Guẹ Ebarẹ Lu Iwẹnna Itẹmhọn Osẹnobulua Yẹ​—Ha Re Ebe Natiọle “Keep Yourselves in God’s Love” Rẹ Sẹbhi Ọkhọle Nọnsele

EBEZẸLE NỌN DA KHẸKE: Nin ẹbho rẹ sabọ ga iJehova bhi uwedẹ nin ọle guanọ, ọkhẹke nin ele luẹ uhi nesọle yẹ re obọ rẹkhan lẹn. (Isa 2:​3, 4) Ọne ebe natiọle “God’s Love,” ọle ebe ọzeva nin mhan rẹ man ẹbho emhin. Ọne ebe nan miẹnkpa ẹbho nin ele rẹ lẹn ebi ele arẹ re adia ne ribhi Baibo khian yẹ bhi iẹnlẹn. (Heb 5:14) Ọkhẹke nin mhan situa rẹ mhan ele emhin bhi uwedẹ nọn ha rẹ sẹbhi ọkhọle nọnsele. Bhiriọ, ele ki ha mhọn ọhubhudu nin ele rẹ fidenọ.—Ro 6:⁠17.

EBARẸ LUỌLE YẸ:

• Muegbe ọne iluẹmhin bhi otọ nọnsẹn, uwẹ aha mhọnlẹn bhi ọkhọle ebi ọrẹ rẹso ọne uwẹ man lẹn iBaibo yẹ. Mhanmhan inọnta nin uwẹ da nọọn nin uwẹ arẹ lẹn ebe ri ọle bhi ọkhọle bi ebi ọle rẹọ rẹji ebi bha luẹ.—Pr 20:5; be 259

• Noo eba gbẹn bhi ẹkẹ ene ẹkpẹti ne ribhi ọne ebe rẹ rẹkpa ọne uwẹ man lẹn iBaibo rẹ daghe elele ne ribhọ sade a re obọ rẹkhan adia ne ribhi Baibo

• Rẹkpa ọne uwẹ man lẹn iBaibo nọn rẹ ria eria nyan ẹmhọn nin ọria da tobọle re ọkhọle zẹ. Hẹi zẹ nanlẹn.—Ga 6:5

• Re ẹwanlẹn fẹghe si adia eso bhi Baibo nọghọ ọne uwẹ man lẹn iBaibo rẹ rẹkhan. Fẹkẹ ha taman lẹn nin ọle ji oyẹẹ nin ọle mhọn da iJehova rẹkpa le fidenọ.—Pr 27:11; Joh 14:⁠31