UNYẸNMHIN NỌN KHẸKE ENE RẸKHAN IJESU
Ebi Mhan Ha Rẹ Sabọ Kiẹn Ọria Nọn Luẹ IBaibo Dinmhin Yẹ
Ọ dẹ yẹẹ uwẹ rẹ sabọ mun urẹọbhọ nọnsẹ mhọnlẹn bhi ẹkẹ ekpokpo beji Daniel rẹ lu ọle? Daniel wo ha luẹ Ọta nọnsi Osẹnobulua nọnsẹn. Ọle yẹ wo ha luẹ ọta akhasẹ ne dinmhin. (Da 9:2) Baibo nan luẹ dinmhin dẹ sabọ rẹkpa uwẹ rẹ mun urẹọbhọ nọnsẹ mhọnlẹn nọnsẹn. Be ọ da rẹ rẹkpa uwẹ yẹ? Ọ dẹ sabọ mun urẹọbhọ nọnsẹ toto ghe ive nesi Osẹnobulua rebhe dẹ gene munsẹ. (Jos 23:14) Ọ dẹ yẹ sabọ rẹkpa uwẹ rẹ manman hoẹmhọn Osẹnobulua. Ọne oyẹẹ nin uwẹ mhọn da Osẹnobulua ki re ọhubhudu nin uwẹ rẹ ha lu emhin ne mhẹn. (Ps 97:10) Be uwẹ arẹ ha luẹ iBaibo yẹ? Ghe emhin eso nin uwẹ ha sabọ lu.
Be imhẹn ha luẹ? Nan rẹ ha muegbe khẹ ikolo oga deba emhin nin mhan ha lu sade mhan luẹ iBaibo. Uwẹ dẹ miẹn emhin esili luẹ bhi Baibo nan tie bhi uzana, sade uwẹ re ẹghe ọbhi otọ rẹ guanọ otọ emhin ne bha mun uwẹ ẹlo kore. Deba ọnin, ẹbho eso yẹ guanọ nin ele lẹn otọ emhin bii: ọta akhasẹ ne ribhi Baibo, ikpẹ ọsi ahu ẹlinmhin nọn khiale, okhian ọsi Paul nin odibo bi emhin nin Jehova manlẹn. Uwẹ ha ye inọnta soso re nin uwẹ ho nin uwẹ lẹn otọle bhi Baibo, uwẹ sabọ gbẹn ọlẹn ọbhi otọ. Ọne inọnta nin sabọ ha yi uhọnmhọn-ọta nin uwẹ ha luẹ bhi iluẹmhin iBaibo nọnsẹ ẹdẹ ọbhebhe.
Ejela imhẹn ha da miẹn ebi mhẹn guanọ? Ghe ọne ividio natiọle Emhin Ne Rẹkpa Mhan Rẹ Luẹ IBaibo Dinmhin, nin uwẹ rẹ daghe eji eso nin uwẹ ha da miẹn ebi uwẹ guanọ. Nin uwẹ rẹ dọnmhẹn fẹghe ebi uwẹ ki sabọ guanọ otọ emhin yẹ, guanọ fẹghe agbaẹbho nela ene elanmhẹn nan tẹmhọn ọlẹn bhi Daniel uhọnmhọnlẹn nọnzi 7 mundia nan.
Eka ẹghe mhẹn da ha noo rẹ luẹ iBaibo? Ọkhẹke nin mhan ha luẹ iBaibo ẹghe rebhe nin mhan da sabọ ha sasa bhi oga. Uwẹ sabọ munhẹn ha re ẹghe nọn bha taan gbe rẹ luẹ iBaibo. Ọ ha ki zẹbue, uwẹ sabọ ji ọne ẹghe ha taan ba ọle. Ọria nọn luẹ iBaibo, ọ diabe ọria nọn tọn otọ rẹ guanọ emhin ne ghanlẹn. Beji uwẹ ha rẹ ha miẹn emhin nin uwẹ guanọ, iriọ ọ ha rẹ ha yẹẹ uwẹ rẹ ha guanọ ọlẹn khian. (Pr 2:3-6) Ọta nọnsi Osẹnobulua ki ha yẹẹ uwẹ rẹ ha luẹ. Baibo nan luẹ ki kiẹn emhin nin uwẹ da ha lu khian.—1Pe 2:2.
BE BHỌ ENE ELANMHẸN NAN TẸMHỌN ỌLẸN BHI DANIEL UHỌNMHỌNLẸN NỌNZI 7 MUNDIA NAN?
Da 7:4
Da 7:5
Da 7:6
Da 7:7
INỌNTA ỌBHEBHE:
Be bhọ Daniel 7:8, 24 rẹ munsẹ yẹ?
EMHIN NIN UWẸ HA LUẸ ẸGHE ỌBHEBHE:
Be bhọ ene elanmhẹn nan tẹmhọn ọlẹn bhi Revelation uhọnmhọnlẹn nọnzi 13 mundia nan?