Ahiẹ Bi Ofẹn Sẹ Mun Uwẹ Ghe?

Fẹ ọnin ọbhokhan nọn ri bhi ọnin foto nan ghe. Ọdia bi ọnin ofẹn bi ahiẹ mun. Ọi be yi iriọ? Ọnan sẹ sunu jiẹ ghe?— Ọ sunu ji ọrebhe ẹgheso. IBaibo tale ghe ọyẹ sunu ji imọẹ iJehova. Ọkpa bhi ẹwẹ ele da ha yi Ẹlaija. Ji mhan luẹ ẹmhọn lẹn.

Otọ Izrẹl Ẹlaija da nyẹn, ẹghe nọn rele ọkuẹsẹ abiẹ iJesu. Ọjie nọnsi Izrẹl da ha yi Ehabu. Ọle bi okhuo ọle nin Jezibẹ bha ga iJehova, ẹbọ natiọle iBee ele ha ga. Ranmhude ọnan, ẹbho ne bunbun da yẹ ha ga iBee. Ọria ọbe Jezibẹ wo khin, ọda ho nọnle gboni ene ga iJehova rebhea, rẹ sẹbhi Ẹlaija. Uwẹ lẹn ebi Ẹlaija ki lu yẹ?—

Ẹlaija da nẹ fia! Ọda negbe ha khin ẹkẹ ẹwẹ la nẹko bhi uhio bhi ẹkẹ udo. Bezẹle nọn da lu iriọ?— Ofẹn ha mun ọlẹn. Ọbha rẹ khẹke nin ofẹn ha mun ọlen. Bezẹle? Ranmhude ọle lẹnmhin ghe iJehova dẹ miẹnkpa ọle. IJehova ka sẹ ri ahu nọnsọle man Ẹlaija khẹ, ẹghe nọn rẹ re eranlẹn re ewaniẹn bhi erọnmhọn nọnsọle. IJehova dẹ sẹyẹ miẹnkpa ọle nian.

Ẹghe nọn sẹyẹ rẹ ha ribhi uhio bhi ẹkẹ udo, iJehova da nọọn lẹn: ‘Bebhọ uwẹ lu bhi enan?’ Ẹlaija da yọle: ‘Imẹn ọkpa ki kẹre bhi ene ga ẹ, ofẹn mun mhẹn ne hẹi gbe mhẹn an.’ Elaija riale ghe agboni ene ga iJehova rebhe a. Enan iJehova da yẹ Ẹlaija: ‘Ọiyiriọ, ene ga mhẹn sẹyẹ si 7,000 [uli ihilon]. Mun udu zeze. Ẹsọn ne bun sẹyẹ khẹ ẹ! Uwẹ riale ghe Ẹlaija ghọnghọnmhin nọn rẹ họn ọnan?—

Buwẹ luẹ bhi ebe sunu ji Ẹlaija?— Hẹi re ẹghe nin ahiẹ bi ofẹn rẹ ha muẹn, ranmhude uwẹ mhọn imọẹ ne hoẹmhọn ẹn yẹ hoẹmhọn iJehova. Deba ọnin, Jehova mhọn ahu nọn arẹ miẹnkpa ẹ. Ọbha be tiẹ bhọ rẹ lẹn ghe ọiyi uwẹ ọkpa khian?—