Mẹn Da Kere Ghe Jehova Manman Mhọn Itohan

EBI IẸNLẸN NỌNSẸMHẸN KA DIAYẸ:

Eji ẹbho da zuza bhi agbaẹbho natiọle Montreal, ọle mẹn da wanre. Uki ehan mẹn ha ye ẹghe nin aba mẹn rẹ yu, bhiriọ, inẹn mẹn ọkpa ki ha mun iẹnlẹn ọsi azagba-uwa nọnsẹmhan. Bhi ẹwẹ imọn elẹnlẹn, imẹn hi ọnọn kotọ.

Bhi ẹwẹ ẹbho ne khiẹn ikpikhunmhun ne imhẹn, ne fi ono, ne mhọn izalo, yẹ lu ebe imhẹn, ọle mẹn da wanre. Mẹn ki ha ribhi ikpe igbe, mẹn da munhẹn ha yo uhọnmhọn nin ekhẹn agbilẹ bi ene re igho nin ẹbho mọnmọn. Ọ da wo ha yẹẹ mẹn rẹ ha bha oghoghe yẹ mun ẹbho lu. Ene emhin nan da wo diabe ebale rẹji mẹn.

Mẹn ki ribhi ikpe 14, mẹn da wo manman guẹ ebi a rẹ mun ẹbho lu yẹ. Bhi ọsi ijiẹmhin, mẹn ha dẹ agogo nan re bhi obọ, emhin-obọ, bi ikporuka ne bunbun ne diabe golu, mẹn ki re iyaman ọsi golu ọbhọ, nin ẹbho ha ria ọle ghe golu ọsaje nọn. Mẹn ha ki lu ele fo, mẹn ki dọ ha khiẹn ele bhi ughe bi eji a da nabhi moto bhi eji a da khiẹn emhin. Ọ da wo manman ha yẹẹ mẹn rẹ ha lu ọle, ranmhude uwedẹ nọn lẹkhẹ nọn nin mẹn rẹ ha gbe igho. Ẹghe ọkpa ribhọ nin mẹn rẹ gbe $10,000 bhi ukpẹdẹ ọkpa!

Mẹn ki ha ribhi ikpe 15, a da khu mẹn fia bhi isiku, bhiriọ, mẹn bha yẹ ha mhọn eji mẹn ha da ha nyẹnlẹn. Mẹn da ha wẹ bhi ughe, bi uwa ọsi imọẹ mẹn ne ka re mẹn ọbhi uwa.

Ranmhude uwedẹ nin mẹn rẹ ha mun ẹbho lu, unankpa ki wo ha tie mẹn ẹghe rebhe ha nọọn mẹn ọta. Beji a miẹn ghe, ọ iyi emhin nan do mun mẹn khiẹn, a bha mun mẹn yo ighan. Ọkpakinọn, a da wo ha hian udede oko nin mẹn ranmhude ẹki eku nin mẹn do, bi ranmhude mẹn imhọn ebe nin gọvamẹnt re nin ọria rẹ ha do ẹki. Ranmhude ọria nọn wo bhi udu mẹn khin, mẹn da dọ ha ne ẹbho ne re igho nin ẹbho mọnmọn re igho bhi obọ eria nin ele re igho nan. Ọne iwẹnna nin bha lẹkhẹ. Ẹgheso, mẹn ki re osisi mhọnlẹn rẹ ha gbega egbe. Ẹgheso, mẹn ki ne ẹbho ne mhọn izalo rẹkhan egbe dọ si ẹbho igho.

EBI BAIBO RẸ FI IẸNLẸN NỌNSẸMHẸN DENỌ YẸ:

Ẹghe nin mẹn rẹ ha ribhi ikpe 17, ọle ẹghe ọhẹnhẹn nin mẹn rẹ miẹn Baibo. Mẹn bi ọshọ mẹn ko ha nyẹnlẹn kugbe ẹghe nin ọle rẹ munhẹn deba Esali Jehova ha luẹ Baibo. Ọkpakinọn, uwedẹ nọn khiale nin Baibo yọle nan rẹ ha nyẹnlẹn bha ha yẹẹ mẹn hiehie. Bhiriọ, mẹn da zẹ ọle obọ, dọ ha deba okhuo ọbhebhe nyẹnlẹn. Ọne okhuo mẹn ki ha zẹ bhi ọshọ.

Iẹnlẹn nọnsẹmhẹn da munhẹn ha fidenọ ẹghe nin ọmanmhẹn nọnzi eva nin mẹn deba ha zọshọ rẹ deba Esali Jehova ha luẹ Baibo. Ọle da wo ha fi iẹnlẹn nọnsọle denọ. Uwedẹ nin ọle ki rẹ ha lọ ohu nọnsọle yẹ mhọn iziẹngbe da wo manman ha ti mẹn bhọ. A ki tie mẹn nin mẹn dọ yo ikolo bhi Kindọn Họọ ọsi Esali Jehova, mẹn da rẹkhan ele. Mẹn ki sẹbhi enin, mẹn da kere ghe ẹbho ne mun ekpẹn ọbhi egbe yẹ mhọn ifuẹkẹ, ele ribhi enin. Ele da wo miẹn mẹn ọbhi egbe. Ọ wo dikẹ bhi uwedẹ nan rẹ bẹẹ mẹn wanre! A bha ha re oyẹẹ bi ẹjẹjẹ man mẹn bhi ẹkẹ azagba-uwa nọnsẹmhẹn ẹghe nin mẹn ha ribhi obhokhan. Bhiriọ, mẹn da rẹ ha riale ghe ẹmhọn mẹn bha rẹtẹ ọria soso. Sokpan ọne oyẹẹ nan bi ifuẹkẹ nin mẹn daghe bhi ẹwẹ Esali Jehova, ọle hi emhin nin mẹn mọn da guanọ! Ele ki yọle nin ele ha man mẹn Baibo, mẹn da wo ka nin ele.

Ebi mẹn luẹ bhi Baibo hi ebe hinmhin mẹn. Mẹn rẹ deba ikpea eva mhanmhanlẹn nin mhan ko dọ ra, beji a da miẹn ghe, mẹn ki sabo miẹn igho rẹ ha osa nin mẹn mhọn bhi uru nin mẹn rẹ ha fi ono. Ọne igho gbera $50,000. Mẹn wo ghọnghọn ghe mẹn bha deba ele yo. Ene itue eva nekẹle da tobọ ele dọ ra. Bhiriọ, unankpa da mun ọkpa bhi ẹwẹ ele yẹ gbe ọnọnkẹle a.

Beji mẹn ki rẹ ha luẹ Baibo, mẹn da kere ghe, emhin ne bunbun ribhọ nọn khẹke nin mẹn fidenọ bhi iẹnlẹn nọnsẹmhẹn. Bhi ọsi ijiẹmhin, mẹn luẹle bhi 1 Corinthians 6:10 ghe, “oyi, la ene mhọn ẹlobhọ, edanyọn gbe egbe, la eria ọkhọbhunun, la ene mun ibo ele lu ida nabhi Agbejele nọnsi Osẹnobulua.” Mẹn ki tie ọne ulọnlẹn nin, yẹ daghe ebi emhin ebe kẹkẹ nin mẹn rẹ ha lu khọ sẹ yẹ, mẹn da wo ha viẹ. Ọ da wo khia bhi ẹlo ghe, ọkhẹke nin mẹn fi iẹnlẹn nọnsẹmhẹn denọ sẹsẹsẹ. (Romans 12:2) Mẹn rẹ wo ha fi bhi ẹlo yẹ mhọn okpohu, sẹyẹ iẹnlẹn eku ọkpa mẹn wo ha nyẹnlẹn.

Ọkpaknọn, mẹn da luẹ kere bhi Baibo ghe, Osẹnobulua nọn mhọn itohan, nọn yẹ rẹhunmhan Jehova khin. (Isaiah 1:18) Mẹn da wo manman ha bhii Jehova nin ọle rẹkpa mẹn re zobọ bhi iẹnlẹn nin mẹn ka rẹ ha nyẹnlẹn. Ọle da wo rẹkpa mẹn. Bhiriọ, mẹn da sabọ fẹkẹ ha re obọ sibhi emhin ebe nin mẹn rẹ ka ha lu re. Ọkpa bhi emhin kpataki nin mẹn lu hi, mẹn bi ọshọ mẹn da ko dọ bọ egbe bhi uwedẹ nọn khẹke.

Ikpe 24 mẹn ha ye ẹghe nin mhan rẹ ko bọ egbe. Sẹyẹ, mhan da ha mhọn imọn ea. Ejayenan nian, ọ da khẹke nin mẹn guanọ iwẹnna nọn mhẹn nin mẹn ha lu. Okpakinọn, mẹn bha manman yo isiku, sẹyẹ, mẹn bha sẹ ka lu iwẹnna esili bhi ije soso khẹ. Bhiriọ, mẹn da kie manman ha bhii ji Jehova yẹ dọ ha guanọ iwẹnna. Mẹn da ha taman ẹbho ne re ẹbho bhi isi iwẹnna ghe mẹn guanọ nin mẹn fi iẹnlẹn nọnsẹmhẹn denọ, yẹ ha re ẹkẹ-ata wẹnna. Ẹgheso, mẹn ki taman ele ghe, mẹn luẹ Baibo nin mẹn da sabọ kiẹn ọria esili. Ẹbho ne bunbun ne ha rẹ sabọ re mẹn bhi isi iwẹnna bha ka re mẹn. Ọkike ọle, otuọnkpa nọn re ẹbho bhi isi iwẹnna ki ha nọọn mẹn ọta, mẹn da taman ọlẹn ẹmhọn uwedẹ nin rẹ ka nyẹnlẹn khẹ. Bhiriọ ọle da taman mẹn yọle: “Ọkhọle nọnsẹmhẹn taman mẹn nin mẹn re uwẹ bhi isi iwẹnna, sokpan bha mẹn lẹn ebezẹle.” Mẹn da wo rẹọbhọ ghe ewanniẹn rẹji erọnmhọn nọnsẹmhẹn khọnan. Ọ bha sẹ bue gbe, mẹn bi okhuo mẹn da mianmẹn yẹ kiẹn Esali Jehova.

ELELE NIN MẸN SẸ MIẸN:

Sade ọ iyi adia ne ribhi Baibo bi uwedẹ nọn khẹke nin Kristiẹn rẹ ha nyẹnlẹn, mẹn nyẹnlẹn rẹkhan, mẹn irẹ ha ribhi agbọn ẹlẹnan. Mẹn ki wo mhọn azagba-uwa nin eghọnghọn ye nian, sẹyẹ ọkhọle nọnsẹmhẹn iyẹ gbe mẹn asan, ranmhude mẹn lẹnmhin ghe Jehova rẹhunmhan mẹn.

Ikpe 14 ọ ki ye nian, nin mẹn mọn da lu ilọnmhọn oga ọsi ẹghe rebhe nan rẹ rẹkpa ẹbho rẹ luẹ ẹmhọanta ne ribhi ẹkẹ Baibo. Ọ bha sẹ bue gbe nian nin okhuo mẹn rẹ deba mẹn ha lu ọne iwẹnna oga nan ọsi ẹghe rebhe. Bhi ẹkẹ ikpe 30 ne gbera nian, itue 22 mẹn sẹ rẹkpa dọ ha ga Jehova. Mẹn sẹyẹ wo yo eji a da khiẹn emhin, sokpan, ọ iyi nin mẹn dọ ha mun ẹbho lu beji mẹn rẹ ka lu ọle khẹ. Ejayenan nian, ẹmhọanta nin mẹn rẹọ ọi mẹn ki rẹman ẹbho. Mẹn guanọ nin ele yẹ ha mhọn ọne ikhuaẹloghe rẹ nyẹnlẹn bhi agbọn ọsọgbọn nọn vade, nin ẹbho ne lu eku ida ha ye.—Psalm 37:10, 11