Luk

13 Ẹbho eso ne ha ribhi enin bhi ọne ẹghe nin, da taman Jesu ẹmhọn ibhokhan Galili nin Pailet gbono a bhi eji ele da ha zọese. 2 Ọle da taman ele yọle: “Ibha be riale ghe ranmhude ene ibhokhan Galili nin khọ gbera ibhokhan Galili nekẹle ọle zẹle nin ele da miẹn ene emhin nan bhi egbe? 3 Heye, imẹn taman ibha; ahamiẹn ibha tobọbha bha fidenọ, a dẹ yẹ fuẹn ibha a. 4 La ibha be riale ghe olukhọ ọsi ene itue igbe-elẹnlẹn ne yuno bhi Siloam, ẹghe nin uwa igedege rẹ siẹn nyan ele, ọle khọ gbera olukhọ ọsi eria nekẹle ne nyẹnlẹn bhi Jerusalẹm? 5 Heye, imẹn taman ibha; ahamiẹn ibha tobọbha bha fidenọ, ibha dẹ yẹ yuno beji ele rẹ yu.”

6 Ọle da ki noo arẹkhọkhọ ọkpa. Ọle da taman ele yọle: “Okpea ọkpa da ha mhọn eran fig bhi ugbo nin ọle da kọ ikperan natiọle ivain. Ọle da ha vae dọ ha fẹghe si ọ mọn ikpẹ, ọkpakinọn, ọle bha miẹn ikpẹ bhọ. 7 Ọle da ki taman ọne ọria nọn gbẹloghe ọne ugbo ivain yọle, ‘Ikpe ea ki nọn nian nin imẹn mọn da guanọ ikpẹ bhi ọne eran fig nan, ọ bha mọn ikpẹ soso. Hian ọlẹn fia! Bezẹle nọn ha da gheghe ha ribhi otọ bhi enin?’ 8 Ọnọn gbẹloghe ọne ugbo da taman ọlẹn yọle, ‘Ebeanlẹn imẹn, sẹyẹ re ukpe ọkpa nanlẹn. Imẹn dẹ tọ uhio nẹga ọle, yẹ zẹ isọn elanmhẹn ọbhọ. 9 Ọ ha mọn ikpẹ, ọ mhẹn; a ha ki miẹn ọ bha mọn ikpẹ, a ki hian ọlẹn fia.’”

10 Jesu da ha man emhin bhi sinagọg ọkpa bhi ukpẹdẹ Sabati. 11 Ghọle! okhuo ọkpa da ha ribhi enin, nọn mhọn ẹlinmhin-ebe bhi egbe nọn re ọle ha khọnmhọn rẹ na bhi ikpe igbe-elẹnlẹn. Ọle da manman kuẹnre. Ọle bha sabọ ha niẹn egbe a hiehie. 12 Jesu ki daghe ọne okhuo, ọle da taman ọlẹn yọle: “Okhuo, imẹn re egbe daan ẹn bhi emianmhẹn nin uwẹ a khọnmhọn.” 13 Ọle da ne obọ nyan ọlẹn. Ọne okhuo da wo re osukpa niẹn egbe a, yẹ munhẹn ha re ogẹn ji Osẹnobulua. 14 Ọkpakinọn, ẹkẹ da wo ha khọ ọnọn gbẹloghe ọne sinagọg, ranmhude, ukpẹdẹ Sabati Jesu rẹ re egbe daan ọne okhuo. Bhiriọ, ọle da taman ene ẹbho yọle: “Ikpẹdẹ ehan bhi uzana ọle a rẹ miẹnsọn. Ene ikpẹdẹ nin ibha ha rẹ ha vae, nan rẹ re egbe daan ibha, ọ iyi ukpẹdẹ Sabati.” 15 Ọkpakinọn, Jesu da wanniẹn ọlẹn yọle: “Ibha ne re ikpunun ga, ibha ibe taan ẹmena la kẹtẹkẹtẹ* nesẹbha sibhi uri re bhi ukpẹdẹ Sabati, yẹ re ọle ha khian eji ọ ha da wọn amẹn? 16 Ọmọn nọnsi Ebraham nin Esu mun gba bhi ikpe igbe-elẹnlẹn ọle ọne okhuo nan khin. Ọ bha be khẹke nan rẹ miẹn ọlẹn fan bhi ukpẹdẹ Sabati?” 17 Ọle ki ta ene ẹmhọn nan, ẹkhọle da wo mun ene ha nanlẹn suan. Bhi obọ nọnkẹle, ene usun ẹbho da wo ha ghọnghọn ọbhi emhin ọhan-ilo nin ọle lu.

18 Ọle da munhẹn ha yọle: “Be Agbejele nọnsi Osẹnobulua dia yẹ? Be imẹn ha rẹ sabọ khọkhọ ọle? 19 Inian ọ diabe ikpẹ mọstad nin okpea ọkpa dọ re kọ bhi ugbo nọnsọle. Ọne ikpẹ ki wanre, ọ da kiẹn okperan. Afianmhẹn ne tin bhi okhun da vae dọ ha nyẹnlẹn bhi ikpabọ nesọle.”

20 Ọle da gbo yọle: “Be imẹn ha sabọ rẹ khọkhọ Agbejele nọnsi Osẹnobulua? 21 Inian ọ diabe yisti nin okhuo fuẹn ba ebi a rẹ lu ibrẹd* nọn vuọn udede itasa* ea. Ọne ebi ọle fuẹn rebhe da huẹ.”

22 Ọle da ha na bhi agbaẹbho rẹ sẹbhi agbaẹbho, bi idunmhun rẹ sẹbhi idunmhun. Ọle da ha man ẹbho emhin khian beji ọle rẹ khian Jerusalẹm. 23 Ejayenan nian, okpea ọkpa da nọọn ọlẹn yọle: “Ebeanlẹn imẹn, ikpeta ẹbho ọkpa ha be miuhọnmhọn?” Ọle da taman ele yọle: 24 “Ibha manman dọnmhegbe kaka nin ibha rẹ na bhi ọne odẹ nọn dia khuẹnlẹn gbera. Ranmhude, imẹn taman ibha ghe, ẹbho ne bunbun dẹ ha guanọ nin ele rẹkhan ọne odẹ nabhi uwa, ọkpakinọn, ọ ida fo ele. 25 Ọnọn nyan uwa ha kpanọ mundia dọ khue odẹ fo, ibha ki mundia bhi ole ha sobọ bhi odẹ. Ibha ki ha yọle, ‘Ebeanlẹn imhan, tuje odẹ a nin imhan.’ Ọkpakinọn, ọle ki wanniẹn ibha yọle: ‘Imẹn bha lẹn ibha.’ 26 Ẹghenin, ibha ki munhẹn ha yọle, ‘Isira uwẹ imhan rẹ ha le ebale yẹ da anyọn. Uwẹ da yẹ ha man emhin bhi ughe nọnsẹmhan.’ 27 Ọkpakinọn, ọle ki taman ibha yọle, ‘Mẹn bha lẹn bha. Bha sibhi eji imẹn ye re, ibha nin eria ebe!’ 28 Bhi enin, ọle ibha ha da ha viẹ, yẹ re akọn gbe akọn ẹghe nin ibha ha rẹ daghe Ebraham, Aiziki, Jekọp bi ene akhasẹ rebhe bhi Agbejele nọnsi Osẹnobulua, ọkpakinọn a zẹ ibha obọ bhi ole. 29 Rẹ deba ọnin, ẹbho ki na bhi obọ ọsi isti,* wẹst,* nọt,* bi saot* vae yẹ dotua nẹga itebu ha le ebale bhi Agbejele nọnsi Osẹnobulua. 30 Ghọle! Ẹbho eso ne rẹ kike dẹ ke odalo, sẹyẹ, ẹbho eso ne rẹ ke odalo, dẹ ke ikeke.”

31 Bhi ọne ẹghe nin tee, ibhokhan Farisi eso da vae dọ taman ọlẹn yọle: “Kpanọ sibhi enan re, Hẹrọd ho nọn gbe ẹ a.” 32 Ọle da taman ele yọle: “Bha ha khian dọ taman ọne alabe* nin ghe, ẹlẹnan bi ewiẹ, imẹn dẹ ha khu ẹlinmhin-ebe si ẹbho bhi egbe re, yẹ re egbe daan ele. Ukpẹdẹ nọnzi ea imẹn ha lu fo. 33 Ebe hi ki rẹ de, imẹn dẹ sẹyẹ ha lu iwẹnna nọnsẹmhẹn ẹlẹnan, akhọ, bi iriakhọ, ranmhude, a ida sabọ gbe akhasẹ a bhi agbaẹbho ọbhebhe gbera Jerusalẹm. 34 Jerusalẹm, Jerusalẹm, ibha gbono ene akhasẹ a. Ẹbho nan je bu bha, ibha re udo-udo gbono ele a. Igba ne bunbun, imẹn da rẹ ha guanọ nin imẹn koko ibha kugbe beji ọkhọkhọ rẹ re igẹn koko imọn nesọle! Ọkpakinọn, ibha bha ka. 35 Ghọle! A zẹ uwa nọnsẹbha obọ nin ibha. Imẹn taman ibha ghe, ibha iyẹ da kie miẹn imẹn, rẹ na bhi ọne ẹghe nan rẹ sẹbhi ẹghe nin ibha ha rẹ yọle: ‘Erọnmhọn hi ọsi ọne ọria nọn re elin nọnsi Jehova* vae!’”