Luk

5 Ẹghe ọkpa nin Jesu rẹ ha tẹmhọn Osẹnobulua bhi egbegbe odighi ọsi Gẹnẹsarẹt,* usun ẹbho ne ha ka ọle ehọ da ha vẹ ruru ọle. 2 Ọle da daghe okọ eva nan mun diẹn bhi egbẹdẹ. Ọkpakinọn, ene gbe ehẹn sibhi ẹkẹ ọle re. Ele dọ ha kpe ọgan nọnsele. 3 Ọle da dọ nabhi ọkpa bhi ene okọ, yẹ taman Saimọn nọn nyan ọne okọ nọn guale sibhi egbẹdẹ re khere. Ọle da dotua bhi ẹkẹ ọne okọ yẹ na bhi enin ha man ene usun ẹbho emhin. 4 Ọle ki talọ fo, ọle da taman Saimọn yọle: “Gua ọne okọ diọbhi eje dinmhin, uwẹ ha yẹ fi ọgan nọnsẹ ọbhi ẹkẹ ẹdẹ.” 5 Ọkpakinọn, Saimọn da taman ọlẹn yọle: “Ọman-emhin, asọn rebhe imhan rẹ guanọ ehẹn, imhan bha gbe ehẹn soso. Ọkpakinọn, ranmhude uwẹ tale, imẹn dẹ fi ọgan nọnsẹmhẹn bhọ.” 6 Ele ki lu ọnan, ele da manman muno ehẹn ne bunbun, rẹ sẹbhọ ghe ọgan nọnsele bhọ da ha sọnọ a. 7 Bhiriọ, ele da re obọ tie ene ele ko gbe ehẹn ne ribhi okọ nọnkẹle nin ele vae dọ rẹkpa ele. Ele da vae yẹ re ehẹn vuọn okọ nin ele mun re, rẹ sẹbhọ ghe ene okọ veva da ha ruẹ. 8 Saimọn Pita ki daghe ọnan, ọle da diguẹ bhi odalo Jesu, yẹ yọle: “Sibhi eji mẹn ye re, Ebeanlẹn imẹn, ranmhude ọ bha gba nin imẹn.” 9 Ekutu ehẹn nin ele mun da wo re egbe lọ Saimọn bi ibo ọle. 10 Egbe da yẹ lọ Jemis bi Jọni nin imọn Zẹbẹdi ne deba Saimọn gbe ehẹn. Ọkpakinọn, Jesu da taman Saimọn yọle: “Hẹi yẹ ji ofẹn mun uwẹ. Rẹ na bhi ọne ẹghe nan rẹ ha khian, uwẹ dẹ ha muno eria beji a rẹ muno ehẹn.” 11 Ele ki da gua ene okọ vae bhi egbẹdẹ. Ele da zẹ emhin rebhe obọ yẹ rẹkhan ọlẹn.

12 Bhi ẹghe ọbhebhe nin ọle rẹ sẹbhi agbaẹbho ọkpa, ghọle! okpea nin emianmhẹn egbekẹn manman le ọle egbe a da ha ribhi enin. Ọle ki daghe Jesu, ọle da de si ẹlo ru, yẹ ha bhii ọle yọle: “Ebeanlẹn imẹn, imẹn lẹnmhin ghe uwẹ dẹ sabọ re egbe daan mẹn sade ọ yẹẹ uwẹ.” 13 Jesu da ki niẹn obọ a rẹ so ọle, yẹ yọle: “Ọ yẹẹ mẹn! Ji egbe daan ẹn.” Ọne emianmhẹn egbekẹn da wo re osukpa si ọne okpea bhi egbe re. 14 Jesu da taman ọne okpea nin ọle hẹi taman ọria soso ebe sunu. Ọle da yẹ yọle: “Ha khian dọ re egbe ẹ man ọne ohẹn, uwẹ ha yẹ lu ọne izọese nin Mozis yọle nan ha lu, nin uwẹ rẹ kpe egbe ẹ khia, beji ọ ha da ha yi ọsali rẹji ele.” 15 Ọkpakinọn, a da wo yẹ ha wewe ẹmhọn ọlẹn na bhi ijerebhe. Usun ẹbho ne bunbun da ha bu ọle re nin ele dọ ka ọle ehọ bi nin ọle yẹ re egbe daan ele. 16 Ọrẹyiriọ, ẹghe-ẹghe ọle rẹ dọ ha nan erọnmhọn bhi eje fi ahiẹ a.

17 Ẹdẹ ọkpa beji ọle ha man emhin, ibhokhan Farisi bi ene man uhi, ne na bhi idunmhun kẹkẹ ne ribhi Galili, Judia bi Jerusalẹm vae da ha ribhi enin. Sẹyẹ, Jehova* da re ahu nanlẹn rẹ ha re egbe daan ẹbho. 18 Ghọle! ikpea eso da re ewa mun akhun ọkpa re. Ele da ha guanọ nin ele mun ọlẹn bu Jesu bhi ẹkẹ uwa. 19 Ele ki miẹn ghe, ele bha miẹn eji ele mun ọlẹn na ranmhude ẹbho ne vuọn ijerebhe, ele da hẹn okhun ọne uwa, yẹ banọn ebi a rẹ khan ọlẹn sibhọre. Ele da na bhi enin re ọne ewa rẹ dada ọle mun sotọ bhi odalo Jesu. 20 Ọle ki daghe urẹọbhọ nin ele rẹman, ọle da yọle: “Okpea, a gbe olukhọ nesẹ kua.” 21 Ibhokhan Farisi bi ene man uhi da munhẹn ha zilo bhi ẹwẹ ele yọle: “Họ bhọ kuẹ khọnan nọn wo ha re unun ji Osẹnobulua? Họla ha sabọ rẹhunmhan olukhọ, gbera Osẹnobulua?” 22 Ọkpakinọn, ranmhude Jesu lẹn ebi ele ria bhi ọkhọle, ọle da nọọn ele yọle: “Bezẹle nin ibha da ria emhin ne sẹ iriọ bhi ọkhọle? 23 Ọnela lẹkhẹ nẹ, nan rẹ yọle, ‘A gbe olukhọ nọnsẹ kua,’ la nan rẹ yọle, ‘Kpanọ mundia, uwẹ ha yẹ ha khian’? 24 Ọkpakinọn, beji bha ha da lẹn ghe Ọmọn nọnsi okpea mhọn ọne ahu nin ọle rẹ rẹhunmhan olukhọ bhi ọne otọ nan . . .” ọle da taman ọne akhun yọle: “Imẹn taman ẹn, Kpanọ mundia, re ewa nọnsẹ, uwẹ a ha khian uwa.” 25 Bhiriọ, ọne okpea da kpanọ mundia bhi isira ele, re ewa nọnsọle yẹ ha khian uwa. Ọle da ha gẹn Osẹnobulua. 26 Ọnan da wo han ẹbho rebhe ilo. Ele da munhẹn ha re ogẹn ji Osẹnobulua. Oriri da gbe kuọ ele. Ele da ha yọle: “Imhan miẹn emhin ọhan-ilo ẹlẹnan!”

27 Jesu da ki sibhi enin re. Ọle da miẹn okpea ọkpa nọn koko igho uhọnmhọn, natiọle Livai. Ọne okpea da dotua bhi ọfisi nan da koko igho uhọnmhọn. Ọle da taman ọlẹn yọle: “Dọ kiẹn odibo nọnsẹmhẹn.” 28 Ọne okpea da zẹ emhin rebhe obọ yẹ kpanọ mundia rẹkhan ọlẹn. 29 Livai da lu iluemhin nin Jesu bhi uwa nọnsọle. Ẹbho ne bunbun ne koko igho uhọnmhọn bi ẹbho ebhebhe da vae dọ deba ele ha le ebale.* 30 Ibhokhan Farisi bi ene man emhin bhi usun ọsi ene Farisi ki daghe ọnan, ele da ha ne edibo nesi Jesu gui, yẹ yọle: “Bezẹle nin ibha da deba ene koko igho uhọnmhọn bi eria olukhọ ha da, yẹ le?” 31 Jesu da wanniẹn ele yọle: “Eria nin egbe bha daan, ele guanọ dọkitọ, ọ iyi ene egbe daanlẹn. 32 Eria olukhọ imẹn vae dọ tie ne fidenọ, ọ iyi ene khiale.”

33 Ele da taman ọlẹn yọle: “Ẹghe rebhe edibo nesi Jọni rẹ fi azinmin, yẹ nan erọnmhọn. Iriọ edibo nesi ibhokhan Farisi yẹ lu. Ọkpakinọn, edibo nesẹ wo da yẹ le.” 34 Jesu da taman ele yọle: “Ibha ida sabọ yọle nin imọẹ ọsi ọne okpea nọn ho nọn re okhuo ha fi azinmin bhi ẹghe nin ọne okpea sẹyẹ rẹ ribhi ẹwẹ ele. 35 Ọkpakinọn, ẹghe vade nan ha rẹ re ọne okpea nọn ho nọn re okhuo sibhi ẹwẹ ele re. Ẹghenin, ele ki fi azinmin.”

36 Ọle da yẹ noo arẹkhọkhọ. Ọle da taman ele yọle: “Ọria soso iribhọ nọn ha re ukpọn ọsọgbọn rẹ gban ukpọn nọn ki dọmanlẹn. Ọle ha lu iriọ, ọne ukpọn ọsọgbọn ki sọ sibhọre. Ọne ukpọn ọsọgbọn bi ọne ukpọn nọn dọmanlẹn iyi abọkpa. 37 Sẹyẹ, ọria iribhọ nọn ha sa anyọn ọsọgbọn ọbhi ẹkpa anyọn nọn ki dọmanlẹn. Ọle ha lu iriọ, ọne anyọn ọsọgbọn ki vẹ ọne ẹkpa anyọn an. Sẹyẹ, ọne anyọn ki tuekua. Ọne ẹkpa anyọn ki yẹ riia. 38 Ẹkpa anyọn ọsọgbọn, ọle a sa anyọn ọsọgbọn i. 39 Ọria soso iribhọ nọn ha da anyọn nọn bue bhi otọ nọn ha yẹ ha guanọ anyọn ọsọgbọn, ranmhude, ọle dẹ yọle, ‘Ọne anyọn nọn bue bhi otọ wo mhẹn.’”