“Ele da ha guanọ nin mẹn tobọmẹn daghe ọle ghe ẹmhọanta nọn”

EBI IẸNLẸN NỌNSẸMHẸN KA DIAYẸ:

Eji a tiọle Santo Domingo bhi Dominican Republic, ọle a da biẹ mẹn. Imẹn kotọ bhi ẹwẹ imọn enẹn nin ene biẹ men mhọnlẹn. Ene biẹ imẹn wo manman yo isiku, ele da ha ho nin ele bẹ mhan wanre bhi ẹwẹ ẹbho ne mhẹn. Ikpe enẹn ọkuẹsẹ a biẹ mẹn, aba mẹn bi inẹn mẹn da miẹn misọnari eso ọsi oga Mormon. Uwedẹ nin ene ikpea rẹ muegbe nọnsẹn bi uwedẹ nin ele rẹ lu emhin da wo ti ene biẹ imẹn bhọ, ranmhude ọnan, ele da zẹ nin mhan ha yi ọhẹnhẹn ne ha deba oga natiọle Church of Jesus Christ of Latter-day Saints, la Mormon Church bhi eji mhan da nyẹnlẹn.

Beji mẹn ha wanre, mẹn da wo manman ha sọnyẹnmhẹn bhi ene iluemhin kẹkẹ nin mhan lu bhi otuẹ. Emhin nin ele ha man bhi ẹmhọn azagba-uwa bi uwedẹ nin ele yọle nan rẹ ha nyẹnlẹn da wo ha ti mẹn bhọ. Ọne oga da wo ha ti mẹn bhọ rẹsẹbho ghe mẹn bhọ da ha ho nin mẹn kiẹn misiọnari.

Beji mẹn ha ribhi ikpe 18, azagba-uwa nọnsẹmhẹn da kpanọ ha khian United States beji mẹn ha da sabọ yo isiku nọn khua nọn mhẹn. Ukpe ọkpa ki gbera, obhio inẹn imẹn bi ọdọ ọle ne ha yi Esali Jehova da vae bhi Florida dọ tuẹ mhan. Ele da yọle nin mhan deba ele yo usikoko nọn nẹ. Uwedẹ nin ọrebhe rẹ wo ha taan Baibo a, yẹ gbẹn emhin nin ele luẹ ọbhi otọ da wo rẹso mẹn. Bhiriọ, mẹn da yọle nin ele re ebe bi ebi a rẹ gbẹn ebe nin mẹn. Mẹn da yẹ munhẹn ha gbẹn ebi mẹn họn ọbhi otọ.

Mhan ki na ọne usikoko vae, obhio inẹn imẹn bi ọdọ ọle da yọle ghe beji a miẹn ọ yẹẹ mẹn rẹ kiẹn misiọnari, ele dẹ rẹkpa mẹn rẹ luẹ Baibo. Ọ da wo ti mẹn bhọ, ranmhude bhi ọne ẹghe nan, Ebe ọsi Mormon mẹn lẹn gbera Baibo.

EBI BAIBO RẸ FI IẸNLẸN NỌNSẸMHẸN DENỌ YẸ:

Ele da re ifoni rẹ nin mẹn ha zilo bhi Baibo. Mhan da ha zilo, ele ki ha yi mẹn nin mẹn ha fẹghe si ebi mẹn rẹọ i diẹn mun ebe ribhi Baibo. Ele da ha guanọ nin mẹn tobọmẹn daghe ẹmhọanta nọn ribhi Baibo.

Emhin ne bunbun ribhọ nan man mẹn le bhi oga ọsi Mormon nin mẹn rẹọ i, ọkpakinọn mẹn bha gene lẹn si ene emhin nan diẹn mun ebe ribhi Baibo. Obhio inẹn imẹn da je Awake! ọsi November 8, 1995, nin Esali Jehova gbẹn ji mẹn. Eje eso bhi ọne Awake da tẹmhọn emhin nin ẹbho ne yo otuẹ ọsi Mormon rẹọ i. Ọ da wo han mẹn ilo ghe mẹn bha rẹ manman lẹn iman-emhin ọsi Mormon nọnsẹn. Ọnan da rẹ mẹn dọ gua otọ Wẹbsaiti ọsi Mormon nọnsẹn, nin mẹn rẹ fẹghe si ẹmhọanta ebe ribhi ọne Awake gene khin. Mẹn da kere ghe ẹmhọanta gene nọn. Ẹghe nin mẹn yẹ rẹ rẹnẹ yo museum ọsi Mormon bhi eje a tiọle Utah, mẹn da yẹ miẹn emhin ne re imẹn rẹọbhọ ghe ẹmhọanta ọne Awake tale.

Mẹn rẹ wo rẹọbhọ ghe ebe ribhi Baibo yẹ ribhi Ebe ọsi Mormon. Ọkpakinọn, beji mẹn ki munhẹn ha gbẹlokoto tie Baibo, mẹn da dọ kere ghe ikẹkẹ ribhi iman-emhin ọsi Mormon bi ebi ribhi Baibo. Bhi ọsi ijiẹmhin, bhi Ezekiel 18:4, Baibo yọle ghe oriọn yumhin. Ọkpakinọn, Alma 42:9, bhi ẹkẹ Ebe ọsi Mormon da yọle: ‘Oriọn ida sabọ yu.’

Rẹ gbera ghe iman-emhin nọnsele bha diẹn mun ebe ribhi Baibo, ọne iman-emhin nin ele man ghe nin mhan manman ji ẹmhọn agbaẹbho nọnsẹmhan da rẹtẹ mhan da wo ha kpokpo mẹn bhi ọkhọle. Bhi ọsi ijiẹmhin, a man ekhẹn Mormon ele ghe, eji a tiọle Jackson County, Missouri, bhi U.S.A, ọle ogba ọsi Eden rẹ ha ye. Ene mun ọkalo bhi ọne otuẹ ki ha man ẹbho le ghe, ẹdẹ ọkpa Osẹnobulua dẹ ha noo ugbẹloghe ọsi United States rẹ gbẹloghe ọne agbọn nan rebhe.

Mẹn ki da ha riale, ‘ọ ha yi iriọ, be ki da sunu ji agbaẹbho nọnsẹmhẹn bi agbaẹbho nekẹle?’ Ọsemuan ọkpa beji usẹn obhokhan ọkpa nọn yi misiọnari bhi oga ọsi Mormon tie mẹn bhi foni, mẹn da mun ọne ẹmhọn nan re. Mẹn da nọọn ọlen ghe ahamiẹn okhọn de nin agbaẹbho nọnsọle bi agbaẹbho ọbhebhe, si ọle dẹ ka khọn ibo ọle ne yo otuẹ ọsi Mormon ne ribhi ọne agbaẹbho. Ọle da yọle ehe, ọnan da wo han mẹn ilo. Mẹn da manman gua otọ iman-emhin ọsi Mormon fẹghe, sẹyẹ mẹn da dọ nọọn ene mun ọkalo bhi ọne otuẹ ọta. Ele da taman mẹn ghe ọ ida lẹkhẹ nan rẹ wanniẹn inọnta nesẹmhẹn, ghe ẹdẹ ọkpa, beji ẹfua ha rẹ ha zegbere a dẹ miẹn ewanniẹn rẹji ele.

Ebi ele ta da wo re egbe lọ mẹn, ọnan da rẹ mẹn ria ẹmhọn ebezẹle nin mẹn da ho nin mẹn kiẹn misiọnari bhi oga ọsi Mormon. Mẹn da kere ghe, ọkpa bhi emhin nọn zẹle nin mẹn da ho nin mẹn kiẹn misiọnari hi nin mẹn da sabọ ha rẹkpa ẹbho. Emhin ọbhebhe hi, mẹn ha kiẹn misiọnari, ẹbho ki ha mun ekpẹn nin mẹn. Ọkpakinọn, mẹn bhọ bha gene manman lẹn Osẹnobulua nọnsẹn. Arẹmiẹn ghe mẹn ka ha tie Baibo bhi ẹghe nọn gbera, mẹn bha ha re ẹlo nọn ghanlẹn rẹ ghe ọle. Mẹn bha lẹn emhin soso rẹji emhanmhan nin Osẹnobulua mhọn da ọne otọ nan, bi mhan nin eria.

ELELE NIN MẸN SẸ MIẸN:

Mẹn ki deba Esali Jehova ha luẹ Baibo, mẹn da dọ lẹn emhin ne bunbun, mẹn da dọ lẹn elin nọnsi Osẹnobulua, ebi sunu ji eria ne yu, bi ebi Jesu ha rẹ mun iho nọnsi Osẹnobulua sẹ yẹ. Khere khere, mẹn da dọ ha lẹn otọ Baibo, sẹyẹ, ọ da ha ti mẹn bhọ rẹ ha taman ẹbho emhin nin mẹn luẹ. Rẹ na otọ ha de, mẹn lẹnmhin ghe Osẹnobulua ribhọ, Ọkpakinọn, ejayenan nian, mẹn ki sabọ nanlẹn talọ bhi erọnmhọn bọsi ọmọẹ. July 12, 2004, ọle mẹn mianmẹn yẹ dọ kiẹn ọkpa bhi ẹwẹ Esali Jehova, uki ehan ki gbera, mẹn da munhẹn ha lu ọkanẹfan ọsi ẹghe rebhe.

Ikpe isẹn mẹn gbe bhi Bẹtẹ ọsi Esali Jehova nọn kokhun nẹ nọn ribhi Brooklyn, New York. Ọ wo manman ti mẹn bhọ ghe bhi ene ẹghe nin mẹn gbe bhi Bẹtẹ, mẹn da sabọ rẹkpa bhi eji a da lu Baibo bi ebe nesẹmhan nin mhan rẹ rẹkpa ẹbho bhi otọ agbọn nan rebhe. Rẹ sẹbhi ẹlẹnan, ọ wo ti mẹn bhọ rẹ ha rẹkpa ẹbho rẹ lẹn ẹmhọn Osẹnobulua.