnsọle ọle ha rẹ lu ọnan, ọne ahu nin ọle re ha gbẹloghe emhin rebhe.