Ẹmhọanta nọn ribhi baibo fi iẹnlẹn ọsi eria denọ

BEZẸLE nin okpea ọkpa da fikiere otuẹ nin ọle ka rẹ ha yo bhi ẹghe nin ọle rẹ ha ribhi obhokhan? Be usẹn okpea rẹ dọ sabọ ha ghe Jehova bii aba ọle yẹ? Tie okha ọsi ene ẹbho nan rẹ lẹn ebi ele tayẹ.

“Ọ da khẹke nin mẹn fikie bu Jehova.”—ELIE KHALIL

UKPE NAN BIẸ ỌLE: 1976

AGBAẸBHO NỌN NA VAE: CYPRUS

OKHA NỌNSỌLE: ỌMỌN NỌN FUẸN UKU

EBI IẸNLẸN NỌNSẸMHẸN KA DIAYẸ: Agbaẹbho ọsi Cyprus a da biẹ mẹn, ọkpakinọn, Australia mẹn da wanre. Esali Jehova ene biẹ mẹn khin, sẹyẹ ele wo dọnmhegbe rẹ rẹkpa mẹn beji mẹn ha da hoẹmhọn Jehova bi ọta nọnsọle nin Baibo. Ọkuẹsẹ mẹn sẹbhi ikpe uje, mẹn da munhẹn dọ ha mhọn akan-ehọ. Ọsasọn, mẹn ki do sibhi uwa re dọ deba usẹn bii mẹn ha mun obọ. Mhan ki do imoto mun yẹ si ẹmhọn ne bunbun ji egbe mhan.

Bhi ẹghe nin mẹn rẹ la munhẹn, mẹn da wo do ha lu ene emhin nan, ranmhude mẹn bha ho nin ene biẹ mẹn ha khọẹkẹ. Akizẹbue, mẹn bha yẹ ha mun ofẹn ele. Mẹn da dọ deba ẹbho ne wanre nẹ mẹn ha mun obọ, ele bha hoẹmhọn Jehova, uwedẹ nin ele rẹ wo ha lu emhin da wo rẹso mẹn. Akizẹbue, mẹn da taman ene biẹ mẹn ghe, mẹn bha yẹ ho nin mẹn ha yi ọkpa bhi Esali Jehova. Ele da wo ha dọnmhegbe nin ele rẹ rẹkpa mẹn, ọkpakinọn mẹn bha ka miẹn ọne urẹkpa ọbhi egbe. Ọnan da wo manman ba ene biẹ mẹn bhi egbe.

Mẹn ki sibhi uwa re, mẹn da munhẹn dọ ha noo ikhunmhun ebe kẹkẹ, yẹ manman ha khiẹn itaba-ẹlinmhin. Mẹn da wo ha nyẹn iẹnlẹn esankan yẹ noo ẹghe nọn taanlẹn bhi isi-ikhiẹn ọsasọn. Mẹn da yẹ wo kẹ ha re ohu. Ọria ha ta ọta la lu emhin nọn bha yẹ mẹn, ẹkẹ ki wo manman ha khọ mẹn, mẹn ki wo ha vanhiẹn mun ẹbho yẹ gbe ele. Bhi ọsi ẹmhọanta, emhin rebhe nan man mẹn le bhi Baibo ghe nin mẹn hẹi lu, ọle mẹn ki wo ha lu.

EBI BAIBO RẸ FI IẸNLẸN NỌNSẸMHẸN DENỌ YẸ: Mẹn da deba ọria ọkpa nọn noo ikhunmhun nọn imhẹn mun obọ, nin aba ọle yu bhi ẹghe nin ọle rẹ ha ribhi obhokhan. Mẹn bi ọle ki wo talọ sẹbhi ọsasọn. Bhi ene asọn eso, ọle ki wo ha taman mẹn ebi ẹlo aba ọle rẹ nyan ọle yẹ. Beji a miẹn mẹn ka luẹ ghe ẹbho ne yu dẹ riọkpanọ, mẹn da munhẹn dọ ha ta ẹmhọn Jesu man ọlẹn, ebi ọle rẹ riọ ẹbho ne yu kpanọ yẹ, bi ive nin ọle vele ghe ọle dẹ kie lu ọle bhi ẹghe odalo. (John 5:28, 29) Mẹn da taman ọlẹn yọle: “Ria ẹmhọn ebi ọ ha diayẹ sade uwẹ kie miẹn aba ẹ. Mhan rebhe ki ha nyẹnlẹn bhi ighegheghe bhi agbọn ọfubhegbe bhi ọne otọ nan.” Ene ọta nin mẹn tale nan da wo re ikoudure nin ọmọẹ mẹn.

Bhi ẹghe ọbhebhe, ọmọẹ mẹn da ha tẹmhọn ẹghe ọkike ọsi ọne agbọn nan bi ọne iman-emhin nọn rẹman ghe, itue ea ribhi Osẹnobulua ọkpa. Mẹn da mun Baibo nọnsọle rẹ man ọle ulọnlẹn kẹkẹ ne gbọtọle fanọn an ẹmhọanta rẹji Jehova, Jesu bi ẹghe ọkike ọsi ọne agbọn nan. (John 14:28; 2 Timothy 3:1-5) Beji mẹn rẹ manman ha tẹmhọn Jehova man ọmọẹ mẹn, iriọ mẹn wo rẹ manman dọ ha ria ẹmhọn Jehova.

khere-khere, mẹn da munhẹn dọ ha ye ẹmhọanta ne ribhi Baibo re nin ene biẹ mẹn man mẹn le. Ene ẹmhọanta nan da wo dọ ha rẹso mẹn. Bhi ọsi ijiẹmhin, mẹn da deba imọẹ mẹn ha ribhi isi-ikhiẹn ẹgheso yẹ sin itaba-ẹlinmhin, mẹn ki wo re osukpa ha ria ẹmhọn Jehova. Imọẹ mẹn eso yọle ghe ele hoẹmhọn Jehova, ọkpakinọn uwedẹ nin ele rẹ lu emhin bha rẹman ghe ele gene hoẹmhọn ọlẹn. Ranmhude mẹn bha guanọ nin mẹn diabe ele, mẹn da dọ lẹn emhin nọn khẹke nin mẹn lu. Ọ da khẹke nin mẹn fikie bu Jehova.

Bhi ọsi ẹmhọanta, nin ọria rẹ lẹn emhin nin ọle ho nin ọle lu bi nin ọle rẹ lu ọle, ikikẹ ribhọ. Ọ wo lẹkhẹ nin mẹn rẹ fi emhin eso denọ bhi iẹnlẹn. Ọ da wo lẹkhẹ nin rẹ zobọ bhi itaba-ẹlinmhin nin mẹn rẹ ha sin, mẹn da yẹ rẹban imọẹ mẹn nin mẹn ka rẹ deba ha mun obọ, sẹyẹ mẹn da deba ọwanlẹn ọkpa ha luẹ Baibo.

Ọkpakinọn, emhin eso yẹ ribhọ nọn bha lẹkhẹ nin mẹn rẹ fidenọ. Ọ bha lẹkhẹ nin mẹn hiehie rẹ rẹban ohu nọn kẹ re mẹn. Ẹgheso mẹn ki wo lu nọnsẹn, akizẹbue, mẹn ki wo munhẹn ha khọẹkẹ. Ọnan da wo manman ha ba mẹn bhi egbe rẹ sẹbhọ ghe, mẹn da ha riale ghe mẹn ida sabọ fidenọ. Ranmhude ọnan, mẹn da deba ọwanlẹn nọn man mẹn Baibo zilo ọne ẹmhọn. Ọne ọwanlẹn wo ha mhọn iziẹngbe bi ẹkẹ-ẹjẹjẹ, sẹyẹ ọle da wo manman rẹkpa mẹn. Ọle da taman mẹn nin tie uhọnmhọn-ọta ọkpa bhi The Watchtower nọn tẹmhọn ebezẹle nọn bha da khẹke nin mhan ji egbe lọ mhan.a Mhan da zilo nyan ebi mẹn ha sabọ lu sade ohu re mẹn. Khere-khere, mẹn da sabọ zobọ bhọ rẹ dọ ha khọẹkẹ ranmhude erọnmhọn nin mẹn ha nan ji Jehova bi ọne uhọnmhọn-ọta nin mẹn tie nọn ha re mẹn bhi ọkhọle. Bhi Epre 2000, mẹn da mianmẹn yẹ kiẹn ọkpa bhi Esali Jehova. Ene biẹ mẹn da wo manman ha ghọnghọn.

ELELE NIN MẸN SẸ MIẸN: Ranmhude ghe mẹn iyẹ sin itaba-ẹlinmhin yẹ nyẹn iẹnlẹn esankan, mẹn ki wo mhọn ọfure nian bi ọkhọle nọn gbale. Emhin nọn hi ki rẹ khin nin mẹn lu nian, aharẹmiẹn isi iwẹnna mẹn ye, la mẹn ribhi ikolo oga, la mẹn re egbe re ahoho, mẹn ki wo manman ghọnghọn nian.

Mẹn yi Jehova obulu nọn bha rẹ ji egbe lọ ene biẹ mẹn rẹ ha rẹkpa mẹn. Mẹn yẹ wo ria ẹmhọn ọta nọnsi Jesu nan gbẹn ọbhi John 6:44 nọn yọle: “Ọria soso ida sabọ bu mẹn re sade ọne Aba nọn je mẹn bha si ọle.” Mẹn wo manman ghọnghọn ghe mẹn sabọ fikie bu Jehova nọn rẹkpa mẹn rẹ fikie re.

“Mẹn da wo ha guanọ aba nọn ha hoẹmhọn mẹn.”—MARCO ANTONIO ALVAREZ SOTO

UKPE NAN BIẸ ỌLE: 1977

AGBAẸBHO NỌN NA VAE: CHILE

OKHA NỌNSỌLE: ỌKPA BHI ẸBHO NE SO ILLO NE KAKALE NAN DA ZẸ-BIBI

EBI IẸNLẸN NỌNSẸMHẸN KA DIAYẸ: Bhi eji a tiọle Punta Arenas bhi obọ ọsi South America, ọle inẹn mẹn da bẹẹ mẹn wanre. Ikpe isẹn mẹn ha yẹ beji ene biẹ mẹn zẹ egbe obọ. Bhi ọne ẹghe nan, ọ da wo dia mẹn ghe imẹn ọkpa khian. Mẹn da wo ha guanọ aba nọn ha hoẹmhọn mẹn.

Inẹn mẹn da deba Esali Jehova ha luẹ Baibo, sẹyẹ ọle da re mẹn ha khian ikolo oga nọnsele. Ọkpakinọn, ọ bha ha yẹẹ mẹn rẹ ha yo ikolo oga. Mhan da ha khian bhi uwedẹ mẹn ki wo ha re egbe ọbhi unun. Mẹn ki ha ribhi ikpe 13, mẹn bha yẹ ha yo ikolo oga.

Bhi ọne ẹghe nan, mẹn da wo dọ manman hoẹmhọn illo, sẹyẹ mẹn da dọ kere ghe mẹn wo sabọ so illo. Mẹn ki ribhi ikpe 15, mẹn da munhẹn dọ ha so illo ne kakale nan da zẹ-bibi bhi iluemhin kẹkẹ bi bhi eji a da da anyọn kẹkẹ. Ranmhude nin mẹn rẹ deba ẹbho ne manman guẹ so illo ha mun obọ, ọnan da re mẹn dọ ha hoẹmhọn unan illo nin ele so. Mẹn da munhẹn dọ ha yo isiku nan da luẹ ebi a rẹ so illo yẹ bhi eji mẹn da nyẹnlẹn. Mẹn ki ribhi ikpe 20, mẹn da diọbhi eji a tiọle Santiago, bhi enin, mẹn da kie yo isiku nan da luẹ ebi a rẹ so illo yẹ beji mẹn ha da manman luẹ ba ọle. Mẹn da yẹ wo deba usun ẹbho ne so illo ne kaka nan da zẹ-bibi ha so illo. Mẹn da sẹyẹ wo ha khue illo nin mẹn ka khue khẹ.

Bhi ene ẹghe nan rebhe, mẹn bha zẹwẹ ha ghọnghọn hiehie. Ranmhude mẹn guanọ nin mẹn ha ghọnghọn, mẹn ki ha da anyọn gbe egbe yẹ deba itue ea nin mhan ko khue illo noo ikhunmhun ne imhẹn. Ele mẹn wo ha ghe bii azagba-uwa nọnsẹmhẹn. Mẹn da ha mhọn akan-ehọ, yẹ yọ ukpọn ne bhihi. Sẹyẹ, mẹn da ji eto-agban nọnsẹmhẹn da manman sọn, yẹ ji eto nọnsẹmhẹn da manman taan sẹbhi ẹkun.

Ẹghe-ẹghe mẹn rẹ wo ha khọnlẹn, yẹ nabhi ẹmhọn bhi obọ unakpa. Ẹdẹ ọkpa beji mẹn da anyọn fo, mẹn da dọ ne ikpea ea ne khiẹn itaba-ẹlinmhin ha khọnlẹn, nin ele rẹ ha kpokpo mẹn bi ọmọẹ mẹn. Ele da wo manman gbe mẹn rẹ sẹ bhọ ghe ele da guọguọ imẹn agban an.

Ọnọn manman ba mẹn bhi egbe nẹ hi, emhin ne ẹbho nin mẹn tiọle imọẹ mẹn lu mẹn le. Ẹdẹ ọkpa, mẹn da dọ kere ghe, ọmanmhẹn nin mẹn zẹ bhi ọshọ wo ha ne ọmọẹ mẹn ọkpa nowẹ bhi ikpe ne bunbun, sẹyẹ imọẹ mẹn rebhe da re ọle nẹko nin mẹn. Ọnan da wo manman ba mẹn bhi egbe.

Mẹn da fikie diọbhi Punta Arenas, bhi enin mẹn da munhẹn ha man ẹbho ebi a rẹ so illo yẹ, yẹ khue jita rẹ miẹn igho. Mẹn da yẹ wo ha deba usun ẹbho ne so illo ne kaka nan da zẹ-bibi, yẹ deba ele rẹkodi illo. Mẹn da miẹn ọmanmhẹn ọkpa nọn wo manman mhọn-ọse natiọle Sussan, mhan da ha nyẹnlẹn kugbe. Akizẹbue, Sussan da dọ lẹn kere ghe inẹn ọlẹn rẹọbhi ghe, itue ea ribhi Osẹnobulua ọkpa, sẹyẹ ghe mẹn bha rẹọbhọ. Ọle da nọọn mẹn yọle: “Be bhọ gene hi ẹmhọanta nọn ribhọ?” Mẹn lẹnmhin ọne iman-emhin ghe itue ea ribhi Osẹnobulua ọkpa ohoghe nọn, ọkpakinọn mẹn sabọ gbotọle fanọn an man ọle bhi Baibo. Ọkpakinọn, mẹn lẹn ọnọn ha sabọ gbotọle fanọn an man ọlẹn. Mẹn da taman ọle ghe, Esali Jehova dẹ sabọ re otọle man ọlẹn bhi Baibo. Bhiriọ, mẹn da lu emhin nin mẹn bha yẹ lu bhi ikpe ne bunbun. Mẹn da nan erọnmhọn ji Osẹnobulua yẹ taman ọlẹn nin ọle rẹkpa mẹn.

Ukpẹdẹ eso ki gbera, mẹn da miẹn okpea ọkpa nọn diabe ọria nin mẹn lẹn, mẹn da nọọn ọlẹn si Ọsali Jehova ọle khin. Arẹmiẹn ofẹn wo ha mun ọlẹn ranmhude uwedẹ nin mẹn rẹ muegbe, ọle da yẹ fẹkẹ re ewanniẹn nin mẹn rẹji ebi ele rẹ dọ ikolo oga nọnsele yẹ nin mẹn nọọn ọle le. Mẹn da wo rẹọbhọ ghe uwedẹ nin mẹn rẹ miẹn ọne okpea nan, ọle Osẹnobulua rẹ wanniẹn erọnmhọn nọnsẹmhẹn. Mẹn ki diọbhi Kindọn Họọ, mẹn da dọtua bhi aga nọn kike beji a ha da miẹn ghe ẹbho bha ha ghe mẹn, dọ ye mẹn re. Ọkpakinọn, ranmhude ghe ene bunbun ka wo lẹn mẹn ẹghe nin mẹn rẹ ha vae bhi ikolo oga beji mẹn ribhi obhokhan, ele da sẹyẹ wo ye mẹn re. Ele da gbe obokhian nin mẹn yẹ mun mẹn dede rẹ sẹbhọ ghe ọkhọle nọnsẹmhẹn da wo lọre. Ọ da wo dia mẹn ghe mẹn vae bhi uwa. Beji mẹn ki daghe ọne okpea nọn ha man mẹn Baibo bhi ẹghe obhokhan, mẹn da taman ọlẹn nin ọle kie ha man mẹn Baibo.

EBI BAIBO RẸ FI IẸNLẸN NỌNSẸMHẸN DENỌ YẸ: Ẹdẹ ọkpa, mẹn da tie Proverbs 27:11 nọn yọle: “Ha wanlan ọmọn mẹn, nin uwẹ da re ọkhọle nọnsẹmhẹn ha ghọnghọn.” Ọ da wo manman rẹso mẹn rẹ lẹn ghe, ọria khọnkhan dẹ sabọ re Osẹnobulua nin Aman nọn man emhin rebhe ha ghọnghọn. Mẹn da dọ lẹn kere ghe, Osẹnobulua hi aba nin mẹn mọn da guanọ bhi iẹnlẹn!

Mẹn da rẹ ha guanọ nin mẹn lu emhin nọn ti Aba mẹn nọn ribhi okhun bhọ, ọkpakinọn ikhunmhun nin mẹn noo bi anyọn nin mẹn ha da bhi ikpe ne bunbun bha ji mẹn da lu iriọ. Ọnan da re mẹn dọ lẹn otọ ọta nin Jesu tale bhi Matthew 6:24 nọn yọle, “ọria soso ida sabọ ga ebeanlẹn eva.” Beji mẹn rẹ ha dọnmhegbe rẹ fi emhin denọ bhi iẹnlẹn, adia nọn ribhi 1 Corinthians 15:33 da wo rẹso mẹn. Enin yọle: “Emhin ne mhẹn nin ọria guẹle, ikolu ne imhẹn ria ọle a.” Mẹn da dọ lẹn sẹbhọ ghe mẹn ida sabọ fi iẹnlẹn nọnsẹmẹn denọ sade mẹn wo yo eji mẹn ka yo khẹ, la ha deba ẹbho nin mẹn deba mun obọ khẹ ha mun obọ. Ebi Baibo tale wo khian bhi ẹlo a: Ọkhẹke nin mẹn manman dọnmhegbe rẹ lu eka nin mẹn ha sabọ lu rẹ re egbe nẹ bhi emhin ne de mẹn idobolo.—Matthew 5:30.

Ranmhude mẹn wo hoẹmhọn illo ne kakale nan da zẹ-bibi, ọ bha lẹkhẹ nin mẹn rẹ zobọ bhọ rẹ ha khue ọle la kaehọ ọle. Ranmhude urẹkpa nin imọẹ mẹn bhi agbotu re nin mẹn, mẹn da sabọ zobọ bhi ene emhin nan. Mẹn da re obọ sibhi anyọn nan da gbe re, yẹ zobọ bhi itaba-ẹlinmhin nin mẹn rẹ ha sin. Mẹn da gbẹn eto bi eto-agban nọnsẹmẹn an, sẹyẹ mẹn bha yẹ ha yọ ukpọn ne bhihi ọkpa. Ẹghe nin mẹn ki rẹ taman Sussan ghe mẹn ho nin mẹn gbẹn eto nọnsẹmẹn an, ọ da wo han ọle ilo rẹ sẹbhọ ghe, ọle da ha guanọ nin ọle lẹn ebi mẹn dọ ha lu bhi Kindọn Họọ. Ọle da yọle: “Mẹn dẹ rẹkhan uwẹ yo ọne Kindọn Họọ nan, nin mẹn dọ daghe ebe sunu bhi enin!” Ọle da wo manman hoẹmhọn ebi ọle daghe bhi enin, bhiriọ ọle da munhẹn ha luẹ Baibo. Akizẹbue, mẹn bi Sussan da bọ egbe. Bhi ukpe 2008, mhan da mianmẹn. Ọ manman wo re mhan ghọnghọn rẹ deba inẹn mẹn ha ga Jehova.

ELELE NIN MẸN SẸ MIẸN: Mẹn iyẹ ribhi ọne agbọn nan nin mẹn bha da miẹn eghọnghọn ọsaje bi imọẹ esili. Arẹmiẹn mẹn yẹ wo manman hoẹmhọn illo, mẹn ki zẹ ọne mẹn kaehọ ọle nian. Mẹn wo ha re ebe sunu bhi iẹnlẹn nọnsẹmẹn rẹ rẹkpa azagba-uwa nọnsẹmhẹn bi ẹbho ebhebhe, manman nọn ene usẹn. Mẹn ho nin mẹn rẹkpa ele lẹn ghe, emhin rebhe nin ọne agbọn nan ze ọle egbe dagbare sabọ rẹ diabe emhin nọn mhẹn bhi ẹlo a, ọkpakinọn bhi ọkike ọle, ihoho ene emhin rebhe khin.—Philippians 3:8.

Mẹn ki wo mhọn imọẹ esili bhi agbotu nin oyẹẹ bi ọfure ye. Ọnọn kokhun nẹ hi, mẹn ki mhọn Aba nian nin mẹn rẹ dọ sikẹ Jehova.

[Ebi a gbẹn bhi otọle]

[Ẹkpẹti]

“Mẹn ki wo dọ sabọ fikie bu Jehova nọn rẹkpa mẹn rẹ fikie re”