Eji Ada Ne Emhin Nan Gbẹn Ọbhi Ebe ọsi Ikolo Unyẹnmhin bi Iwẹnna Oga Nọn Sẹmhan
FEBRUARY 6-12
EMHIN NE GHANLẸN NE RIBHI BAIBO | ISAIAH 47-51
“Elele Ribhọ Sade A Hẹnmhọn Nin Jehova”
ip-2 131 ¶18
Mhan Ene Miẹn Elele bhi Ebi Jehova Man Mhan Le
“Re Ehọ bhi Uhi Nesẹmhẹn!”
18 Bhi ahu ẹlinmhin nọn khiale, ọne ohẹn akhasẹ da yọle: ‘Jehova Nin Ebealẹn mhan bi ẹlinmhin nọnsọle je mhẹn. Inian Jehova tale, Ọnọn Dẹ Bha sibhi Oya re, ọnọn khiale nọnsi Izrẹl: ‘Imhẹn nin Jehova, imhẹn Osẹnobulua bha, Ọnọn man bha emhin nin bha da miẹn elele, ọnọn mhan bha odẹ nin bha ha rẹkhan.” (Isaiah 48:16b, 17) Ọkhẹke nin ene ọta nesi Jehova nan rẹkpa ibhokhan Izrẹl yere ghe Osẹnobulua dẹ miẹn ele fan bhi obọ iBabylon. Ọle ọnọn dẹ ele sibhi oya re. (Isaiah 54:5) Emhin nọn ri Jehova bhi ọkhọle hi, nin ibhokhan Izrẹl fikie bu ọle re, nin ele re ehọ bhi uhi nesọle. Nanrẹ sabọ ga oga ẹmhọn-ata, ọkhẹke na ha re obọ rẹkhan uhi nesi Jehova. Ibhokhan Izrẹl ida sabọ lẹn uwedẹ nọn khẹke nin ele ha rẹkhan sokpan a man ele ọne uwedẹ.
ip-2 131 ¶19
Mhan Ene Miẹn Elele bhi Ebi Jehova Man Mhan Le
19 Ghe ebi Jehova ta nọn rẹman ghe ọle iguanọ nin ibhokhan lẹn de ọbhi oya, ghe ọle guanọ nin ele ha sọnyẹnmhẹn bhi iẹnlẹn: ‘Eo bha ha gene re ehọ bhi uhi nesẹmhẹn! Ọfure nọnsẹbha ki diabi ọsi ẹdẹ, ikhiale nọnsẹbha bii ọsi amẹn nọn fi yo fi re bhi okpẹdẹ.’ (Isaiah 48:18) Ọta nọn mhẹn gene khọnan, nọn nanbhi unun Aman nọn kokhun nẹ vae! (Deuteronomy 5:29; Psalm 81:13) Ibhokhan Izrẹl dẹ sabọ ha mhọn ọfure nọn kpọ a bii ọsi ẹdẹ nọn ikamẹn. (Psalm 119:165) Emhin ne khiale nin ele lu ki bunbun bii amẹn nọn fi yo fi re bhi okpẹdẹ. (Amos 5:24) Ranmhude Jehova manman hoẹmhọn ele, ọ da ha re oyẹẹ rẹ man ele uwedẹ nin ele ha rẹkhan. Ọ ha rẹ mhẹn gbe sade ele gene ka ọle ehọ!
ip-2 132 ¶20-21
Mhan Ene Miẹn Elele Bhi Ebi Jehova Man Mhan Le
20 Ibhokhan Izrẹl ha fidenọ, elele bela ele ha miẹn bhọ? Jehova da yọle: ‘Imọn nesẹbha ki bunbun bii ekẹn, eyẹ bi ihiẹnhiẹn nesẹbha ki vuọn ije rebhe. Imhẹn ida ye elin nọnsi ọsoso a la gbo ọle sibhi ọkhọle mhẹn re.’ (Isaiah 48:19) Jehova da rẹkpa Ibhokhan Izrẹl yere ive nin ọle ve nin Abraham ghe imọn nesọle dẹ bunbun bii ‘ahiẹnhiẹn ne ribhi okhun bi ekẹn ne ribhi egbegbe ẹdẹ.’ (Genesis 22:17; 32:12) Ọkpakinọn, ene imọn nesi Abraham nan da sọtẹ da iJehova, bhiriọ, elele ọsi ọne ive nan bha yẹ khẹke ele. Bhọsi ẹmhọn-ata, beji emhin ọbe gba ele obọ sẹ, ọkhẹke na gia agbaẹbho nọnsele kua beji uhi nọnsi Jehova tale. (Deuteronomy 28:45) Ọrẹyiriọ, Jehova bha ha guanọ nin ọle gia ibhokhan lẹn kua, Ọle bha yẹ ho nin ọle fi ikeke gbe ele sẹsẹsẹ.
21 Adia ne ribhi ẹkẹ ọne uhọnmhọn-uje nan yẹ rẹso ene ga iJehova ẹlẹnan. Jehova re iẹnlẹn mhan. Ọle la sabọ tare uwedẹ nọn mhẹn nẹ nin mhan ha rẹ sabọ nyẹn iẹnlẹn nọnsẹmhan. (Psalm 36:9) Ọle re adia mhan nin ọle rẹ dia mhan ọbhi odẹ nin mhan ha da miẹn elele, ọiyi nin ọle rẹ mun mhan diẹn. Ene ga bhi uwedẹ ẹmhọn-ata gene guanọ nin Jehova ha man ele emhin. (Micah 4:2) Ibhude nesọle gbega oga nọnsẹmhan bi ikolu nin mhan bi Jehova ko mhọnlẹn. Ọne ibhude yẹ gbega mhan nin mhan hẹi de bhi ufi ne Esu kiẹn khẹ mhan. Mhan ha lẹn otọ uhi nesi Osẹnobulua, mhan ki dọ daghe ghe, Jehova man mhan le nọn mhẹn nin mhan. Mhan ki dọ kere ghe ‘uhi nesọle i khua.’ Ai da yẹ fuẹn mhan an.—1 John 2:17; 5:3.
Guanọ Emhin Oriọn ne Ghanlẹn
w07 1/15 9 ¶8
Emhin Eso Nan Miẹn Tie bhi Ebe ọsi Isaiah—II
49:6otọ Izrẹl ọkpa Mezaya da tẹmhọn Osẹnobulua, bebhọ ọle ki rẹ ha yi ‘ẹfua rẹji agbaẹbho rebhe’ yẹ? Ọnan sabọ ha yi iriọ ranmhude ebe sunu ẹghe nin Jesu rẹ yu fo. Baibo da rẹman ghe Isaiah 49:6 rẹso edibo nesọle. (Acts 13:46, 47) Ẹlẹnan nian, enazẹle bi usun ne bunbun nele ko ga, ele hi ‘ẹfua rẹji agbaẹbho rebhe.’ Ele re ẹfua nin ẹbho ‘rẹsẹbhi eje rele nẹ bhi ọne okokhun agbọn nan.’—Matthew 24:14; 28:19, 20.
it-1 643 ¶4-5
Isọ-ebea
Iso-ebea Nan Rẹ Khọkhọ Emhin. Baibo re ibọdọ bi ireokhuo rẹ mun akhọkhọ. (Isa 54:1, 5, 6; 62:1-6) A yẹ re isọ-ebea la nan rẹ khui okhuo fia bhi isi ọdọ rẹ mun akhọkhọ.—Jer 3:8.
Ukpe 607 Jesu kuẹ vae, ọle a rẹ gbe Judah bi Jerusalem sotọ. A da mun ene nyẹn bhi enin diọ bhi ighan bhi Babylon. Ikpe ne bunbun a kuẹ mun ele a khian ighan, Jehova da kha akhasẹ rẹji ene iJiu yọle: ‘Ebe nan rẹ khu inẹn bha bhi isi ọdọ ki bho, inẹn bha nin mhẹn khu fia?’ (Isa 50:1) Ranmhude igbobọ ra uhi nọnsi ibhokhan Izrẹl, ọle zẹ nin Jehova da khu ‘Inẹn’ ele la agbaẹbho nọnsele fia. Ọi yi ghe Jehova gheghe guanọ nin ọle sọ ebea. Ene kẹrẹ bhi ibhokhan Izrẹl da fidenọ yẹ nan erọnmhọn ji Jehova nọn kie re agbaẹbho nọnsele rẹ kiẹn okhuo nọnsọle. Ikpe 70 ki gbera, bhi ukpe 537 ọkuẹsẹ iJesu vae, Jehova da fan ele fia bhi ighan ranmhude elin nọnsọle nin ele da ha khian otọ nọnsele beji ọle rẹ ve ive nele.—Ps 137:1-9.
FEBRUARY 13-19
EMHIN NE GHANLẸN NE RIBHI BAIBO | ISAIAH 52-57
“Jesu Da Loya Ranmhude Mhan”
w09 1/15 26 ¶3-5
Odibo Nọnsi Jehova—‘A Da Gbọlea Ranmhude Olukhọ Nọnsẹmhan’
A Da ‘He Ọle’ Yẹ ‘Re Ẹlo Gbọlea’
3 Tie Isaiah 53:3. Re ọkhọle ẹ riale ebi ọ dia ukpọmọn ọkpa nọnsi Osẹnobulua yẹ, nin ọle rẹ sibhi eji ọle da ha re eghọnghọn ga Osẹnobulua bhi okhun re, vae bhi ọne otọ nan nin ọle dọ re iẹnlẹn nọnsọle rẹ zọese nin eria da sabọ miẹnfan bhi obọ uu bi olukhọ. (Phil. 2:5-8) Izọese nọnsọle zẹle nin Osẹnobulua ha da gene rẹhunmhan olukhọ nọnsẹmhan. Elanmhẹn nin ibhokhan Izrẹl ha zọ da rẹman ebi Jesu da rẹ re iẹnlẹn nọnsọle zọese yẹ. (Heb. 10:1-4) Ọbha be rẹ khẹke nin ẹbho miẹn ọlẹn ọbhi egbe, manman nọn ene iJiu ne ha khẹ Mezaya nan vi ive ọle? (John 6:14) Ele bha lu iriọ. Ene iJiu da ‘he’ iJesu yẹ ‘re ẹlo gbọlea’ beji akhasẹ nọnsi Isaiah ka ta. John nin Odibo da gbẹn ghe: ‘Ẹghe nin ọle rẹ sẹ bhi ẹbho nọnsọle, ene ẹbho bha ka miẹn ọlẹn ọbhi egbe.’ (John 1:11) Peter nin Odibo da taman ene iJiu: ‘Osẹnobulua ọsi aba mhan ne khua . . . re uyi nin Jesu nin Odibo nọnsọle, nin bha hele bhi odalo iPilate ẹghe nin ọle rẹ yọle ọle ho nin ọle fan lẹn fia. Ehe, bha da he ọnọn khiale nọn bha lu ọbe soso.’—Acts 3:13, 14.
4 Isaiah yẹ kha akhasẹ ghe Jesu dẹ ‘deba emianmhẹn mhọn ikolu.’ Arẹmiẹn ẹghe nin ọle rẹ ha ribhi ọne otọ nan egbe lọlọ iJesu, a bha gbẹn ọlẹn ghe ọle khọmhọnmhin. (John 4:6) Ọkpakinọn, emianmhẹn ọsi ene ha ka ọle ehọ wo ha ba ọle bhi egbe. Ọ da tohan ele yẹ mun ele egbe daan. (Mark 1:32-34) Bhiriọ, Jesu da mun ọne akhasẹ nan sẹ nọn yọle: ‘Bhọsi ẹmhọn-ata, ọle da tobọle mun emianmhẹn nọnsẹmhan, ọle da yẹ miẹn mhan ọbalọ nọnsẹmhan.’—Isa. 53:4a; Matt. 8:16, 17.
Bii Ọria ‘Nin Osẹnobulua Fi Ọle Unun’
5 Tie Isaiah 53:4b. Ẹbho ne bunbun nin Jesu deba ha nyẹnlẹn bha lẹn ebezẹle nin Jesu da le oya yẹ yu. Ele da ha riale ghe Osẹnobulua re oya nanlẹn, ghe ọ re emianmhẹn ọbe fi ọle unun. (Matt. 27:38-44) Ibhokhan iJiu da yọle ghe Jesu i muekpẹn nin Osẹnobulua. (Mark 14:61-64; John 10:33) Bhọsi ẹmhọn-ata, Jesu iyi ọria olukhọ la ọnọn i muekpẹn nin Osẹnobulua. Ranmhude ọle manman hoẹmhọn Aba le, ọ wo manman ba ọle bhi egbe a ghe, a ho nan gbe ọle a ranmhude orẹsin ghe ọle i mun ekpẹn nin aba le. Ọreyiriọ, ọle wo muegbe nin ọle rẹ lu iho nọnsi aba le.—Matt. 26:39.
w09 1/15 27 ¶10
Odibo Nọnsi Jehova—‘A Da Gbọlea Ranmhude Olukhọ Nọnsẹmhan’
“A Da Mun Ọlẹn Bii Ohuan Nan Khian Dọ Da Le Aranlẹn”
10 Tie Isaiah 53:7, 8. Eghe nin John nọn gbe ẹbho ruẹ bhi amẹn re daghe Jesu vade, ọ da so dagbare yọle: ‘Ghe ọle gha, ohuan nọnsi Osenobulua nọn kpe olukhọ sibhi ọne agbọn nan re!’ (John 1:29) Bezele nin John da tie Jesu ohuan? Aimiẹn ebi John ha mhọn bhi okhọle hi ọta nọnsi Isaiah nọn yọle: ‘A da mun ọlẹn bii ohuan nan khian dọ da le aranlẹn.’ (Isa. 53:7, ftn.) Isaiah yẹ kha akhasẹ yọle ‘ọ da zẹ egbe obọ nin uu’. (Isa. 53:12) Ukpasọn nin Jesu mun ayere ọsi uyumhin nọnsọle gbọ, ọ da si ayọn bhi uko-akhe mun nin ituegbe 11 nọnsọle yẹ taman ele: ‘Ọnan mudian nin ‘aranlẹn akovẹn nọnsẹmhẹn’, nan ha gbekua nin ene bunbun, nele da sabọ miẹn umiẹnfan.’—Matt. 26:28.
w09 1/15 28 ¶13
Odibo Nọnsi Jehova—‘A Da Gbọlea Ranmhude Olukhọ Nọnsẹmhan’
Ọne Odibo da Rẹkpa ‘Ene Bunbun Kiẹn Ene Khiale’
13 Tie Isaiah 53:11, 12. Reji odibo nọnsọle, Jehova da yọle: ‘Odibo nọnsẹmhẹn nọn khiale dẹ rẹkpa ene bunbun kiẹn ene khiale.’ Uwedẹ nela ọle ha rẹ lu ọnan? Ebi a gbẹn rẹ kpẹn ulọnlẹn 12 tale man mhan. Ọ yọle: ‘Ọle (ọne Odibo) da bhii nin ene lu khọlọ.’ Imọn nin Adamu biẹ rebhe ‘lu khọlọ’ rahmude ẹkẹ olukhọ a da bie ele rebhe. Bhiriọ, uu nọn yi ‘ebi olukhọ si re’ da sẹ ele bhi egbe. (Rom. 5:12; 6:23) Ọkhẹke nan guanọ uwedẹ nin eria ne lu khọlọ bi Osẹnobulua arẹ kie ha yi imọẹ yẹ. Uhọnmhọnlẹn 53 bhi akhasẹ ọsi Isaiah taman mhan ebi Jesu rẹ ‘bhii’ nin mhan nin eria olukhọ yẹ. Ọyọle: ‘Ugbemhin nan ha rẹ gbe mhan nin mhan da sabọ miẹn ọfure, ọle aki gbe ọbhọ. Ranmhude ikuan-egbe nin ọle miẹn, mhan da sabọ nin.’—Isa. 53:5.
Guanọ Emhin Oriọn ne Ghanlẹn
w06 3/15 11 ¶2
“Arẹman Nan Re Khọkhọ Emhin” Nọn Rẹtẹ Mhan
Hela ‘ọne okhuo nọn mhọn isẹhoa’ natiọle Sarah bi ọmọn nọnsọle nantiọle Isaac mudian nan? Paul rẹman ghe Sarah nọn yi ‘agan’ mudian nin aamhẹn nọnsi Osẹnobulua. Ọne aamhẹn hi agbotu ọsi Osenobulua bhi okhun. Ọne okhuo nan nọn mudian nin agbotu ọsi Osẹobulua bhi okhun ha yi agan ranmhude, ọkuẹsẹ Jesu vae, ọle bha ha mhọn ‘imọn’ soso nan re ahu elinmhin zẹ bhi ọne otọ nan. (Galatians 4:27; Isaiah 54:1-6) Bhi iluemhin Pentecost bhi ukpe 33, Osẹnobulua da re ahu elinmhin nọn khiale re ze ikpea bi ikhuo. Bhiriọ, ele da kiẹn imọn nan kikie biẹ ọsi ọne okhuo. Ene imọn nan nin agbotu Osẹnobulua bhi ukhun biẹ, da ha yi ene Osẹnobulua rẹ kiẹn imọn nesọle ne ha deba Jesu ha gbẹloghe ranmhude akovẹn osogbọn nin ele ko ve. (Romans 8:15-17) Paul nin odibo nọn ha yi ọkpa bhi ene imọn nan da yọle: ‘IJerusalem nọn ribhi okhun mhọn isẹhoa, ọle inẹn mhan.’—Galatians 4:26.
w05 10/15 26 ¶3
Ha Mhọn Idegbere Ọsaje
Ijiẹmhin Ọsi Idegbere Nọn Kpọnọ Nẹ
3 Arẹmiẹn iJehova kokhun nẹ bhi otọ bi okhun rebhe, ‘ẹlo nọnsọle sẹyẹ fẹ ọne otọ nan rebhe ghe, beji ada miẹn ọle ki sabọ re ahu nọnsọle man bhi egbe ene re ọkhọle rebhe rẹ ga le.’ (2 Chronicles 16:9) Bebhọ Jehova ki lu yẹ sade ọle miẹn ene ga le nin ahu fo ele bhọ ranmhude edọnmhẹn nin ele miẹn bhi egbe? Ọle ki ‘deba ele dia.’ Ahu ẹlinmhin nọn khiale ọle rẹ nin ele dia ‘nin ọle da tuẹn ene imioguele okhun yẹ tuẹn ọkhọle ọsi ene ahu fo ele bhọ.’ (Isaiah 57:15) Ene ga le nin ọle re ahu nan ki sabọ kie ha mhọn ahu rẹ ha re eghọnghọn ga le nọnsẹn. Idegbere wo khọnan nin Osenobulua rẹman!
FEBRUARY 20-26
EMHIN NE GHANLẸN NE RIBHI BAIBO | ISAIAH 58-62
“Tẹmhọn Ukpe Nin Jehova Re Ọbhọ Nọn Rẹ Miẹn Ẹbho Ọbhi Egbe”
ip-2 322 ¶4
Ikhiale Jẹre bhi Zion
“Ukpe Nin Jehova Re Ọbhọ Nọn Rẹ Miẹn Ẹbho Ọbhi Egbe”
4 Isaiah yọle: ‘Ahu ẹlinmhin nọnsi Jehova ne mhẹn dia, ranmhude ọle zẹ mhẹn nin rẹ tẹmhọn iẹnlẹn esili man ene imioguele. Ọle je mhẹn nin dọ tẹmhọn imiẹnfan man enan munọn bi itaan ẹloloa ji ene ruẹlo.’ (Isaiah 61:1) Họbhọ ọne a zẹle nọn dọ tẹmhọn iẹnlẹn esili? Aimiẹn Isaiah ka nọn, ranmhude Osẹnobulua ji ọle nọn tẹmhọn iẹnlẹn esili man ene a mun khue bhi Babylon. Ọkpakinọn, Jesu rẹman ghe ukegbe sọle ọ da mun sẹ nẹ, ẹghe nin ọle rẹ yọle ọta ọsi Isaiah mun sẹ bhi ukegbe sọle. (Luke 4:16-21) Bhọsi ẹmhọn-ata, Osẹnobulua ji Jesu nọn dọ tẹmhọn iẹnlẹn esili man ene imioguele. Ranmhude ọnan, Osẹnobulua da re ahu ẹlinmhin nọn khiale rẹ ze ọle eghe nọn rẹ gbegberuẹ bhi amẹn.—Matthew 3:16, 17.
ip-2 326-327 ¶13-15
Ikhiale Jẹre bhi Zion
13 Rẹ nin ukpe Pentecost 33 avade, Osẹnobulua da kọ ‘eran ne kpọnọ ne khiale’—Enazẹle ne mhọn izebhudu—bhi ẹkẹ agbaẹbho ọsọgbọn nọnsọle. Ọne agbaẹbho nan hi ‘Izrẹl nọnsi Osẹnobulua.’ (Galatians 6:16) Rẹ nin ẹghe nin avade, ene ‘eran’ nan da ha yi itue 144,000. Ele min ikpẹ ne khiale ne rẹ re uyi ji Osẹnobulua nin Jehova. (Revelation 14:3) Nanbhi ukpe 1919 nin Jehova rẹ rẹkpa ene kẹre bhi ibhokhan Izrẹl nọnsi Osẹnobulua rẹ ha ga nọnsẹn, ene ‘eran’ da wo ha tuẹn okhun. Amẹn oriọn nin Jehova sa nin ene ẹbho nan, ọle iJehova rẹ rẹkpa ele rẹ diabi ẹgbo nọn mhọn eran ne min ikpẹ.—Isaiah 27:6.
14 Rẹji iwẹnna nin ene ‘eran’ nan ha lu, Isaiah da yọle: ‘Eje mọn wo dunmhun an, ele dẹ kikie bọn lẹn; ele dẹ yẹ bọn eje a fuẹan bhi ẹghe nọn gbera. Otọ-ẹbho kikẹ nan dunmhun an bhi ẹghe ẹdẹlẹ, ele dẹ re ele kiẹn ọsọgbọn.’ (Isaiah 61:4) Ranmhude uhi nin Ojie ọsi Persia natiọle Cyrus gbele, ibhokhan iJiu da sabọ sibhi Babylon re ha khian iJerusalem, nin ele dọ kikie bọn lẹn bi uwa oga nọn ribhọ, arẹmiẹn ọki reemhin nan dunmhun ele a. Bhi ene ikpe ne rẹkhan ukpe 33 bi 1919, a da yẹ hẹnhẹn emhin ọn bhi oga nọnsi Jehova.
15 Bhi ukpe 33, edibo nesi Jesu da wo ha lu akhie ranmhude oya nin Jesu le bi uyumhin nọnsọle. (Matthew 26:31) Nin ọle ki rẹ riọ bhi idin bu ele, ele da ha ghọnghọn. Nin ele ki rẹ miẹn ahu elinmhin nọn khiale ọbhi egbe, ele da wo manman ha lu iwẹnna itẹmhọn Osẹnobulua ‘nanbhi Jerusalem, Judea bi Samaria rebhe rẹsẹbhi otọ agbọn rebhe.’ (Acts 1:8) Bhiriọ, ele da kie mun oga ọsi ẹmhọn-ata gbọ. Rẹ nin ukpe 1919 avade, iriọ iJesu yẹ rẹ ji ene kẹre bhi enazẹle da kikie bọn ‘otọẹbho kikẹ nan dunmhun an bhi ẹghe ẹdẹlẹ.’ Rẹ nin ẹkẹ ikpe ne bunbun, ene kalo bhi otuẹ bha yẹ ha man ẹbho ilẹnmhin nọnsi Jehova. Ebi a kere ẹbho lu bi ọta nọnsi ẹbho ne bha diẹn mun iBaibo ele ki ha man ẹbho le. Nin oga ẹmhọn-ata da sabọ mundia nọnsẹn yẹ ha lu re alo, ene Kristian nan zẹle da ne emhin rebhe ne diẹn mun oga ohoghe sibhi agbotu re. Ele da munhẹn manman ha lu iwẹnna itẹmhọn Osẹnobulua bhi uwedẹ nan bha sẹ ka rẹ lu ọle khẹ.—Mark 13:10.
w12 12/15 25 ¶5-6
‘Ene Erunmhunyẹn’ Kugbe Ha Ga Oga Ẹmhọn-ata
5 Ọria sabọ rẹ so unun bhi ebi a gbẹn bhi Isaiah uhọnmhọnlẹn 61 nọn tẹmhọn akhasẹ ne munsẹ bhi agbotu ọsi Kristiẹn. Ulọnlẹn 6 nọn ribhọ da tẹmhọn ẹbho ne ha yi ‘ohẹn nesi Jehova.’ Ulọnlẹn 5 da yẹ tẹmhọn ene ‘erunmhunyẹn’ ne re iyobọ nin ene ‘ohẹn’ yẹ wẹnna rẹkhan ele. Be a re ọnan ta?
6 Ene ‘ohẹn nesi Jehova’ hi ene Kristiẹn nan zẹle ne da deba usun ẹbho nan da ‘ka riọ kpanọn bhi uu.’ Ene ẹbho nan ‘dẹ ha yi ene ohẹn ọsi Osẹnobulua bi Jesu ne ha deba Jesu gbẹloghe bhi ukpe uli.’ (Rev. 20:6) Yẹ deba ọnin, ẹbho ne bunbun ne ga nọnsẹn dẹ nyẹn bhi otọ ọfubhegbe. Ene ẹbho nan re idegbere rẹ wẹnna rẹkhan ene da deba iJesu gbẹloghe bhi okhun. Ele a khọkhọ bii erunmhunyẹn. Ele yẹ re iyobọ nin ene ‘ohẹn nesi Jehova’ ranmhude ele re eghọnghọn rẹ wẹnna bii ‘emun-ugbo’ bi ‘ene gbẹloghe emhin ekọnọn’ rẹkhan ele. Ọne iwẹnna nan ẹbho ne da nyẹn bhi ọne otọ nan rẹ gẹn iJehova, ọle ele yẹ rẹ rẹkpa ẹbho rẹ dọ lẹn iJehova. Enazẹle bi ‘ene ihuan nekẹle’ kugbe rẹkpa ẹbho ne ho nin ele ga Osẹnobulua rẹsẹbhi ighegheghe.—John 10:16.
w15 7/15 9-10 ¶14-17
Wẹnna rẹ Tuẹn Ọfubhegbe Ọsi Oriọn Okhun
14 Bhi ikpe ne gbera, ene ki sẹ wanre bhi ẹwẹ mhan ki sẹlo ọbhi emhin ne bunbun nan sẹ fidenọ bhi ẹkẹ agbotu nọnsi Jehova nọn ribhi otọ. Ene ifidenọ nan ri ọne agbotu tuẹn okhun. Ele yere ẹghe nan rẹ miẹn ghe otuọnkpa ha sun agbotu, ejayenan nian, usun ene ewanlẹn ki sun agbotu. Eghe nin yẹ, otuọnkpa ha sun iwenna oga nan lu bhi Bẹtẹ, ejayenan nian, ene Sun iBẹtẹ mhọn obọ bhọ. Sẹyẹ, ẹghe nin, otuọkpa nan ha tiọle prẹsidẹnt ọsi Watch Tower Society ha re adia re. Ẹghenan nian, Otu Ne Sun Oga ki re adia re. Arẹmiẹn ene ẹbho nan ha mhọn ene ha rẹkpa ele, otuọkpa ha mhọn obọ bhi ebi a da rẹ lu emhin yẹ bhi agbotu, Bẹtẹl bi Bẹtẹl nọn kokhun nẹ. Eghe 1970, a da mhanmhan lẹn nan da miẹn ọi yẹ yi otuọkpa da ha mun ihe nanrẹ gbẹloghe agbotu mhọn.
15 Elele nanbhi ene fidenọ nan vae? Ehe. Bezele? Ranmhude, ijiẹmhin ne ribhi Baibo nin mhan ki dọ manman lẹn otọle zẹle nin mhan da fidenọ. Nanrẹ miẹn ghe otuọkpa ki ta re ebarẹ re emhin khian yẹ, agbotu da dọ ha miẹn elele nọn khua ranmhude ‘ene ikpea nanrẹ lu ẹsele’ ki ku obọ kugbe.—Eph. 4:8; Prov. 24:6.
16 Sẹyẹ ria ẹmhọn ifidenọ nan lu eghe nọn bha ree gbe. Ifidenọ bii; ebe nesẹmhan kie mhọn ose, eba gbẹn bhọ iyẹ bun gbe, bi uwede ikikẹ aki rẹ ne ele nin ẹbho. Ọ manman ti mhan bhọ nin mhan rẹ ne ebe ne mhọn ose nin ẹbho nọn ha sabọ rẹkpa ele. Mhan ha noo uwedẹ ogbọn nin azemhinre zẹ re rẹ gha ẹmhọn-ata nega, uwedẹ bii nanrẹ noo jw.org, iriọ mhan ha rẹ rẹman ghe ebe ri Jehova bhi ọkhọle yẹ ri mhan bhi ọkhọle. Ebe ri Jehova bhi ọkhọle hi nin ọle re adia nọn khẹke ẹbho nele.
17 Ifidenọ bhi ikolo oga nọn re ẹghe mhan re ha lu Oga Azagba-uwa nọnsẹmhan la iluẹmhin Baibo nọnsẹmhan, emhin ewanlẹn manman nọn. Utuẹn-okhun nọn ki dọ ha ribhi emhanmhan ọsi usikoko ọsi ukpẹdẹ ọkpa bi usikoko nọn nẹ gene wo ti mhan bhọ. Ukpe-ukpe ọ rẹ mhẹn ọbhọ! Eba ki luẹ bhi isikulu oga kẹkẹ nesẹmhan wo ti mhan bhọ. Mhan ki dọ kere ghe Jehova re obọ bhi ene emhanmhan nan rebhe. Khere khere ọle rẹ re agbotu nọnsọle mhọn ose ọbhọ.
w07 1/15 11 ¶5
Emhin Eso Nan Miẹn Tie bhi Ebe ọsi Isaiah—II
Ewaniẹn Rẹji Inọnta Ne Ribhi Baibo:
61:8, 9—Bebhọ ọne ‘akovẹn ọsi ighegheghe’? Hebhọ ene ‘imọn’? Ọne ‘akovẹn ọsi ighegheghe’ hi akovẹn ọsogbọn nin Jehova bi enazẹle ko ve. Ene ‘imọn’ hi ene ‘ihuan nekẹle’—ẹbho ne bunbun ne ka enazẹle ehọ.—John 10:16.
FEBRUARY 27–MARCH 5
EMHIN NE GHANLẸN NE RIBHI BAIBO | ISAIAH 63-66
“Okhun Ọgbọn bi Otọ Ọgbọn Dẹ Re Eghọnghọn Nọn Khua Re”
ip-2 383 ¶23
“Wo Ha Ghọnghọn Ranmhude Ebi Mhẹn Man”
Ebe nọnsi Revelation tẹmhọn imianlo nin John miẹn, nin Jehova rẹ rẹman lẹn ebi ukpẹdẹ nọnsọle ha rẹ vae yẹ, ẹghe nin ọne agbọn nan ha rẹ fuẹan. Ọnin ha ki fo, a ki mun Esu khue. (Revelation 19:11–20:3) Ọ ki tẹmhọn ọne imianlo fo, John da sunu bhi ebi Isaiah ta yọle: ‘Mhẹn da daghe okhun ọsọgbọn bi otọ ọsọgbọn.’ Ebi ọle gbẹn rẹkhan ọne ulọnlẹn nan da tẹmhọn ọne ẹghe nin Osẹnobulua ha rẹ dọ fi emhin rebhe denọ bhi ọne agbọn nan, ne da dia nọnsẹn. (Revelation 21:1, 3-5) Gene gene, ẹmhọn ‘okhun ọsọgbọn bi otọ ọsọgbọn’ nin Isaiah tẹmhọn lẹn dẹ munsẹ bhi agbọn ọsọgbọn nin Osẹnobulua mun vade. Ẹghe ugbẹloghe ọsọgbọn nọn da nin okhun vae, ẹbho ne da ha nyẹnlẹn bhi ọne otọ nan ẹghe nin dẹ nyẹn bhi ọfubhegbe ọsi ejẹjeje bi ọsi oriọn. Ive nọn manman tii mhan bhọ hi ‘emhin nan ka miẹn khẹ [emianmhẹn, iloya bi ọbalọ kẹkẹ nesẹmhan], a iyẹ da ha ye ele re la re ọkhọle ria ẹmhọn ele.’ Emhin nin mhan da ha yere ẹghe nin iyẹ da ha re mhan lu akhiẹ beji ọ rẹ sunu ji ẹbho nebunbun ẹlẹnan.
ip-2 384 ¶25
“Wo Ha Ghọnghọn Ranmhude Ebi Mhẹn Man”
25 Ẹlẹnan nian, Jehova yẹ re iJerusalem kiẹn ‘ebe si eghọnghọn re.’ Be ọle rẹ lu ọle yẹ? Beji mhan sẹ luẹ kere, itue 144,000 dẹ deba gbẹloghe bhi okhun ọsọgbọn nan mun gbọ bhi 1914. Ele akhasẹ tie ele ‘iJerusalem Ọsọgbọn.’ (Revelation 21:2) Ẹmhọn iJerusalem Ọsọgbọn Osẹnobulua ha tẹmhọnlẹn nin ọle rẹ yọle: ‘Ejayenan nian, mhẹn mun iJerusalem gbọ nọn ha si eghọnghọn re bi ẹbho nesọle nọn ha re ọrebhe ha sọnyẹnmhẹn.’ Osẹnobulua dẹ noo iJerusalem Ọsọgbọn rẹ nan erọnmhọn nin ẹbho ne gale. Aiyẹ da ha họn ẹmhọn eviẹ, ranmhude Jehova re ‘ebi [mhan] guanọ nin mhan.’—Psalm 37:3, 4.
w12 9/15 9 ¶4-5
Ọfure bhi Ikpe Uli—Yẹ Rẹ Sẹbhi Ighegheghe!
‘ELE DẸ BỌN UWA YẸ MUN UGBO’
4 Họbho i guanọ nin ọle ha mhọn uwa nọnsọle, eji egbe ada fẹkẹ fu ọle bi awagba-uwa nọnsọle re? Bhi ọne agbọn nan ẹlẹnan, ẹbho nebunbun i mhọn uwa esili nin ele ada ha nyẹnlẹn. Eso ribhi agbaẹbho nin ẹbho nebunbun da kẹnkẹn egbe ọbhi ẹkẹ uwa ọkpa. Eso ki gheghe bọn emhin nọn diabi ougbo nin ele bhọ zewẹ miẹn eji ele ha da re uhọnmhọn nẹko. Ele i ghọle bii emhin nọn ha fo ele nin ele rẹ sabọ ha mhọn uwa nọnsele.
5 Agbejele nọnsi Osẹnobulua a ki ha gbẹloghe, ọrebhe dẹ sabọ ha mhọn uwa nọnsọle. Iriọ Isaiah nin ohẹn akhasẹ tale nọn rẹ yọle: ‘Ele dẹ bọn uwa yẹ de bhọ a; ele dẹ mun ugbo yẹ le ebe ele kọ bhọ.’ (Isa. 65:21) Ọiyi nanrẹ gheghe a mhọn uwa nọnsele ọkpa, ranmhude ene bunbun ẹlẹnan mhọn uwa ne khua nesele. Ọrẹyiriọ, udu bha fu ene ẹbho nan re, ranmhude emhin sabọ sunu ji ene uwa. Ele sabọ rẹ do ọbhi osa nọn ha re ele rẹ ẹlo miẹn ọne uwa a, oyi sabọ rẹ dọ ra bhọ la emhin ne khọ nẹ enan sabọ rẹ sunu ji ene uwa. Ene emhin nan rebhe dẹ fidenọ bhi ẹkẹ ugbẹloghe nọnsi Osẹnobulua. Micah nin ohẹn akhasẹ da yọle: ‘Ọdeọde ki dotoa bhi ẹlẹ eran nọnsele kẹkẹ. Ọria soso ida ri udu a wa ele.’—Mic. 4:4.
w07 1/15 11 ¶6
Emhin Eso Nan Miẹn Tie bhi Ebe ọsi Isaiah—II
63:5—Be ohu nọnsi Osẹnobulua rẹ rẹkpa ọle yẹ? Osẹnobulua igheghe re ohu. Ohu nin ọle rẹ hẹnhẹn emhin ọn nọn. Ọne ohu nan rẹkpa le ranmhude ọnan re ọle mun ibhohiẹn nọn gbale nọnsọle sẹ.
w13 6/15 25 ¶3-5
Ha ji Ibhude Nesi Jehova Dia Ẹ
AHU NIN ỌNỌN MAN EMHIN MHỌN DA EBI ỌLE MAN
3 Ghe ijiẹmhin nin Isaiah rẹ rẹman ghe Jehova mhọn ahu gbera ọrebhe bi agbaẹbho rebhe. Isaiah 64:8 yọle: ‘Eo Jehova, uwẹ aba mhan. Mhan ọne ekẹn, uwẹ ọnọn man mhan; iwenna obọ nọnsẹ mhan rebhe khin.’ Ọria nọn man emhin mhọn ọne ahu nin ọle rẹ man ekẹn kiẹn ebe irẹ ha re ọle bhi ọkhọle. Ọne ekẹn imhọn unun nin ọle ha rẹ talọ bhọ. Iriọ ọyẹ khin rẹji mhan nin eria bi Osẹnobulua. Beji ekẹn irẹ mhọn unun nin ọle ha rẹ nin ọnọn man emhin gbugan, iriọ mhan ida rẹ sabọ nin Osẹnobulua gbugan.—Tie Jeremiah 18:1-6.
4 Jehova da rẹman ghe ọle mhọn ahu bhi egbe ibhokhan Izrẹl nin ẹdẹlẹ beji ọnọn man emhin rẹ mhọn ahu bhi egbe emhin nin ọle man. Ọkpakinọn uwedẹ nin Osẹnobulua rẹ man mhan da dikẹ. Ọnọn rẹ ekẹn man emhin sabọ wo rẹ re ekẹn man emhin soso nọn ghọnlẹn. Iriọ iJehova yẹ re man eria eso kiẹn eria esili, re enekẹle kiẹn eria ọbe? IBaibo ji mhan lẹn ghe ọiyi iriọ. Ẹghe nin Jehova rẹ man eria, ọle da re ẹsẹle nọn manman ghan nin ele. Ọne ẹsẹle, ọle hi isẹhoa nin mhan mhọnlẹn nin mhan re tobọmhan zẹ ebi mhan guanọ nin mhan lu. Jehova i noo ahu nọnsọle bhi egbe mhan bhi uwedẹ nin mhan ida yẹ sabọ tobọmhan zẹ ebi mhan guanọ. Eria da tobele zẹ si ele guanọ nin Jehova ha man ele.—Tie Jeremiah 18:7-10.
5 Aha ki miẹn eria bha ka nin Jehova nin Ọman-emhin nọn Khua man ele? Uwedẹ nela iJehova ha ki rẹ noo ahu nọnsọle? Riale ebe ha sunu sade ekẹn bha ja rẹ man emhin nan ho nan re ọle man. Ọnọn man emhin ki re ọle man emhin ọbhebhe la ọ ki mun fia. Ahamiẹn emhin nan re ekẹn man bha kiẹn ọle, obọ ọnọn man emhin ọle ọ kẹ ye. Ọkpakinọn, ọiyi riọ bhi ọsi Jehova. (Deut. 32:4) Ahamiẹn ọria bha ka nin Jehova man lẹn, obọ ọne ọria nin ọ ye. Uwedẹ nin ọria rẹ lu emhin yẹ sade iJehova man lẹn, ọle Jehova rẹ lẹn ebi ọle ha man lẹn kiẹn. Ene re egbe nanlẹn man nọnsẹn ki kiẹn emhin nan man nọnsẹn. Bhosi ijiẹmhin, enazẹle da yi ‘emhin nan manlẹn ọsi itohan’ nan man rẹ kiẹn ‘emhin nan rẹ lu emhin esili.’ Bhi obọ nọnkẹle, ene bha ka nin Osẹnobulua man ele ki ha yi ‘emhin nan man nan da re ohu dunmhun an.’—Rom. 9:19-23.