IJesu Wo ha Kaehọ

Emhin nọn lẹkhẹ nọn nuwẹ rẹ wo ha ka ene biẹ ẹ ehọ ẹghe rebhe?— Ẹghe eso, ọnọghọmhin. Uwẹ lẹn sẹ ghe iJesu ka Jehova bi ene biẹ ọle ehọ?— Ẹghe nọn bha rẹ lẹkhẹ nin mhan rẹ ka ene biẹ mhan ehọ, ijiẹmin nọnsi Jesu dẹ rẹkpa mhan. Ji mhan luẹ ebi mhan arẹ sabọ ri egbe khọkhọ iJesu yẹ.

Ọkuẹsẹ a biẹ iJesu bhi ọnin otọ nan, ọle ka deba Aba le nin iJehova ha nyẹn bhi okhun. Ọle yẹ ha mhọn aba bi inẹn bhi ọnin otọ nan. Elin ele da ha yi Josẹfu bi Meri. Uwẹ lẹn ebi ele rẹ ha yi ene biẹ Jesu yẹ?—

Nin Jesu da sabọ nyẹn bhi ọnin otọ nan, iJehova da re iẹnlẹn nọnsọle fiọ bhi ẹkẹle nọnsi Meri. Meri da dọ biẹ iJesu bhi otọ nan. Emhin ọhan-ilo ọnan khin. IJesu da ha wanre bhi ẹkẹ nọnsi Meri beji imọn nekẹle lu. Uki isilin ki re, iMeri da biẹ iJesu. Iriọ iMeri bi Josẹfu nin ọdọ le rẹ kiẹn ene biẹ iJesu bhi ọnin otọ nan.

Ẹghe nin Jesu rẹ ha yi ikpe igbeva, ọda lu emhin nọn rẹman ebi ọle hoẹmọn iJehova nin Abale sẹ yẹ. Ẹghenin, ọle bi azagba-uwa nọnsọle da yi iluemhin anagbera bhi Jerusalẹm. Ẹghe nele rẹ ha vade uwa, iJosẹfu bi Meri bha yẹ miẹn iJesu bhi ije soso. Uwẹ ki lẹn eji ọle ha ye?—

IJosẹfu bi Meri da fikie akhin Jerusalẹm ẹjẹje dọ ha guanọ iJesu bhi ije rebhe. Ofẹn da wo ha mun ele ranmhude ebha miẹn ọlẹn. Ọki si ikpẹdẹ ea, eda miẹn ọlẹn bhi ẹkẹ uwa oga. Uwẹ ki lẹn ebezẹle nọn ọle da ha ribhi uwa oga?— Ranmhude, bhi enin, ọle dẹ sabọ luẹ ẹmhọn nọnsi Jehova nin Abale. Ọle hoẹmhọn iJehova. Ọnan zẹle nọnle da guanọ nọnle lẹn ebi ọle ha rẹ lu iho nọnsi Jehova yẹ. IJesu rẹ wanre kiẹn okpea, ọle da sẹyẹ wo ha ka iJehova ehọ. Arẹmiẹn ọle loya ranmhude ọnan, iJesu da sẹyẹ ka Abale ehọ. IJesu be yẹ ka Joṣefu bi Meri ehọ?— Ehe, iBaibo rẹman ghe ọle wo ka ele ehọ.

Bebhọ uwẹ miẹn luẹ bhi ijiẹmhin nọnsi Jesu?— Ọkhẹke nuwẹ ka ene biẹ ẹ ehọ arẹmiẹn ọbha lẹkhẹ. Uwẹ dẹ lu iriọ?—