Ọmanmhẹn Nọn Lu Ebe Ri Abale bi Jehova ha Ghọnghọn

Uwẹ daghe ọnin ọmanmhẹn nọn ribhi ọnin foto nan?— Jẹfta biẹ ọle. IBaibo bha sunu bhi elin ọlẹn. Ọkpa kinọn, ọle lu ebe yẹẹ abale bi Jehova. Ji mhan luẹ ẹmhọn ọnin ọmanmhẹn bi abale.

Ọria nọn mhẹn iJẹfta khin. Ọle wo ha re ẹghe bhi otọ rẹ man ọmọn nọnsọle ẹmhọn iJehova. Ọle wo manman mhọn ahu. Ọle yẹ guẹ ri ẹbho khian. Ọnan zẹle nin ibhokhin Izrẹl da yọle nọn kalo nele bhi okhọn.

IJẹfta da bhii Osẹnobulua nọn miẹnkpa ọle khọn miẹn otọ. Ọle da vi ive ghe, ọle ha khọn miẹn otọ, ọnọn irẹ ha khin nọn ka dagbare bhi uwa nọnsọle, sade ọle ki nanbhi okhọn vae, ki kiẹn ọsi Jehova. Ọnin ọria ki dọ ha nyẹnlẹn bhi uwa oga nọnsi Osẹnobulua. Ọle ki ha wẹnna bhi enin rẹsi ukpẹdẹ uu. IJẹfta da gene khọn miẹn otọ. Uwẹ ki lẹn ọnọn ka dagbare bhi uwa nọnsọle beji ọle sẹbhi uwa?—

Ọmọn okhuo ọkpa nọnle mhọnlẹn! Ọrẹ yiriọ, iJẹfta da sẹyẹ ji ọle ha khian ọnin uwa oga. Ọda manman ba iJẹfta bhi egbe. Yere, ọle ki vi-ive fo. Iriọ ọnin ọmọn da yọle: ‘Aba, uwẹ ki vi-ive fo, re obọ rẹkhan ive nuwe ve.’

Ọnan yẹ wo manman ba ọnin ọmọn bhi egbe. Bhi ọnin uwa oga, ọle ida sabọ bọ ọdọ, la biẹ ọmọn. Ọkpa kinọn, ọda manman guanọ nọnle re obọ rẹkhan ive nọnsi abale, sẹyẹ ri Jehova ha ghọnghọn. Bhi ẹlo nọnsọle, ọnan kpọnọ gbera nan rẹ bọ ọdọ, la, nan rẹ biẹ imọn.

Uwẹ riale ghe, ebi ọnin ọmọn nan lu, ri abale bi Jehova ha ghọnghọn?— Ehe! Uwẹ a ha yi ọmọn nọn re obọ rẹkhan uhi, nọn sẹyẹ hoẹmhọn iJehovah, uwẹ ki dia bi ọmọn nọnsi Jẹfta. Uwẹ ki ri ene biẹ ẹ bi Jehova ha ghọnghọn.