Gbega Ibọdọ bi Ireokhuo Nọnsẹ

Ẹlo nọn ghanlẹn Jehova rẹ ghe ive nin okhuo bi ọdọ ko ve nin egbe. Ọle da yọle ghe nin ele ha sun rẹkhan egbe. (Mt 19:​5, 6) Okhuo bi ọdọ ne bunbun ne ga Osẹnobulua ribhọ ne re ijiẹmhin esili man. Sokpan, ibọdọ bi ireokhuo soso iribhọ nọn gba nan fo. Ẹmhọn zegbere ẹgheso. Ẹmhọn ha zegbere, ọ bha khẹke nin okhuo bi ọdọ ha riale ghe isọebea la iwaegbea ha re ọne ẹmhọn ọi, beji ẹbho ne bunbun lu ẹlẹnan. Bhiriọ, be okhuo bi ọdọ ha rẹ sabọ gbega ibọdọ bi ireokhuo nọnsele yẹ?

Fẹ ene emhin isẹn nan ghe.

1. Gbega ọkhọle nọnsẹ nin uwẹ hẹi ha re ẹlo ọbhi ọria nọn iyi okhuo ẹ la ọdọ ẹ, bi iregbe re ahoho ne imhẹn, ranmhude ene emhin nan dẹ sabọ si ẹmhọn re bhi ibọdọ bi ireokhuo nọnsẹ.​—Mt 5:28; 2Pe 2:14.

2. Ziẹn ikolu nin uwẹ bi Jehova ko mhọnlẹn, uwẹ ha yẹ dọnmhegbe ha lu emhin nọn ha re ibọdọ bi ireokhuo nọnsẹ ha rẹ ọle ghọnghọn.​—Ps 97:10.

3. Ha nyẹnlẹn bhi uwedẹ nọn khẹke iKristiẹn, uwẹ ha yẹ dọnmhegbe ha lu emhin esili ne ha re okhuo ẹ la ọdọ ẹ ghọnghọn, aharẹmiẹn obhi emhin ne khere-khere nọn.​—Col 3:​8-10, 12-14.

4. Bha ha re ekpẹn-ekpẹn rẹ ne egbe talọ ẹghe-ẹghe, bha ha yẹ ji ebi bha ta ha yi ọta esili.​—Col 4:6.

5. Bha ha re uwedẹ oyẹẹ bi ẹjẹjẹ rẹ re emhin nọn khẹke ibọdọ bi ireokhuo nin egbe.​—1Co 7:​3, 4; 10:24.

Ahamiẹn iKristiẹn mun ekpẹn nin ibọdọ bi ireokhuo nọnsọle, ọ rẹman ghe ele mun ekpẹn nin Jehova nọn mun emhanmhan ọsi ibọdọ bi ireokhuo gbọ.

GHE ỌNE IVIDIO NATIỌLE, IZIẸNGBE MHAN DA RẸ RE UNẸ​—RE OBỌ RẸKHAN UHI NỌN DIA ỌNE UNẸ. BHA HA KI GHE ỌLE FO, WANNIẸN ENE INỌNTA NAN:

• 

  Aharẹmiẹn ghe ibọdọ bi ireokhuo munhẹn nọnsẹn, ọnọghọ nela ha sabọ zegbere bhọ?

• 

  Be adia ne ribhi Baibo ha rẹ sabọ rẹkpa ẹbho ne riale ghe ahoẹmhọn-egbe iribhi ibọdọ bi ireokhuo nọnsele?

• 

  Uhi nela Jehova re ọbhi otọ rẹji ibọdọ bi ireokhuo?

• Emhin nela ọkhẹke nin okhuo bi ọdọ lu, nin ibọdọ bi ireokhuo nọnsele da sabọ kiọnlẹn?