Nyẹnlẹn Rẹkhan Uwedẹ Nin Jehova Yọle Nin Mhan Rẹ Ha Nyẹnlẹn

Osẹnobulua nin Jehova, ọle mhanmhan uwedẹ nọn khẹke nin eria rẹ ha nyẹnlẹn. Bhi ọsi ijiẹmhin, ọle yọle nin ọkpea ọkpa ha re okhuo ọkpa. (Mt 19:​4-6, 9) Ọle he unan igboghẹ nọn ki rẹ ha khin. (1Co 6:​9, 10) Ọle bhọ yẹ re adia nin ẹbho nesọle rẹji ebi ele ha rẹ ha muegbe yẹ bi ukpọn nin ele ha yọ, nọn ha rẹ ele dikẹ bhi ẹwẹ eria ne iga ọle.​—⁠De 22:5; 1Ti 2:​9, 10.

Bhi ọne agbọn nan ẹlẹnan, ẹbho ne bunbun bha ka rẹkhan uwedẹ nin Jehova yọle nin mhan rẹ ha nyẹnlẹn. (Ro 1:​18-32) Uwedẹ nin ẹbho ne bunbun rẹ muegbe bi uwedẹ nin ele rẹ lu emhin, ọle yẹẹ ẹbho rẹ rẹkhan, arẹmiẹn ọne uwedẹ imhẹn. Ẹbho ne bunbun bhọ ki ha re emhin ebe nin ele lu rẹ dẹgbọ. Ele ki yẹ ha re unun gbe eria ne nyẹn rẹkhan uwedẹ nọnsi Jehova.​—⁠1Pe 4:​3, 4.

Bhi ọsẹmhan nin Esali Jehova, ọkhẹke nin mhan re izebhudu nyẹnlẹn rẹkhan uwedẹ nin Jehova yọle nin mhan rẹ ha nyẹnlẹn. (Ro 12:⁠9) Be imhan da rẹ lu ọle yẹ? Ọkhẹke nin mhan fẹkẹ re ẹwanlẹn ha taman ẹbho emhin ne yẹẹ iJehova. Ọ yẹ khẹke nin mhan ha nyẹnlẹn rẹkhan uwedẹ nin Jehova yọle nin mhan rẹ ha nyẹnlẹn. Bhi ọsi ijiẹmhin, mhan sabọ nọọn egbe mhan: ‘Uwedẹ ọsi ọne agbọn nan mhẹn rẹkhan bhi ukpọn nin mhẹn yọ bi uwedẹ nin mhẹn rẹ muegbe, la uwedẹ nin Jehova yọle nin mhan rẹ ha muegbe mhẹn rẹkhan? Ẹbho ha daghe ukpọn nin mhẹn yọ bi uwedẹ nin mhẹn rẹ muegbe, ele dẹ rẹọbhọ ghe ọria nọn ga Osẹnobulua mhẹn gene khin?’ Ahamiẹn mhan hannọ ividio nin mhan ha ghe, mhan sabọ yẹ nọọn egbe mhan: ‘Ọne ividio nan dẹ yẹẹ iJehova? Ebi ẹbho lu bhi ọne ividio rẹkhan uwedẹ nin Jehova yọle nin mhan rẹ ha nyẹnlẹn? Ọne emhin nin mhẹn ho nin mhẹn rẹ re egbe re ahoho nan dẹ sabọ re emhin ebe ha yẹẹ mhẹn? (Ps 101:⁠3) Ọ dẹ sabọ kiẹn ufi rẹji ẹbho ne ribhi azagba-uwa mhẹn la rẹji eria ebhebhe?’​—⁠1Co 10:​31-33.

Bezẹle nọn da manman khẹke nin mhan ha nyẹnlẹn rẹkhan uwedẹ nọnsi Jehova? Ranmhude, Jesu dẹ kẹ vae do fuẹn ene agbaẹbho bi emhin ẹbe rebhe nin ele lu a. (Eze 9:​4-7) Ene lu iho nọnsi Jehova ọkpa da miẹn uhọnmhọn. (1Jo 2:​15-17) Bhiriọ, bha ji mhan wo ha nyẹnlẹn rẹkhan uwedẹ iẹnlẹn nọnsi Jehova, nin ẹbho da sabọ re ogẹn ji Jehova sade ele daghe uwedẹ nin mhan rẹ nyẹnlẹn.​—⁠1Pe 2:​11, 12.

GHE ỌNE IVIDIO NỌN YỌLE KIẸN ỌMỌẸ IJEHOVA​—⁠OKPEA ỌKPA, OKHUO OKPA. BHA HA KI GHE ỌNE IVIDIO FO, RE EWANNIẸN ỌBHI ENE INỌNTA NAN:

• Bezẹle nọn da yi emhin ẹwanlẹn nin mhan rẹ ha nyẹnlẹn rẹkhan uwedẹ nin Jehova yọle nin mhan rẹ ha nyẹnlẹn?

• Bezẹle nọn da khẹke nin enebiọmọn rẹ nanbhi egbe obhokhan ha man imọn nesele uwedẹ nin Jehova yọle nin mhan rẹ ha nyẹnlẹn?

• Be bhọ imhan rebhe ha rẹ rẹkpa ẹbho rẹ miẹn elele bhi umhẹnmhin nọnsi Jehova yẹ?