Luk

11 Ẹghe ọkpa, Jesu da ha nan erọnmhọn. Ọle ki nan erọnmhọn fo, ọkpa bhi edibo nesọle da taman ọlẹn yọle: “Ebeanlẹn mhan, man mhan ebi a rẹ nan erọnmhọn yẹ beji Jọni yẹ rẹ man edibo nesọle ebi a rẹ nan erọnmhọn yẹ.”

2 Ọle da taman ele yọle: “Ẹghe nọn hi ki rẹ khin nin ibha rẹ ha nan erọnmhọn, bha yọle: ‘Aba, ji ẹbho rebhe kpe elin nọnsẹ khia.* Ji Agbejele nọnsẹ vae. 3 Re ebale nọn ha sẹ imhan le nin imhan ẹlẹnan. 4 Gbe olukhọ nọnsẹmhan kua nin imhan, beji imhan yẹ rẹ gbekua nin ẹbho ne lu imhan khọlọ.* Hẹi ji imhan de ọbhi edọnmhẹn.’”

5 Ọle da taman ele yọle: “Ji a man yọle ọkpa bhi ẹwẹ ibha bu ọmọẹ ọle bhi ọsasọn ogiziẹn yẹ taman ọlẹn yọle, ‘Ọmọẹ, ne ibrẹd ea nin imẹn. 6 Ọmọẹ imẹn ọkpa nọn na okhian vade wo la sẹbhi isẹmhẹn, imẹn bha miẹn ebale re nanlẹn.’ 7 Ọkpakinọn, ọne ọmọẹ ọle da na ẹkẹ uwa wanniẹn ọlẹn yọle: ‘Hẹi yẹ kpokpo imẹn. Mẹn khue odẹ fo, mẹn bi ene ibhokhan bhọ nowẹ fo. Mẹn ida sabọ kpanọ dọ re emhin soso nin uwẹ.’ 8 Imẹn taman ibha ghe, aharẹmiẹn ọle bha kpanọ dọ re emhin soso nanlẹn ranmhude imọẹ ele khin, ọle dẹ kpanọ dọ re emhin nọn hi ki rẹ ha khin nanlẹn ranmhude uwedẹ nin ọle rẹ situa ha bhii. 9 Bhiriọ, imẹn taman ibha yọle, ibha wo ha bhii, a ki re nin ibha; ibha wo ha guanọ, ibha ki miẹn; ibha ha sobọ bhi odẹ, a ki tuje ọle a nin ibha. 10 Ranmhude, a dẹ re nin ọrebhe ne wo ha bhii, sẹyẹ, ọrebhe ne guanọ emhin dẹ miẹn ebi ele guanọ. A dẹ yẹ tuje odẹ a nin ọrebhe ne wo ha sobọ bhi odẹ. 11 Họla bhi ẹwẹ ibha ha mun ẹnyẹn nin ọmọn nọnsọle sade ọne ọmọn bhii ọle ehẹn? 12 La nọn ha mun akpin nanlẹn sade ọ bhii ọle ẹkẹn-ọkhọ? 13 Bhiriọ, ahamiẹn ghe ibha nin eria ebe lẹn ebi a rẹ re emhin esili nin imọn nesẹbha yẹ, eka-eka ki hi Aba ibha nọn ribhi okhun? Ọle dẹ wo re ẹlinmhin nọn khiale nin ene bhii ọle!”

14 Ọkizẹbue, ọle da khu ẹlinmhin-ebe nọn re okpea ọkpa kiẹn odin fia. Ọne ẹlinmhin-ebe ki dagbare fo, ọne okpea da munhẹn ha talọ. Ọnan da wo han ene ẹbho ilo. 15 Ọkpakinọn, eso bhi ẹwẹ ele da ha yọle: “Ahu ọsi Biẹzibọb* nin ojie ọsi ene ẹlinmhin-ebe ọle rẹ ha khu ene ẹlinmhin-ebe fia.” 16 Beji ele ha da dọnmhẹn ọlẹn, ẹbho eso da yọle nin ọle na bhi okhun re iyaman man ele. 17 Ranmhude ọle lẹn ebi ele ria bhi ọkhọle, ọle da taman ele yọle: “Agbaẹbho nọn hi ki rẹ khin nọn imhọn okugbe, dẹ miẹn ugbekhuelo, sẹyẹ, azagba-uwa nọn ki rẹ khin nọn bha kugbe dẹ de sotọ. 18 Iriọ sẹyẹ nọn. Ahamiẹn ghe Esu ki ne egbe ọle suan, be ejele nọnsọle ha ki rẹ mundia yẹ? Ibha yọle ghe ahu ọsi Biẹzibọb imẹn rẹ khu ẹlinmhin-ebe fia. 19 Ahamiẹn ghe ahu ọsi Biẹzibọb imẹn rẹ khu ẹlinmhin-ebe dagbare, ahu ọsi ọria nela imọn nesẹbha rẹ khu ẹlinmhin-ebe dagbare? Ọnan zẹle nin ele ha da bhuohiẹn gbe ibha. 20 Ọkpakinọn, ahamiẹn ghe ahu nọnsi Osẹnobulua imẹn rẹ khu ẹlinmhin-ebe si ẹbho bhi egbe re, ọ rẹman ghe, Agbejele nọnsi Osẹnobulua gene ba bha ku. 21 Ahamiẹn okpea nọn wolo, nọn ne emhin okhọn mhọnlẹn tobọle gbega uwa nọnsọle, emhin soso ida sunu ji emhin nesọle. 22 Ọkpakinọn, ọria nọn wo nẹ ọlẹn ha vae dọ khọn ọlẹn miotọ, ọne ọria ki miẹn ọlẹn ene emhin okhọn nin ọle rẹ re udu tẹ, yẹ gha emhin nesọle nin ẹbho. 23 Ọnọn hi ki rẹ khin nọn iribhi ibo nọnsẹmhẹn, oghian imẹn ọle khin. Ọnọn bha deba imẹn si ẹbho koko, uvẹkua ọle vẹ ele kua.

24 “Ahamiẹn ẹlinmhin-ebe sibhi egbe ọsi ọria re, ọne ẹlinmhin-ebe ki ha na ugbẹnẹbubu khian dọ ha guanọ eji ọle ha dia. Ahamiẹn ọle bha miẹn eji ọle ha dia, ọle ki yọle, ‘Imẹn dẹ fikie ha khian uwa nin imẹn da ka kpanọ.’ 25 Ọle ha ki sẹbhi enin, ọle ki kere ghe a gbọnọ ọne uwa a yẹ hẹnhẹn ọlẹn. 26 Ẹghenin, ọle ki kpanọ dọ ne ẹlinmhin-ebe ihinlọn ne kaka nẹ ọle rẹkhan egbe. Ele ha ki nabhi ẹkẹ ọne uwa, ele ki ha nyẹnlẹn bhi enin. Idia nin ọne ọria ki da ha ye, ọle ha ki khọ gbera ọne ọle ka rẹ ha ye.”

27 Beji ọle ha ta ene ọta nan, okhuo ọkpa bhi ẹkẹ ene usun ẹbho da so dagbare taman ọlẹn yọle: “Eghọnghọn hi ọsi ọne ẹkẹ nọn hanmhan uwẹ, bi ọne inyẹn nin uwẹ nyẹnlẹn!” 28 Ọkpakinọn ọle da yọle: “Heye, eghọnghọn hi ọsi ẹbho ne họn ọta nọnsi Osẹnobulua, yẹ re ọle lu!”

29 Ẹghe nin ene usun ẹbho ki rẹ ha sikoko, ọle da munhẹn ha taman ele yọle: “Ore nọn imhẹn, ọle ọne ore nan khin; ele wo ha guanọ nan lu emhin ọhan-ilo man ele. Ọkpakinọn, a ida lu emhin ọhan-ilo ọbhebhe man ele gbera ọnọn sunu ji Jona. 30 Beji Jona rẹ ha yi iyaman rẹji ibhokhan Nenivẹ, iriọ Ọmọn nọnsi okpea da rẹ ha yi iyaman rẹji ọne ore nan. 31 Ọne esọn* nọn na obọ ọsi Saot* vae dẹ riọkpanọ bhi ukpẹdẹ ibhuohiẹn, yẹ bhuohiẹn gbe ọne ore nan, ranmhude, eje ree nẹ bhi ọne otọ nan ọle na vae dọ kaehọ ọta ẹwanlẹn ọsi Solomọn. Sokpan, ghọle! ebe gbera Solomọn bhọ ribhi enan. 32 Ibhokhan Nenivẹ dẹ riọkpanọ bhi ukpẹdẹ ibhuohiẹn, yẹ bhuohiẹn gbe ọne ore nan, ranmhude, ẹghe nin Jona rẹ tẹmhọn Osẹnobulua man ele, ele da fidenọ. Sokpan, ghọle! ebe gbera Jona bhọ ribhi enan. 33 Ọria ha mun orukpa ru, ọle ida mun ọlẹn nẹko la re okhuale gue ọle. Sokpan, ọle ki mun ọlẹn ọbhi eji a mun orukpa ọi, beji ọrebhe ne nabhi ọne uwa ha da sabọ ha daghe ẹfua. 34 Ẹlo hi ukpa ọsi egbe. Ahamiẹn uwẹ mun ẹlo ọbhi emhin ọkpa, egbe nọnsẹ rebhe ki ha bhala. Sokpan, ahamiẹn uwẹ mhọn ẹlobhiamhin,* egbe nọnsẹ rebhe ki so ebiuki a. 35 Bha mhọn ẹwanlẹn, nan hẹi dọ miẹn ghe ebiuki, ọle ẹfua nọn ri bha bhi egbe khin. 36 Ahamiẹn ghe egbe nọnsẹ rebhe bhala, ghe ije soso bha so ebiuki a bhọ, egbe nọnsẹ ki ha bhala beji orukpa rẹ bhala.”

37 Ọle ki ta ọnan fo, obhokhan Farisi ọkpa da tie ọle nin ọle vae dọ deba ọle le ebale. Bhiriọ, ọle da nabhi uwa ọsi ọne obhokhan Farisi, yẹ dotua ha le ebale. 38 Ọkpakinọn, ọ da wo han ọne obhokhan Farisi ilo ghe ọle bha ka kpe obọ fo* ọle kuẹ munhẹn ha le ebale. 39 Jesu da taman ọlẹn yọle: “Ibha nin ibhokhan Farisi, ibha kpe ikeke ukpu bi ikeke ekpan an, ọkpakinọn, ẹlobhiamhin bi emhin-ebe vuọn ẹkẹ ọkhọle nọnsẹbha. 40 Ibha ne imhọn ẹwanlẹn, ọ ibe yi ọnọn man ọkhọle yẹ man ukinegbe? 41 Bha re ọkhọle nọn mhẹn rẹ lu ẹsele nin ene ibhioguele. Ẹghenin, emhin rebhe ne rẹtẹ ibha ki khia. 42 Ọkhọbhegbe hi ọsẹbha ibhokhan Farisi, ranmhude, bha zẹ ọkpa bhi igbe bhi ẹfọ natiọle minti bi ru bi ẹfọ nekẹle, ọkpakinọn, bha re ẹlo gbe ibhuohiẹn nọn gbale bi oyẹẹ nọnsi Osẹnobulua a! Ẹmhọanta nọn ghe ọkhẹke nin bha ha zẹ ọkpa bhi igbe, ọrẹyiriọ, ọ bha khẹke nin bha re ẹlo gbe emhin nekẹle a. 43 Ọkhọbhegbe hi ọsẹbha ibhokhan Farisi, ranmhude, ọ yẹẹ bha nin ibha rẹ ha dotua bhi aga ne mhẹn nẹ* bhi sinagọg, bi nin ẹbho rẹ ha tuẹ ibha bhi ẹki! 44 Ọkhọbhegbe hi ọsẹbha, ranmhude, inian ibha diabe idin nan bha re iyaman i. Ẹbho ha rẹ khian na bhi uke ọle, ele ida lẹn!”

45 Okpea ọkpa nọn manman lẹn Uhi da taman ọlẹn yọle: “Ọman-emhin, imhan uwẹ yẹ re iriọ re unun je beji uwẹ rẹ ta ene ọta nan.” 46 Jesu da ki yọle: “Ọkhọbhegbe yẹ hi ọsẹbha, ibha ne lẹn uhi. Ranmhude, bha khun udede ihẹ mun nin ẹbho, ọkpakinọn ibha tobọbha bha muegbe nin ibha rẹ re ikpẹn-obọ so ọne ihẹ!

47 “Ọkhọbhegbe hi ọsẹbha, ranmhude, ibha bọn idin ọsi ene akhasẹ okhun, nin aba ibha nin ẹdẹlẹ gbono a! 48 Bhi ọsi ẹmhọanta, ibha daghe emhin nin aba ibha nin ẹdẹlẹ lu, ibha da sẹyẹ re obọ bhọ. Ele hi ene gbono ene akhasẹ a, ọkpakinọn ibha hi ene dọ ha bọnọ idin ọsi ene akhasẹ. 49 Ranmhude ọnan, Osẹnobulua nọn wanlan da yọle: ‘Imẹn dẹ je akhasẹ bi odibo ji ele. Ele dẹ gbono eso a, yẹ kpokpo eso bhọ, 50 beji a ha da miẹn ghe, aranlẹn ọsi ene akhasẹ rebhe nan jiẹn kua rẹ na bhi umunhẹn ọsi ọne agbọn nan ha vade, a ki nọọn ọlẹn bhi obọ ọsi ọne ore nan. 51 Rẹ na bhi aranlẹn ọsi Ebẹ rẹ dọ sẹbhi aranlẹn ọsi Zẹkaraya nan gbe a bhi egbegbe ukhuo-izọese nọn ribhi uwa oga.’ Ehe, imẹn taman ibha ghe, a dẹ nọọn ọlẹn bhi obọ ọne ore nan.

52 “Ọkhọbhegbe hi ọsẹbha, ibha ne lẹn Uhi, ranmhude, ibha re isanhan ọsi ilẹnmhin kpanọ. Ibha tobọbha bha nabhọ. Ibha bha yẹ ji ene ho ne nabhọ da nabhọ!”

53 Ẹghe nin ọle ki rẹ sibhi enin re, ibhokhan Farisi bi ene man uhi da hẹ rẹkhan ọlẹn. Ele da ha nọọn ọlẹn ọta ne bunbun. 54 Ele da ha khẹ nin ọle ta ọta nin ele ha rẹ mun ọlẹn.