ILUẸMHIN 18

Man Ẹbho Emhin Nin Ele Bha Lẹn Khẹ

1 Corinthians 9:19-23

EBI UWẸ HA LU: Ne ẹbho talọ bhi uwedẹ nin ele ha rẹ ria ẹmhọn ọne uhọnmhọn-ọta nin uwẹ rẹman ele, bhiriọ, ele ki tobele lẹn ghe, uhọnmhọn-emhin ele re ẹghe nọnsele luẹ.

EBI A RẸ LU ỌLE YẸ:

Ria eria nyan emhin nin ene uwẹ ne talọ ka lẹn khẹ. Nin uwẹ rẹ gheghe ha taman eria ebi ele ka lẹn khẹ, rẹkpa ele rẹ daghe ọne uhọnmhọn-ọta bhi uwedẹ ọbhebhe.

Tua talọ nyan emhin nin ene uwẹ ne talọ ka lẹn khẹ. Ọkpakinọn, uwẹ ha ki ha re ebi ele bha sẹ ka lẹn man, hẹi tua tale.
Guanọ otọ ẹmhọn nọnsẹn yẹ ria eria nyan ọlẹn. Ahamiẹn uwẹ ho nin uwẹ re ijiẹmhin rẹ man emhin kpataki, guanọ emhin nọn wo la sunu rẹ lu ijiẹmhin, la emhin nin ene uwẹ ne talọ bha sẹ họn. Ọkpakinọn, ka fẹ ọle ghe nọnsẹn, si ọle gene diẹn obọ mun emhin nin uwẹ ho nin uwẹ re ọle man.

Ẹghe nin uwẹ ha rẹ ha muegbe ọne ọta, nọọn egbe ẹ inọnta bọsi ‘bela, họla, bezẹle, ẹghela, bi ejela.’ Inọnta ne dia inian dẹ rẹkpa uwẹ rẹ ria eria nyan ọne ọta dinmhin. Re iman-mhin nọnsẹ ha lẹnlẹn, beji uwẹ ha rẹ ha nọọn eso bhi ene inọnta nan bhi ẹkẹ ọne ọta rebhe yẹ re ewanniẹn ọbhọ.
Rẹman ọrebhe ebi ele ha rẹ noo ebi ele họn yẹ. Ji ene uwẹ ne talọ lẹn ebi ene ọta nin uwẹ ne dagbare bhi ẹkẹ iBaibo ha rẹ sabọ ha rẹkpa ele yẹ bhi iẹnlẹn ukpẹdẹ-ukpẹdẹ. Talọ nyan idia kẹkẹ nin ene uwẹ ne talọ ha da sabọ re ebi uwẹ ta wẹnna. Yẹ talọ nyan uwedẹ eso nin ẹbho rẹ ghe emhin, bi emhin nin ẹbho lu, nin ene uwẹ ne talọ ha da sabọ miẹn emhin luẹ.