Uwẹ Be Muegbe Rẹ “Le ọne Otọ Nan bhi Uku”?

UWẸ BE MUEGBE NIN UWẸ RẸ RE ỌNE OTỌ NAN KIẸN OTỌ ỌFUBHEGBE?

Ẹghe nin Jehova rẹ taman eria nin ele “vuọn ọne otọ nan yẹ ha gbẹloghe ọle,” ọle da rẹman ghe ọne otọ nan rebhe dẹ kiẹn otọ ọfuebhegbe sade a ki zẹbue. (Gen. 1:28) Ẹbho ne da nyẹnlẹn bhi ighegheghe bhi ọne otọ nan dẹ yẹ re obọ rẹkhan ọne uhi nan. Ọne otọ nan ida kiẹn otọ ọfubhegbe bhi ọsi ọhẹnhẹn—ranmhude ọne ogba ọsi Idẹn iyẹ ribhọ. A wo la khọn okhọn Amagẹdọn fo, mhan dẹ ha mhọn ẹsọn ne bunbun nin mhan ha miẹn beji mhan ha da sabọ kie re ọne otọ nan ọi nọnsẹn nin ẹbho riia. Ọnan iyi obhi ẹsọn khere nin mhan ha miẹn.

Ọnan ye mhan re iwẹnna nọn khẹke nin ibhokhan Izrẹl lu ẹghe nin ele rẹ na bhi Babilọn fikie vae bhi otọ nọnsele. Ọria soso iribhọ nọn nyẹnlẹn bhi otọ nọnsele rẹ na bhi ikpe 70. Sokpan, Ẹzaya da tale ghe Jehova dẹ rẹkpa ele, beji ele ha da sabọ kie re ọne otọ kiẹn otọ nọn mhọn-ose a. Ọne ọta akhasẹ da yọle ghe Jehova dẹ re ojẹgbo nọnsọle diabe ogba ọsi Idẹn, sẹyẹ ugbẹbubu nọnsọle ki diabe ogba ọsi Jehova. (Isa. 51:3) Jehova da rẹkpa ibhokhan Izrẹl rẹ kie re otọ nọnsele kiẹn otọ nọn mhọn-ose a. Iriọ sẹyẹ, Jehova dẹ rẹkpa ẹbho ne da nyẹnlẹn bhi ọne otọ nan rẹ re ọle kiẹn otọ ọfubhegbe nọn mhọn-ose a. Sẹyẹ, emhin eso ribhọ nin uwẹ ha sabọ lu nian nin uwẹ rẹ rẹman ghe, uwẹ ho nin uwẹ deba miẹn ọne ẹsọn.

Uwedẹ ọkpa nin mhan ha rẹ sabọ lu ọnan hi, sade mhan dọnmhegbe rẹ ha kpe uwa nọnsẹmhan yẹ re ọle ọi nọnsẹn. Uwẹ dẹ sabọ lu iriọ aharẹmiẹn ediake nesẹ ikpe eji ele ye. Uwẹ dẹ yẹ sabọ rẹkpa kpe iKindọn Họọ, bi Asẹmbli Họọ nesẹmhan, yẹ hẹnhẹn ele. Ahamiẹn uwẹ dẹ sabọmhin, uwẹ sabọ yẹ rẹ zegbere nin uwẹ rẹ rẹkpa ibhio mhan nin emhin idunmhuri sunu je. Ọnan ki rẹman ghe uwẹ muegbe nin uwẹ rẹ rẹkpa ibhio ẹ sade emhin sunu nọn da khẹke nin uwẹ rẹkpa ele. Nọọn egbe ẹ, ‘Mẹn dẹ be sabọ luẹ emhin eso nin mẹn ha sabọ noo, ahamiẹn Jehova ji mẹn da nyẹnlẹn bhi ọne otọ nan rẹ sẹbhi ighegheghe?’

UWẸ BE MUEGBE NIN UWẸ RẸ RẸKPA ẸBHO NAN HA RIỌKPANỌ?

A ki wo riọ ọmọn okhuo ọsi Jeirọs kpanọ bhi uu fo, Jesu da yọle ghe nan re emhin nanlẹn le. (Mark 5:42, 43) Ọ ida ha yi ẹsọn nọn kaka gbe nan rẹ gbẹloghe ọne ọmọn okhuo nọn ribhi ikpe 12 nin. Ọrẹyiriọ, ria ẹmhọn iwẹnna nọn khua nin mhan ha miẹn ẹghe nin Jesu ha rẹ mun ive nin ọle ve sẹ nọn yọle: “Ọrebhe ne ribhi idin ọsi ayere [ki] họn ukpuru nọnsọle yẹ dagbare.” (John 5:28, 29) Arẹmiẹn Baibo bha tẹmhọn emhin ne bunbun nin mhan ha lu, mhan dẹ sabọ ha mhọnlẹn bhi ọkhọle ghe, ẹbho nan ha riọkpanọ dẹ ha guanọ ebale, eji ele ha dia, bi ukpọn nin ele ha yọ. Uwẹ bhọ dẹ be sabọ rẹman nian ghe, uwẹ muegbe nin uwẹ rẹ rẹkpa? Emhin eso ribhọ nin uwẹ ha sabọ lu.

Ahamiẹn a yọle ghe ọfẹotughe khian rẹnẹ sẹbhi agbotu nọnsẹ, uwẹ be zegbere nin uwẹ rẹ tie ọle vae bhi uwa nọnsẹ dọ le ebale? Ahamiẹn a yọle nin obhio mhan nọn sibhi Bẹtẹ re diọbhi agbotu nọnsẹ, la ahamiẹn obhio mhan nọn lu iwẹnna ọfẹotughe iyẹ lu iwẹnna ọfẹotughe, uwẹ dẹ be sabọ rẹkpa ele guanọ uwa nin ele ha dia? Ahamiẹn a khian do usikoko nọn nẹ, la usikoko kpataki bhi eji uwẹ da nyẹnlẹn, uwẹ dẹ be sabọ zegbere nin uwẹ rẹ miẹnsọn ọkuẹsẹ a munhẹn, la sade a zobọ bhi ọne usikoko, la nin uwẹ rẹ gbe ọbokhian nin ibhio mhan ne ha vae?

MUEGBE RẸ MAN ẸBHO NAN HA RIỌKPANỌ EMHIN

Ranmhunde ebi a tẹmhọnlẹn bhi Acts 24:15, mhan ha mhọnlẹn bhi ọkhọle ghe ẹbho ne bunbun dẹ riọkpanọ bhi uu. Ene bunbun bhi ẹwẹ ele bha ha mhọn ọne isẹhoa rẹ lẹn Jehova ọkuẹsẹ ele yu. Ọkpakinọn, a ki re ọne isẹhoa nin ele sade a riọ ele kpanọ fo bhi uu.a Eguọmhandia nesi Osẹnobulua dẹ rẹkpa man ele emhin. (Isa. 11:9) Charlotte nọn tẹmhọn Osẹnobulua bhi Europe, South America, bi Africa wo ha khuaẹloghe ọne ẹghe nan. Ọle da re eghọnghọn yọle: “Mẹn wo ha khuaẹloghe ẹghe nin mẹn ha rẹ ha man ẹbho nan ha riọkpanọ emhin. Mẹn ha tie emhin rẹji ọria nọn nyẹnlẹn bhi ẹghe nọn gbera, mẹn kẹ wo riale: ‘Sade ọne ọria nan lẹn Jehova nọn, iẹnlẹn nọnsọle ha wo rẹ dikẹ.’ Mẹn wo ha khuaẹloghe ẹghe nin mẹn ha rẹ taman ẹbho nan ha riọkpanọ ẹmhọn Jehova, bi ebi iẹnlẹn nọnsele ha rẹ manman mhẹn an yẹ sade ele ga ọle.”

Eguọmhandia nesi Jehova ne nyẹnlẹn ọkuẹsẹ Jesu vae bhi ọne otọ nan dẹ bhọ ha mhọn emhin ne bunbun nin ele ha luẹ. Ria ẹmhọn ebi ọ ha rẹ manman re imhan ha ghọnghọn yẹ, bi ọne isẹhoa nin mhan da ha mhọnlẹn rẹ gbotọle fanọn an man Daniẹl umunsẹ ọsi ọta akhasẹ kẹkẹ nin ọle gbẹn ọbhi otọ nin ọle bha lẹn otọ ọle. (Dan. 12:8) La nin mhan rẹ rẹkpa Rutu bi Naomi rẹ lẹn ghe, ọne Mezaya deba ẹbho ne na bhi ulin-uwa nọnsele vae. Ọ dẹ wo manman re imhan ha ghọnghọn rẹ man ẹbho emhin bhi ọne otọ agbọn nan rebhe. Sẹyẹ, mhan ida ha mhọn ekpokpo, la emhin ne ha denọ mhan ọkhọle sibhi emhin nin mhan ha man ele le re, beji ọ rẹ sunu bhi ọne agbọn Esu nan ẹlẹnan.

Be uwẹ ha sabọ lu nian nin uwẹ rẹ rẹman uwẹ muegbe nin uwẹ rẹ man ẹbho nan ha riọkpanọ emhin? Uwedẹ ọkpa hi, nin uwẹ rẹ dọnmhegbe rẹ guẹ ebi a rẹ man emhin nọnsẹn yẹ, yẹ ha tẹmhọn Osẹnobulua ẹghe rebhe. (Matt. 24:14) Ahamiẹn uwẹ iyẹ manman tẹmhọn Osẹnobulua nian beji uwẹ rẹ ha guanọ ranmhude idọmanlẹn, la emhin nekẹle, uwẹ dẹ sabọ rẹman ghe, uwẹ mhọn ọne ọhubhudu nin uwẹ rẹ man ẹbho nan ha riọkpanọ emhin, beji uwẹ ha rẹ dọnmhegbe rẹ ha lu eka nin uwẹ ha sabọ lu bhi iwẹnna itẹmhọn Osẹnobulua nian.

Emhin nọn mhẹn nọn nin mhan rẹ ria eria nyan ene inọnta kpataki nan: Uwẹ be gene ha khuaẹloghe ẹghe nin uwẹ ha rẹ le ọne otọ nan bhi uku? Ọ be ti uwẹ bhọ nin uwẹ rẹ re ọne otọ nan kiẹn otọ ọfubhegbe, nin uwẹ rẹ rẹkpa ẹbho nan ha riọkpanọ, bi nin uwẹ yẹ rẹ man ele emhin? Uwẹ dẹ sabọ rẹman ghe uwẹ muegbe nin uwẹ rẹ nyẹnlẹn bhi ọne otọ nan rẹ sẹbhi ighegheghe sade uwẹ deba ha miẹnsọn ne khọ ene uwẹ ha lu bhi ẹghe nin uwẹ ha rẹ le ọne otọ nan bhi uku!