ILUẸMHIN 6

Iruduba Bea Mhan Mhọn Rẹji Ene Yu?

1. Be bhọ ọta nọn mhẹn rẹji ene yu?

Mata bi Meri dede iLazarọsi nin obhio ele nan riọkpanọn bhi idin

Lazarọsi nọn ọmọẹ Jesu da yu bhi agba-ẹbho natiọle Bẹtani nọn sikẹ Jerusalẹm. Nin Jesu ki rẹ sẹbhi enin, ikpẹdẹ enẹn ki gbera nọn yu. Jesu da rẹkhan ibhio Lazarọsi, Mata bi Meri akhin eji ada rọle tọ. Usun ẹbho da rẹkhan ele. Jesu da riọ Lazarọsi kpanọ bhi idin. IMata bi Meri da manman aghọnghọn.—Tie John 11:21-24, 38-44.

IMata ka lẹn ọta nọn mhẹn rẹji ene yu. Ọle lẹnmhin ghe Jehova dẹ riọ ele kpanọ ne kie dọa nyẹn bhi otọ..—Tie Job 14:14, 15.

2. Be sunu ji ene yu?

Ẹghe nan rẹ man Adamu, bi ẹghe nin ọle ki rẹ yu — Osẹnobulua taman Adamu: ‘Ekẹn uwẹ khin, ekẹn uwẹ da yẹ kiẹn.’—GENESIS 3:19.

Ekẹn arẹ man mhan. (Genesis 2:7; 3:19) Ẹlinmhin iribhọ nọn nyẹn bhi ẹkẹ egbe mhan. Emhin soso isibhi egbe ọria re ha nyẹnlẹn khian sade ọria yu. Ọria ha yu, ẹrere nọnsọle iyẹ wẹnna, ọiyẹ ria eria. Bhiriọ, Lazarọsi bha tale ọle miẹn emhin soso beji ọle yu, ranmhude ọnọn yu bha lẹn emhin soso.—Tie Psalm 146:4; Ecclesiastes 9:5, 6, 10.

Osẹnobulua mhọn agbọn-eranlẹn nọn da rẹ re oya nẹ ẹbho? Beji amiẹn iBaibo taman mhan ghe ene yu bha lẹn emhin soso, iluẹmhin ọsi agbọn-eranlẹn, ohoghe nọn. E rọle ria elin nọnsi Osẹnobulua a. Emhin nọn sọnọn Osẹnobulua nọn nanrẹ re oya nẹ ẹbho bhi ẹkẹ eranlẹn.—Tie Jeremiah 7:31.

Ghe ọne ividio Be Sunu Ji Ene Yu?

3. Ene yu dẹ sabọ ne mhan talọ?

Ene yulu iyẹ sabọ talọ. Ele iyẹ hẹnmhọn. (Psalm 115:17) Ẹhi nei mhẹn man lu bi eria ne yu, dọ ha nin ẹbho talọ. (2 Peter 2:4) Awaa nọn bhi ẹlo iJehova nin mhan rẹa guanọ ebi mhan arẹ nin ene yu talọ yẹ.—Tie Deuteronomy 18:10, 11.

4. Ebhọ la riọ kpanọ bhi uu?

Okpea nan riọkpanọ bhi idin dọ ha nyẹnlen bhi otọ ọfubhegbe nọn luẹ ẹmhọn Osẹnobulua. Ọne okpea da sẹyẹ ha man ẹbho ọbhebhe nan riọkpanọ bhi idin ẹmhọn Osẹnobulua.

Ẹbho ne bunbun dẹ riọ kpanọ dọa nyẹn bhi otọ. Rẹsẹbhi eso ne lu emhin ebe ranmhude ebha lẹn Osẹnobulua ele kuẹ yu.—Tie Luke 23:43; Acts 24:15.

Ẹbho nan riọ kpanọ ki dọa luẹ ẹmhọn Osẹnobulua. Ele ki yẹ ka Jesu ehọ. Iriọ ele arẹ rẹman ghe ele rẹọbhi Jesu. (Revelation 20:11-13) Ele ha lu nọnsẹn, eki nyẹn bhi otọ bhi ighegheghe.—Tie John 5:28, 29.

5. Bea uriọkpanọ bhi uu man mhan le rẹji Jehova?

Ranmhude Osẹnobulua ji Ọmọn nọnsọle nọn dọ yu mhan, ọle zẹle nin mhan da mhọn iruduba ghe, ene yu dẹ sabọ kie nyẹn. Uriọkpanọ bhi uu ji mhan lẹn ghe Jehova kakabọ hoẹmhọn mhan. Ifuẹkẹle nọn khua iJehova rẹman, ọiyi ranmhude mhan mhẹn gbe. Ẹghe nin ene yu arẹ kie vae, ọbhọ uwẹ manman ho nu miẹn?—Tie John 3:16; Romans 6:23.

Nuwẹ rẹ luẹ ba ọnin, fẹ uhọnmhọn-ọta 6, 7 bi 10 ọsi ebe natiọle What Does the Bible Really Teach? ghe.