Ẹghela Agbejele Nọnsi Osẹnobulua Re Munhẹn Ha Gbẹloghe?—Obọ 2

EBI MHAN KA TẸMHỌNLẸN BHI ẸMHỌN EBHOHIẸ NỌNSI NEBUCHADNEZZAR

Cameron: Jon, ọ ti mẹn bho rẹ gbo kie miẹn uwẹ. Uwedẹ nin mhan rẹ ko zilo bhi Baibo uzana-uzana wo manman ti mẹn bhọ.a Be emhin ki diayẹ?

Jon: Ọ wo mhẹn. Obulu.

Cameron: Akhuẹnmhẹn Osẹnobulua. Ẹdẹ nin mhan zilo kike, mhan da tẹmhọn ebezẹle nin Esali Jehova da yọle ghe ukpe 1914b ọle Agbejele nọnsi Osẹnobulua munhẹn ha gbẹloghe. Beji mhan zilo ọle ẹdẹnin, mhan da miẹn emhin ọkpa bhi ọta akhasẹ nin mhan tie bhi ebe ọsi Daniel uhọnmhọnlẹn nọnzi 4 nọn rẹ mhan rẹọbhọ ọnan. Uwẹ yẹ yere ebe ribhi enin?

Jon: Ebhohiẹ nọnsi Nebuchadnezzar nin Ojie nin ọle da daghe udede oran a tẹmhonlẹn bhi enin.

Cameron: Iriọ nọn tee. Bhi ọne ebhohiẹ, Nebuchadnezzar da daghe udede oran nọn tan sẹbhi okhun. Ọle da họn ukọ nọnsi Osẹnobulua yọle nan hian ọne oran fia, ọkpakinọn, a ha ze ugugumhọn ọlẹn bi iniẹn ọlẹn obọ bhi otọ. “Ẹghe ihinlọn” ha ki gbera, ọne oran ki kie jẹre.c Mhan da yẹ zilo nyan ebezẹle nin ọne akhasẹ da mhọn amunsẹ eva. Uwẹ yẹ ye amunsẹ nọnsọle nin ọhẹnhẹn re?

Jon: Ọle hi emhin nọn sunu ji Nebuchadnezzar tobọle. Ọle da mhẹnmhẹn na bhi ẹkẹ ikpe ihinlọn.

Cameron: Tee. Bhi ẹkẹ ẹghe eso, ẹwanlẹn bha yẹ gba nin Nebuchadnezzar. Bhiriọ, ọle bha yẹ sabọ ha gbẹloghe. Bhi amunsẹ nọn khua ọsi ọne akhasẹ nan, Ojie soso bha yẹ ha gbẹloghe bhi Ejele nọnsi Osẹnobulua bhi ọne otọ na bhi ẹkẹ ẹghe ihinlọn. Beji mhan zilo ọle, ọne ẹghe ihinlọn da munhẹn beji a dunmhun Jerusalem a bhi ukpe 607 B.C.E. Rẹ na ẹghe nin rẹ ha khian, Ojie bha yẹ ha ribhọ nin Osẹnobulua re mundia rẹ ha gbẹloghe ẹbho nesọle. Ọkpakinọn, ọne ẹghe ihinlọn ki sotọ, Osẹnobulua da re ojie ọbhebhe mundia nin ẹbho nesọle. Ọkpakinọn, ọria bhi okhun ọle zẹle. Mhan dẹ sabọ yọle ghe, ẹghe nin ọne ẹghe ihinlọn nan ha rẹ sotọ, ọle Agbejele nọnsi Osẹnobulua ha rẹ munhẹn ha gbẹloghe bhi okhun. Mhan ka zilo nyan ẹghe nin ọne ẹghe ihinlọn nan rẹ munhẹn. Bhiriọ, mhan ha sabọ lẹn ẹghe nin ene ẹghe ihinlọn rẹ sotọ, ọ ki rẹkpa mhan rẹ lẹn ẹghe nin Agbejele nọnsi Osẹnobulua rẹ munhẹn ha gbẹloghe. Ebi mẹn sẹ tẹmhọnlẹn mun uwẹ ẹlo kore?

Jon: Ehe, emhin nin uwẹ tẹmhọnlẹn wo rẹkpa mẹn rẹ yere ebi mhan ka zilo ọle ẹdẹnin.

Cameron: Mhan mun uhọnmhọn-ọta nin mhan ha zilo nyan ẹlẹnan hẹn. Mhan fẹghe ebi ọne ẹghe ihinlọn nan tan sẹ yẹ. Mẹn la wo kie tie ọne uhọnmhọn-ọta nan, beji mẹn ha da sabọ ye ọta kpataki ne ribhọ re. Mẹn dẹ dọnmhẹngbe rẹ gbotọle fanọan man uwẹ.

Jon: Ọmhẹn.

ẸGHE IHINLỌN KI SOTỌ—ẸGHE ỌKIKE DA MUNHẸN

Cameron: Bhi amunsẹ ọhẹnhẹn ọsi ọta akhasẹ nọn rẹtẹ Nebuchadnezzar, ene ẹghe ihinlọn, ikpe ihinlọn ẹjẹje ele ha khin. Ọkpakinọn, bhi udede amunsẹ nọn rẹtẹ Agbejele nọnsi Osẹnobulua, ene ẹghe ihinlọn dẹ tan gbera ikpe ihinlọn ẹjẹje.

Jon: Bezẹle nin uwẹ da ta iriọ?

Cameron: Yere ghe ọne ẹghe ihinlọn munhẹn beji a dunmhun Jerusalem an bhi ukpe 607 B.C.E. Mhan ha na bhi ọne ukpe nin munhẹn ha ka ọle, ikpe ihinlọn ẹjẹje ki rẹ mhan diọbhi ukpe 600 B.C.E. Ọkpakinọn, emhin kpataki soso iribhọ nọn sunu bhi ọne ukpe nin nọn rẹtẹ Agbejele nọnsi Osẹnobulua. Rẹ gbera ọnin, beji mhan ka zilo ọle, ikpe ne bunbun ki gbera, beji Jesu ha ribhi ọne otọ nan, ọle da yọle ghe ene ẹghe ihinlọn bha sẹ sotọ.

Jon: Tee. Mẹn sẹyẹ wo ye ọnin re.

Cameron: Bhiriọ, ọne ẹghe ihinlọn ida wo ha yi ẹghe ihinlọn ẹjẹje. Ẹghe nọn manman tan, ọle ọne ẹghe ihinlọn da ha khin.

Jon: Be ọ tan sẹ yẹ?

Cameron: Ebe ọsi Revelation nọn yẹ wo manman tẹmhọn emhin ne ribhi ebe ọsi Daniel rẹkpa mhan rẹ lẹn ebi ọne ẹghe ihinlọn nan tan sẹ yẹ tee. O da tẹmhọn ẹghe ea bi ukhiọnmhẹn ẹghe, ọne ẹghe nan da ha yi ikpẹdẹ 1,260.d Bhiriọ, uwẹ ha ku ẹghe ea bi ukhiọnmhẹn ba ẹghe ea bi ukhiọnmhẹn ọbhebhe, ọ ki ha yi ẹghe ihinlọn. Ọnan ki ha yi ikpẹdẹ 2,520. Ọ yẹ mun uwẹ ẹlo kore riọ?

Jon: Ehe, ọ mun mẹn ẹlo kore. Ọkpakinọn mẹn bha daghe ebi ọnan rẹ rẹman yẹ ghe ukpe 1914 Agbejele nọnsi Osẹnobulua munhẹn ha gbẹloghe.

Cameron: Ọmhẹn, mhan fẹghe si mhan dẹ sabọ diẹn ọle kugbe beji uwẹ ha da sabọ lẹn otọ ọle. Ẹgheso, bhi ọta akhasẹ ne ribhi Baibo, ukpẹdẹ ọkpa sabọ rẹ mundia nin ukpe ọkpa.e Mhan ha rẹkhan ọne uwedẹ nan rẹ ka ọle, nin ukpẹdẹ ọkpa da yi ukpe ọkpa, ene ẹghe ihinlọn ki ha yi ikpe 2,520. Mhan ha na bhi ukpe 607 B.C.E. ka ikpe 2,520, ọ ki re mhan diọbhi 1914.f Iriọ mhan rẹ dọ sẹbhi 1914 nọn yi ukpe nin ọne ẹghe ihinlọn rẹ sotọ. Ọnan hi ọne ukpe nin Jesu munhẹn ha gbẹloghe bhi Agbejele nọnsi Osẹnobulua. Sẹyẹ, rẹ na bhi ukpe 1914 ha vade, emhin kpataki kẹkẹ sẹ wo sunu bhi ọne agbọn nan, emhin nin Baibo yọle ele dẹ ha sunu bhi ẹghe ọkike.

Jon: Be bhọ hi ene emhin?

Cameron: Mhan fẹ ebi Jesu ta nan gbẹn ọbhi Matthew 24:7. Rẹji ẹghe nin ọle ha rẹ munhẹn ha gbẹloghe bhi okhun, Jesu da yọle: “Agbaẹbho ki ha mun okhọn ji agbaẹbho, agbejele ki ha mun okhọn ji agbejele. Ukhunmhun ki ha fi, otọ ki ha munvẹa bhi ije kẹkẹ.” Bhi eji mhan tiele nan, Jesu yọle ukhunmhun bi otọ nọn mun vea dẹ ha sunu bhi ọne ẹghe nan. Ene emhin kẹkẹ nin Jesu tẹmhọnlẹn nan bha be manman ha sunu bhi ọne agbọn nan rẹ na bhi ukpe 1914 ha vade?

Jon: Ehe.

Cameron: Sẹyẹ, bhi ọne ulọnlẹn, Jesu da yọle ghe okhọnlẹn dẹ ha sunu ẹghe nin ọle ha rẹ munhẹn ha gbeloghe, la bhi ẹghe ọkike. Ebe ọsi Revelation tale ọbhi otọ ghe ọne okhọn nan ida ha yi okhọn nan ha khọn bhi ije eso, sokpan, ọ dẹ rẹso ẹbho bhi otọ agbọn rebhe bhi ẹghe ọkike.g Uwẹ yẹ yere ẹghe nin okhọn nin ọhẹnhẹn nin agbọn rebhe kugbe khọn rẹ munhẹn?

Jon: Ukpe 1914 nọn, ọnan hi ọne ukpe nin uwẹ yọle Jesu munhẹn ha gbẹloghe! Mẹn bha sẹ ka re inian riale khẹ.

Cameron: Mhan ha ria ẹmhọn ebi ọne ọta akhasẹ nọn tẹmhọn ẹghe ihinlọn rẹ diẹn mun ọta akhasẹ ebhebhe ne ribhi Baibo ne tẹmhọn ẹghe ọkike, mhan ki kere ghe ẹwanlẹn ribhọ nan rẹ yọle ghe ukpe 1914, ọle Agbejele nọnsi Osẹnobulua munhẹn ha gbẹloghe. Esali Jehova wo manman rẹọbhọ ghe ukpe 1914 Jesu munhẹn ha gbẹloghe bhi Agbejele nọnsi Osẹnobulua bhi okhun. Sẹyẹ, ọne ukpe nin, ọle ẹghe ọkike munhẹn.h

Jon: Ene emhin nan rebhe nin uwẹ tẹmhọnlẹn bha sẹ wo gene mun mẹn ẹlo kore.

Cameron: Mẹn lẹnmhin iriọ ọ ha dia. Beji mẹn ka ta, ọ yẹ wo manman re mẹn ẹghe ọkuẹsẹ mẹn sabọ lẹn otọle nọnsẹn. Aharẹmiẹn emhin rebhe nin mhan ta bha mun uwẹ ẹlo kore, mẹn rẹọbhọ ghe ọne illo nan nin mhan ko zẹ rẹkpa uwẹ rẹ daghe ọle ghe arẹmiẹn ọne ukpe 1914 igene ribhi Baibo, ebe Esali Jehova rẹọ rẹji ọne ukpe nin diẹn mun ebe ribhi Baibo.

Jon: Ehe, ọnan wo re ẹmhọn bha ti mẹn bhọ. Baibo bha da re iman-emhin nesẹbha rebhe, ọ iyi ebi bha ria emhin yẹ. Ọkpakinọn mẹn riale, bezẹle nin ọne iman-emhin nan bha da lẹkhẹ nan rẹ lẹn otọle. Bezẹle nin Osẹnobulua bha da wo taman mhan bhi Baibo ghe ukpe 1914, ọle Jesu ha munhẹn ha gbẹloghe bhi okhun?

Cameron: Jon, inọnta nọn mhẹn ọnin wo khin. Bhi ọsi ẹmhọanta, emhin ne bunbun ribhọ nin Baibo bha wo gene gbotọle fanọan man mhan sẹsẹsẹ. Bezẹle nin Osẹnobulua da ji a da gbẹn Baibo bhi uwedẹ nin mhan ha rẹ ha gua otọ emhin eso fo ọkuẹsẹ mhan sabọ lẹn otọ ọle? Nin mhan zilo nyan ọnin ẹdẹ nin mẹn ha kie vae.

Jon: Ọnin dẹ wo ha mhẹn.