Ebi Mhan Arẹ Sabọ Hoẹmhọn Osẹnobulua bi Ibo Mhan Yẹ

A rẹ miẹn ghe a bha yọle nin ene rẹkhan iJesu re obọ rẹkhan uhi nin Osẹnobulua nanbhi obọ iMoses gbe nin ibhokhan Izrẹl, uhi eva ne kokhun nẹ bhi ene uhi nin sẹyẹ rẹte mhan. Ene uhi eva hi: Hoẹmhọn Osẹnobulua bi hoẹmhọn ibo ẹ. Emhin rebhe nin Jehova guanọ bhi obọ mhan, a dẹ sabọ ku erebhe gbe bhi ene uhi veva nan. (Mt 22:37-39) A bha biẹ mhan biẹ ọne ahoẹmhọn-egbe nan. Ọkhẹke nin mhan khu ọbhọ. Be imhan da rẹ lu ọle yẹ? Uwedẹ ọkpa kpataki hi Baibo nan tie ẹdẹdẹ. Mhan ha luẹ iBaibo, nin mhan dọ lẹn unan ọria nin Osẹnobulua khin, mhan ki gene daghe “umhẹnmhin nọnsi Jehova.” (Ps 27:4) Bhiriọ, oyẹẹ nin mhan mhọn da ọle ki tuẹn okhun. Mhan ki yẹ dọ ha ria eria rẹkhan uwedẹ nọnsọle. Ọnan ki re ọhubhudu nin mhan rẹ ha re obọ rẹkhan uhi nekẹle nesọle, rẹ sẹbhi ọne uhi nọn yọle nin mhan re ọkhọle rebhe hoẹmhọn ibo mhan. (Joh 13:34, 35; 1Jo 5:3) Ji mhan fẹ emhin ea ghe ne ha rẹkpa mhan rẹ manman ha sọyẹnmhẹn bhi Baibo nan tie:

• Re ọkhọle nọnsẹ ha riale, uwẹ ha yẹ re ẹlo ha munọ lẹn. Ha riale ghe uwẹ ribhi eji ọne emhin da sunu. Be uwẹ daghe, be uwẹ họn, be ya sẹ uwẹ? Be emhin dia eria nan tẹmhọn ọlẹn yẹ bhi egbe?

  

• Re uwedẹ kẹkẹ rẹ ha tie ọle. Uwẹ sabọ ha re unun tie ọle dagbare, uwẹ sabọ ha re ẹlo rẹkhan ọlẹn beji ọ khue bhi rẹkọd. Uwẹ sabọ tie okha ọsi eria kẹkẹ nin Baibo tẹmhọn ọlẹn, la uwẹ re uhọnmhọn-ọta rẹ zẹ eji uwẹ ha tie. Bhi ọsi ijiẹmhin, uwẹ sabọ noo Appendix A7 bi B12 ọsi New World Translation of the Holy Scriptures nin uwẹ rẹ daghe eji uwẹ ha tie sade uwẹ guanọ nin uwẹ luẹ ẹmhọn iJesu. Uwẹ sabọ zẹ nin uwẹ rẹ tie emhin rebhe nọn ribhi uhọnmhọn-ebe nan da re iBaibo nan tie bhi ebe ukpẹdẹ. Uwẹ sabọ yẹ re ẹghe nan rẹ gbẹn ebe iBaibo kẹkẹ rẹ tie ele ọsegbe ọsegbe.

  

• Ji ọle mun uwẹ ẹlokore. Ọria ha tie uhọnmhọnlẹn ọkpa bhi Baibo bhi ukpẹdẹ, nọn mun ọle ẹlokore, nin ọle yẹ ria eria nyan ọlẹn, ọle mhẹn gbera ghe ọne ọria gheghe tie uhọnmhọnlẹn ne bunbun ne bha mun ọlẹn ẹlokore. Ria ẹmhọn eji emhin nin uwẹ tie da sunu. Zilo nyan ikpọta kẹkẹ nan rẹ gbe ọne okha. Noo imapu. Yẹ tie Baibo nan gbẹn bhi adesẹ ene apapa-ebe ne diẹn mun ọne ulọnlẹn. A ha miẹn emhin ribhọ nọn bha mun uwẹ ẹlokore, guanọ otọ ọle. Dọnmhegbe nin uwẹ rẹ re eka ẹghe nin uwẹ rẹ tie iBaibo yẹ rẹ ria eria nyan ọlẹn.