Be Bhọ Otu Ne Sun Oga Ọsi Esali Jehova Rẹ Wẹnna Yẹ?

Bhi ore ọhẹnhẹn, ‘ene edibo bi ene ewanlẹn bhi ẹkẹ oga bhi Jerusalẹmu,’ ele ha yi ene sun oga ne zilo kpataki nin agbotu bhi ẹghe nin. (Acts 15:⁠2) Izilo nyan iBaibo bi idegbere nin ahu ẹlimhin nọn khiale nọnsi Osẹnobulua, ọle rẹkpa ele rẹ ha mhọn ọkugbe bhi ilo nele zẹ. (Acts 15:25) Iriọ yẹ nọn ẹlẹnan.

Osẹnobulua noo ele rẹ lu iho nọnsọle. Enin ibhio mhan ne sun oga nan manman hoẹmhọn ọta nọnsi Osẹnobulua bi ilẹnmhin ọsi emhin nan lu bhi ẹkẹ oga. Uzana rẹsi uzana ele rẹ do ikolo nele rẹ zilo ebi ele ha rẹ rẹkpa ọnin agbotu nọn ribhi ọnin otọ nan rebhe. Rẹ nin obọ ebe nan gbẹn la ọfẹotughe bi eman emhin nekẹle, ele da ri adia mhan bhi Baibo beji ọle ha ye bhi ore nọn gbera. Ọnan rẹkpa mhan rẹ ha mhọn okugbe bhi eria nọnsẹ mhan bi iẹnlẹn nọnsẹ mhan. (Acts 16:​4, 5) Enin otu nan mhanmhan ebale oriọn, yẹ sun iwẹnna itẹmhọn Osẹnobulua. Ele yẹ gbẹloghe iwẹnna nanrẹ mun ibhio mhan fiọ bhi ihe kikẹ bhi ẹkẹ oga.

Adia nọnsi ahu ẹlimhin nọn khiale nọnsi Osẹnobulua ele wẹnna rẹkhan. Osẹnobulua nin Jehova nọn kokhun nẹn bi Jesu nọn yi Uhọnmhọn agbotu, ene sun oga mun udu nyan ne ha dia ele. (1 Corinthians 11:3; Ephesians 5:23) Ele ighe egbele bii ebealẹn nọnsi agbotu. Ele bi enekẹle nan re ahu ẹlimhin nọn khiale zẹ, re ‘obọ rẹkhan adia nọnsi Jesu eji ọle irẹ akhian.’ (Revelation 14:⁠4) Ọyẹẹ ene sun oga sade mhan nan erọnmhọn nele.

• He bhọ ha sun oga bhi ore ọhẹnhẹn?

• Be ene sun oga ẹlẹnan rẹ guanọ urẹkpa ọsi Osẹnobulua yẹ?