Ebi Uwẹ Ha Rẹ Re Itrati Rẹ Munhẹn Ha Ne Ọria Tẹmhọn Osẹnobulua Yẹ

Re na bhi January 2018, inọnta nin mhan ha rẹ sabọ ne ẹbho zilo bhi Baibo, ele a ki ha rẹman bhi obọ natiọle “Ebi Uwẹ Ha Sabọ Ta” bhi ebe ikolo nọnsẹmhan. A da taman mhan nin mhan hẹi yẹ gheghe ha ne ebe nesẹmhan nin ẹbho, sokpan, nin mhan ha dọnmhegbe nin mhan rẹ re iBaibo ha nin ele zilo. Nin agbotu rẹ rẹkpa mhan guẹ ebi a rẹ re iBaibo rẹ nin ẹbho zilo yẹ, a da yẹ ha lu ividio ne ha rẹman mhan ebi a rẹ lu ọle yẹ. A be re ọnan yọle nin mhan hẹi yẹ zẹwẹ ne ebe nesẹmhan nin ẹbho hiehie sade mhan tẹmhọn Osẹnobulua na bhi ukuwa rẹ sẹbhi ukuwa? Eye. Bhi ọsi ijiẹmhin, mhan dẹ sabọ rẹ itrati nesẹmhan rẹ munhẹn ha ne ọria tẹmhọn Osẹnobulua. Ghe ebi mhan ha rẹ lu ọle yẹ:

1. Nọọn inọnta nọn ribhi odalo ọne itrati bi ewanniẹn kẹkẹ nan gbẹn rẹkhan ọne inọnta.

2. Bhi odotọ uhọnmhọn-ọta nọn yọle “Ebi Baibo Tayẹ” bhi apapale nin ọzeva ọsi ọne itrati, rẹman ọne ọria ewanniẹn nin Baibo re ọbhi ọne inọnta. Ahamiẹn ọne ọria mhọn ẹghe, sẹyẹ re emhin nekẹle ne ribhi ẹkẹ ọne itrati rẹ ne ọne ọria zilo.

3. Re ọne itrati nin ọne ọria, uwẹ ha taman ọlen nọn guanọ ẹghe rẹ tie ọle fo.

4. Uwẹ kuẹ kpanọ, re inọnta nọn ribhi obọ nọn yọle “Eba Da Ria Ẹmhọn Lẹn” man ọne ọria, uwẹ ha deba ọle mhanmhan ẹghe nin uwẹ ha rẹ fikie vae dọ wanniẹn ọlẹn.

Ẹghe nin uwẹ ha rẹ fikie vae, wanniẹn ọne inọnta, uwẹ ha gbo nọọn inọnta ọbhebhe nin uwẹ ha gbo wanniẹn ẹdẹ ọbhebhe. Uwẹ sabọ zẹ ọkpa bhi inọnta ne ribhi wẹbsaiti nọnsẹmhan, la uwẹ ze ọkpa bhi inọnta ne ribhi ọne brokiọ nan tẹmhọn ọlẹn bhi ikeke ọne itrati. Bhi ẹghe nọn yẹẹ uwẹ, uwẹ sabọ munhẹn ha re brokiọ natiọle Ọta Nọn Mhẹn Nọn Nin Obọ Osẹnobulua Vae! la ebe ọbhebhe nin mhan rẹ man ẹbho iBaibo bhi ẹwẹ Emhin Kpataki Nin Mhan Rẹ Lu Iwẹnna Itẹmhọn Osẹnobulua rẹ munhẹn ha man ọne ọria iBaibo.