Ikhuo be tẹmhọn Osẹnobulua bhi agbotu ọsi Esali Jehova?

Ehe, ikhuo ne mamman bunbun ribhi agbotu nọnsi Jehova bhi otọ agbọn nan rebhe ne tẹmhon agbejele nọnsi Osẹnobulua. Rẹji ene ikhuo nan, Psalm 68:11 da yọle, “Jehova hi ọnọn gbe ọne uhi. Usun eyokhọnlẹn ne bunbun, ọle ikhuo ne wewe ọta nọn mhẹn khin.”

Ọkpakinọn, iwẹnna nin ene ikhuo nan lu dikẹ bhi iwẹnna nin ikhuo ne mun ọkalo bhi otuẹ kẹkẹ ẹlẹnan lu. Be ele rẹ dikẹ yẹ?

Ikhuo ne mun ọkalo bhi otuẹ, ele sun otuẹ nin ele ye, ele hi ene yẹ man emhin bhọ. Ọkpakinọn ikhuo ne tẹmhọn Osẹnobulua bhi agbotu ọsi Esali Jehova, ọ iyi ẹbho ne ribhi ẹkẹ agbotu ele man ele emhin, ẹbho ne ribhi olele ele tẹmhọn Osẹnobulua man. Ele lu ọnan bhi iwẹnna itẹmhọn Osẹnobulua nin ele lu rẹ na bhi uku-uwa rẹ sẹbhi uku-uwa, bi bhi eji ọ hi ki rẹ khin nin ele da miẹn ẹbho.

Uwedẹ ọbhebhe nin ikhuo ne ribhi agbotu ọsi Esali Jehova rẹ dikẹ bhi ikhuo ne mun ọkalo bhi otuẹ ẹlẹnan hi iwenna nin ele lu bhi ẹkẹ agbotu. Bhi ikolo oga ọsi Esali Jehova, ikpea hi ene man emhin, ikhuo iman emhin bhi ikolo nọnsele sade okpea nọn mianmẹn ribhi enin. ​—1 Timothy 3:2; James 3:1. Baibo yọle ghe ikpea ọkpa, ele a ha rẹ kiẹn ewanlẹn bhi ẹkẹ agbotu. Fẹ ijiẹmhin nin Paul nin odibo re ọbhi otọ bhi ebe nin ọle gbẹn ji Titus nọn yi ọwanlẹn bhi agbotu: “Mẹn zẹ uwẹ obọ bhi Crete nin uwẹ da sabọ . . . ne eria ọbhi ihe ọsi ewanlẹn bhi agbaẹbho rẹ sẹbhi agbaẹbho.” Paul da yẹ yọle ghe okpea nan ha re ọbhi ihe ọsi ene ewanlẹn dẹ ha yi “okpea nọn mhọn okan bhi egbe, nọn mhọn okhuo okpa.” (Titus 1:​5, 6) Paul yẹ tẹmhọn emhin nọn dia inian man Timothy bhi ebe nin ọle gbẹn ji Timothy, ọle da yọle: “Ahamiẹn okpea zegbere nin ọle kiẹn ọkpa bhi ene ewanlẹn bhi agbotu, iwẹnna esili ọle re iriọ guanọ. Ọkhẹke nin ọwanlẹn bhi agbotu ha yi ọria nọn imhọn okan bhi egbe, ọria nọn mhọn okhuo ọkpa, ọria nọn lu emhin ọbhi oleghe, ọria nọn ria-eria nọnsẹn, ọria nọn lu emhin nọnsẹn, bi ọria nọn guẹ rẹ man emhin.”​—1 Timothy 3:​1, 2.

Bezẹle nan da miẹn ghe ikpea ọkpa a ne ọbhi ihe nin ele ha re agbotu khian? Paul nin odibo re ewanniẹn ọbhi ọne inọnta nan beji ọle yọle: “Mẹn bha re otọ nin ikhuo rẹ ha man emhin la nin ele ha re ahu man bhi egbe ikpea, sokpan, ọkhẹke nin ele ha koko unun. Ranmhude, Adam a ka man, a kuẹ man Eve.” (1 Timothy 2:​12, 13) Ọnan rẹman ghe, ikpea Jehova guanọ ne ha sun agbotu yẹ man emhin bhọ.

Eguọmhandia nesi Jehova re obọ rẹkhan ijiẹmhin nin Jesu Kristi re ọbhi otọ. Rẹji iwẹnna oga nọnsi Jesu, Luke nin odibo da gbẹn yọle: “Ọle da ha khian na bhi agbaẹbho rẹ sẹbhi agbaẹbo, bi na bhi idunmhun rẹ sẹbhi idunmhun, nin ọle rẹ ha tẹmhọn Osẹnobulua yẹ wewe ọta nọn mhẹn ọsi Agbejele nọnsi Osẹnobulua man ẹbho.” Akizẹbue, Jesu da je edibo nesọle dagbare nin ele yẹ dọ lu ọne iwẹnna nan: “Ele da dagbare, ele da ha na bhi idunmhun rẹ sẹbhi idunmhun dọ ha wewe ọne ọta nọn mhẹn.”​—Luke 8:1; 9:​2-6.

Ẹlẹnan nian, eguọmhandia nesi Jehova rebhe, ele rẹ yi ikpea la ikhuo, deba lu ọne iwẹnna nin Jesu yọle nan lu ẹghe nin ọle re yọle: “Ọne ọta nọn mhẹn ọsi Agbejele nan, a dẹ wewe ọle na bhi eji eria hi ki rẹ ha ye bhi ọne otọ nan rebhe, nọn ha yi ọsali rẹji agbaẹbho rebhe. Ẹghenin, ọkpẹnlẹn kuẹ vae.”​—Matthew 24:14.