ILUẸMHIN 14

Zẹ Ene Ọta Kpataki Egbe Dagbare

Hebrews 8:1

EBI UWẸ HA LU: Rẹkpa ene uwẹ ne talọ rẹ re ehọ rẹkhan ọta nin uwẹ rẹman. Ji ọrebhe daghe ghe, ene ọta kpataki ne ribhi ọne ọta gene diẹn mun uhọnmhọn-ọta nin uwẹ zilo nyan, bi emhin nọn zẹle uwẹ re ọne ọta man.

EBI A RẸ LU ỌLE YẸ:

Lẹn ebezẹle nin uwẹ da ho nin uwẹ re ọne ọta man. Uwẹ ha lẹn ebezẹle nin uwẹ da ho nin uwẹ re ọne ọta man, uwẹ ki re iriọ muegbe ọle. Emhin uwẹ be guanọ nin ele lẹn, la uwẹ be ho nin uwẹ rẹkpa ele rẹọ bhi emhin? Uwẹ be guanọ nin uwẹ re ele ha mhọn ọtibhọ rẹ lu emhin? Ji ene ọta kpataki ne ribhọ rẹman ebezẹle nin uwẹ da re ọne ọta man.

Nọọn egbe uwẹ ene inọnta nan: ‘Bhi ọne uhọnmhọn-ọta nan, be ha sabọ kiẹn idobolo rẹji eria nin mẹn ne talọ? Inọnta nela ele ha sabọ ha mhọn? Ele ha miẹn ewanniẹn rẹji ene inọnta, inọnta nela ki da gbo zegbere?’ Re iriọ mhanmhan ene ọta kpataki ne ribhọ ọta nọnsẹ, nin ene uwẹ ne talọ da sabọ re ehọ rẹkhan ọta nọnsẹ, manman lẹn otọle, yẹ miẹn ọlẹn ọbhi egbe.
Manman sounun bhi uhọnmhọn-ọta nin uwẹ talọ nyan. Bhi ẹghe nin uwẹ ha rẹ ha re ọta nọnsẹ man, sounun bhi uhọnmhọn-ọta nin uwẹ talọ nyan eka igba ne bunbun. Nin uwẹ rẹ lu ọnan, ha sounun bhi ikpọta kpataki ne ribhi ọne uhọnmhọn-ọta ẹghe-ẹghe, la ikpọta ọbhebhe nọn ha sabọ mundia bhi ihe nọnsele.
Re ene ọta kpataki man nọnsẹn bhi uwedẹ nọn lẹkhẹ. Ọta kpataki ne manman rẹtẹ ọne uhọnmhọn-ọta, nin uwẹ ha sabọ rẹ man emhin nọnsẹn bhi ẹghe nan re nin uwẹ, ele uwẹ ha hanọn. Hẹi ji ọta kpataki nin uwẹ ha hanọn bun gbe. Sounun bhi ene ọta kpataki beji ọ ha rẹ khiakhia bhi ehọ. Ahamiẹn uwẹ sounun bhi ọta kpataki ọkpa fo, mundia fo khere uwẹ kuẹ sounun bhi ọbhebhe. Ẹghe nin uwẹ ha rẹ ha sibhi ọkpa re nabhi ọbhebhe, tale beji eveva ha rẹ diẹn kugbe.

Uwẹ sabọ rẹ sounun bhi ene ọta kpataki bhi ẹghe nin uwẹ ha rẹ mun ọne ọta hẹn, bhiriọ, uwẹ ki sabọ rẹkpa ene uwẹ ne talọ rẹ re ehọ rẹkhan ọne ọta. Uwẹ sabọ kie sounun bhi ene ọta kpataki bhi ẹghe nin uwẹ ha rẹ ha kpẹn ọta nọnsẹ, bhiriọ, uwẹ ki sabọ rẹkpa ene uwẹ ne talọ rẹ ye ene ọta kpataki re.