LUẸ EMHIN BHI ỌTA NỌNSI OSẸNOBULUA
Be Ha Sunu bhi Ukpẹdẹ Ibhohiẹn?
Ọne uhọnmhọn-ọta nan zẹ inọnta eso egbe dagbare nin uwẹ ha sabọ ha mhọnlẹn, ọ yẹ rẹman eji uwẹ ha da miẹn ewanniẹn rẹji ele bhi Baibo. Ọ de wo manman ti Esali Jehova bhọ nin ele rẹ deba uwẹ zilo nyan ewanniẹn rẹji ene inọnta.
1. Be hi Ukpẹdẹ Ibhohiẹn?
Beji ifoto nọn ribhi obera rẹman, ẹbho ne bunbun riale ghe, bhi Ukpẹdẹ Ibhohiẹn a dẹ ne oriọn ọsi ẹbho ne bunbun vae bhi ojukhuo nọnsi Osẹnobulua, a ki re emhin nin ele lu bhi ẹghe nọn gbera rẹ bhu ele ohiẹn. Ene lu nọnsẹn ki diọbhi okhun, enekẹle ki dọ ha to bhi uwa eranlẹn. Ọkpakinọn, Baibo rẹman ghe, Ukpẹdẹ Ibhohiẹn dẹ ha yi ukpẹdẹ nan ha rẹ re emhin rebhe ọi nọnsẹn. (Psalm 96:13) Jesu hi Ọbhohiẹn nin Osẹnobulua zẹ nọn ha re emhin rebhe ọi nọnsẹn nin eria.—Tie Isaiah 11:1-5; Acts 17:31.
2. Be Ukpẹdẹ Ibhohiẹn ha rẹ re emhin rebhe ọi nọnsẹn yẹ?
Ẹghe nin Adam nin okpea nin ọhẹnhẹn rẹ tan ẹlo a sọtẹ da Osẹnobulua, ọle da si emhin ebe, iloya, bi uu ji imọn nesọle rebhe. (Romans 5:12) Nan rẹ hẹnhẹn emhin nin Adam riia, Jesu dẹ riọ ẹbho ne bunbun ne yu kpanọ. Ebe ọsi Revelation rẹman ghe, bhi ẹkẹ ene ikpe uli nin Jesu Kristi ha rẹ gbẹloghe ọnan ha da sunu.—Tie Revelation 20:4, 11, 12.
Ẹbho nan ha riọ kpanọ bhi uu, ọ iyi emhin nin ele lu ọkuẹsẹ ele yu a ha rẹ bhu ele ohiẹn. Revelation uhọnmhọnlẹn 20 rẹman ghe a dẹ tuje ebe nan “khili” a, ebi ele rẹ re obọ rẹkhan ẹmhọn ne ribhi ọne ebe yẹ, ọle a ha rẹ bhu ele ohiẹn. (Romans 6:7) Paul nin odibo da yọle ghe “ene khiale bi ene bha khia” dẹ deba bhi ẹbho nan ha riọ kpanọ ne ha miẹn isẹh oa rẹ luẹ ẹmhọn Osẹnobulua.—Tie Acts 24:15.
3. Elele nela ẹbho ha miẹn bhi Ukpẹdẹ Ibhohiẹn?
Ẹbho ne bha lẹn Osẹnobulua nin Jehova, ne bha yẹ ga ọle ọkuẹsẹ ele yu, dẹ miẹn isẹhoa rẹ fidenọ yẹ ha lu emhin esili. Ele ha gene fidenọ, ariọkpanọ bhi uu nọnsele ki ha yi “ariọkpanọ ọsi iẹnlẹn.” Ọkpakinọn, eso bhi ene ẹbho nan ida ka luẹ ẹmhọn Jehova, bhiriọ, ariọkpanọ bhi uu nọnsele ki ha yi “ariọkpanọ ọsi ibhohiẹn.”—Tie John 5:28, 29; Isaiah 26:10; 65:20.
Ẹghe nin Ukpẹdẹ Ibhohiẹn nọn yi ikpe uli nin Jesu ha rẹ gbẹloghe ha rẹ sotọ, Jehova ki rẹkpa eria ne ka ọle ehọ rẹ ha mhọn egbe nọn gbale, ọle ki yẹ re emhin rebhe kiẹn ọsọgbọn beji ọ ka ha ye bhi ẹghe nin ọle rẹ man ọne agbọn nan. (1 Corinthians 15:24-28) Ẹghe nọn mhẹn ọnan da wo ha khin rẹji ọrebhe ne ka Osẹnobulua ehọ! Bhi edọnmhẹn nọn ha kike, Osẹnobulua ki fan Esu fia bhi ẹkẹ ọne uhio nọn imhọn ọkpẹnlẹn nan ha mun ọlẹn ọi bhi ene ẹkẹ ikpe uli. Bhi ọne ẹghe nan, Esu ki gbo ha dọnmhegbe nin ọle rẹ si ẹbho sibhi ibo nọnsi Jehova re. Ọkpakinọn, ẹbho ne bha re otọ nin Esu ki sọnyẹnmhẹn bhi ọne otọ nan rẹ sẹbhi ighegheghe.—Tie Isaiah 25:8; Revelation 20:7-9.
4. Ukpẹdẹ ibhohiẹn ọbhebhe nela eria ha da miẹn elele?
Baibo yẹ noo “ukpẹdẹ ibhohiẹn” rẹ tẹmhọn emhin nọn ha sunu, nin Jehova ha rẹ kpẹn ọne agbọn nan nọn imhẹn. Osukpa ọne ibhohiẹn nan ha rẹ vae, beji Okpamẹn rẹ re osukpa fuẹn eria ne imhẹn an bhi ẹghe ọsi Noah. Ọne ibhohiẹn nan dẹ fuẹn “ẹbho ne imhẹn” rebhe a, ọnan ki re otọ ne eria ne mhẹn rẹ ha nyẹnlẹn bhi ọne otọ nan nin “ikhiakhiale” da ha ye.—Tie 2 Peter 3:6, 7, 13.