Agbejele Nọn Da Gbẹloghe Ọnin Otọ Nan Rebhe

Uwẹ sabọ tare Agbejele nin mhan tẹmhọn lẹn?— Ehe, Agbejele nọnsi Osẹnobulua nọn. Agbejele nọn da ri ọnin otọ nan rebhe kiẹn otọ ọfure. Uwẹ ho nuwẹ luẹ ẹmhọn ọnin Agbejele nan?—

Agbejele rebhe mhọn ojie. Ọnin ojie gbẹloghe ẹbho rebhe ne ribhi ọnin otọ. Uwẹ ki sabọ lẹn ọbhọ Ojie nọnsi Agbejele ọsi Osẹnobulua?— Jesu Kristi nọn. Okhun ọle da nyẹnlẹn. Ẹghe nọn bha re gbe, ọle ki dọ ha gbẹloghe ẹbho rebhe bhi ọnin otọ nan. Uwẹ riale mhan dẹ aghọnghọn, ẹghe nin Jesu are agbẹloghe ọnin otọ nan rebhe?—

Mhan rebhe dẹ wo ha ghọnghọn bhi ọnin otọ ọfure nin! Ranmhude bhi otọ ọfure, okhọn iyẹ da ha ribhọ, ẹbho rebhe ki hoẹmọn-egbe. Ọria soso iyẹ da ha khọnmhọn. Ọria soso iyẹ da yu. Ene ruẹ-ẹlo ki ha daghe, ene yi-ehọ ki ha hẹnmhọn, akhun ki ha khian. Ebale ki kpọa nin ẹbho ha le. Elanmhẹn ki ha nin egbele khiẹnlẹn. Ele ki yẹ ha nin eria khiẹnlẹn. Ene yu fo ki riọkpanọ dọ ha nyẹnlẹn. Eria bii iRebeka, iRehabu, iDevidi bi Ẹlaija nuwẹ luẹ ẹmhọn ele bhi ọnin ebe nan dẹ yẹ riọkpanọ dọ ha nyẹnlẹn. Uwẹ ho nuwẹ min ele ẹghẹ nele ha rẹ riọkpanọ?—

IJehova hoẹmhọn ẹn. Ọle guanọ nuwẹ ha aghọnghọn. Uwẹ ha luẹ ẹmhọn iJehova yẹ ha re obọ rẹkhan uhi nesọle, uwẹ dẹ sabọ nyẹn bhi ghegheghe bhi ọnin otọ ọfure nin. Ọiyi ọnan uwẹ be guanọ?—