Be Sunu Ji Ọria Nọn Yu?

Ọria nin uwẹ hoẹmhọnlẹn be sẹ yu khẹ? Emhin nọn sẹ iriọ ha sunu, ọ manman wo ba bhi egbe. Ọ sabọ rẹ uwẹ ha riale: ‘Be sunu ji ọria nọn yu? Mhan dẹ kie sabọ miẹn eria nesẹmhan ne yu?’ Bhi ọne uhọnmhọn-ọta nan bi uhọnmhọn-ọta nọn rẹkhan ọlẹn, mhan dẹ zilo nyan ewanniẹn nin Baibo re ọbhi ene inọnta nan.

1. Be sunu ji ọria nọn yu?

Jesu da rẹ uu khọkhọ owe. Be uu rẹ diabe owe yẹ? Ahamiẹn ọria wẹ owe nọn dinmhin, ọle ida lẹn ebe sunu nẹga ọle. Ọria ha yu, ọle iyẹ sabọ họn emhin soso bhi egbe. Ọle iyẹ sabọ ria ẹmhọn imọẹ ọle la ene ribhi azagba-uwa nọnsọle. Baibo yọle ghe “ene yulu bha lẹn emhin soso.”​—Tie Ecclesiastes 9:5.

2. Be ẹmhọanta nin mhan lẹnlẹn rẹji ẹbho ne yu rẹ rẹkpa mhan yẹ?

Ofẹn uu mun ẹbho ne bunbun. Ofẹn ẹbho ne yu yẹ mun ẹbho ne bunbun. Ebi Baibo tale rẹji uu dẹ sabọ rẹ ikoudure nin uwẹ. Jesu yọle ghe ‘ẹmhọanta dẹ miẹn mhan fan.’ (John 8:32) Otu oga eso yọle ghe, ọria ha yu, emhin ribhọ nọn si ọle bhi egbe re dọ ha nyẹnlẹn bhi eje ebhebhe. Ọkpakinọn, Baibo bha ta iriọ. Ọria nọn yu iloya. Sẹyẹ, ranmhude eria ne yu bha lẹn emhin soso, ele ida sabọ kuan mhan. Bhiriọ, ọ bha khẹke nin mhan ha re oga ji eria ne yu, la lu iluemhin kẹkẹ nin ele, ranmhude mhan riale ghe ẹkẹ mhan dẹ ha khọ ele sade mhan bha lu ene emhin nan.

Ẹbho eso yọle ghe, ele sabọ ne eria ne yu talọ. Ọkpakinọn, ohoghe khọnin. Beji mhan luẹle, ene yulu bha lẹn emhin soso. Ene ẹlinmhin ebe, ele manlu bii eria ne yu, ranmhude ele guanọ nin ele hiẹ ẹbho. Bhiriọ, ọria ha yọle ghe ọle sabọ ne eria nesọle ne yu talọ, asabọmiẹn ene ẹlinmhin ebe ọle ne talọ. Ẹmhọanta nin Baibo man mhan le rẹji ẹbho ne yu gbega mhan bhi ufi ọsi ene ẹlinmhin ebe. Jehova taman mhan nin mhan hẹi ha dọnmhegbe rẹ ne ene yu talọ, ranmhude ọle lẹnmhin ghe, ene ẹlinmhin ebe dẹ sabọ na bhi ọne uwedẹ nan kuan mhan.​—Tie Deuteronomy 18:10-12.

3. Luẹ ebe gene sunu ji eria ne yu

Bhi eje kẹkẹ bhi ọne otọ agbọn nan rebhe, ẹbho mhọn emhin kẹkẹ nin ele rẹọ i rẹji ene yu. Ọkpakinọn, emhin rebhe nin ele rẹọ ida sabọ ha yi ẹmhọanta.

• Bhi eji uwẹ da nyẹnlẹn, be ẹbho rẹọ i rẹji eria ne yu?

VIDIO: Be Sunu Ji Ene Yu?​—Ukpọkhere (1:19)

Tie Ecclesiastes 3:20, bha ha zilo nyan ene inọnta nan:

• Beji ọne ulọnlẹn nan tale, be sunu ji ọria nọn yu?

• Ahamiẹn ọria yu, emhin be ribhọ nọn si ọle bhi egbe re dọ ha nyẹnlẹn bhi eje ebhebhe?

Baibo taman mhan ebe sunu ẹghe nin Lazarus nin ọmọẹ iJesu rẹ yu. Beji uwẹ ha rẹ ha tie John 11:11-14, gbẹlokotọ nin uwẹ daghe ebi Jesu tale rẹji idia nin Lazarus ha ye. Bha ha tie ọle fo, bha zilo nyan ene inọnta nan:

• Be iJesu rẹ khọkhọ uu?

• Be ọnan taman mhan rẹji ebe sunu ji ọria nọn yu?

• Uwẹ be riale ẹwanlẹn ribhi ebi Baibo tale rẹji ebe sunu ji ọria nọn yu?

4. Ẹmhọanta nin mhan luẹle rẹji ene yu miẹn mhan fan

Ranmhude mhan lẹn ẹmhọanta rẹji ebe sunu ji eria ne yu, ofẹn ene yu imun mhan. Tie Ecclesiastes 9:10, bha ha zilo nyan ọne inọnta nan:

• Eria ne yu dẹ be sabọ kuan mhan?

Ahamiẹn mhan lẹn ẹmhọanta rẹji ebe sunu ji eria ne yu, mhan ida rẹọbhọ ghe ọkhẹke nin mhan ha ga ele, la ha lu emhin nin ele. Tie Isaiah 8:19 bi Revelation 4:11, bha ha zilo nyan ọne inọnta nan:

• Be uwẹ riale ọ dia iJehova bhi egbe yẹ sade ọle daghe mhan ga eria ne yu la guanọ urẹkpa bhi obọ ele?

5. Ẹmhọanta nin mhan luẹle rẹji ebe sunu ji eria ne yu ko mhan udu re

Oga ne bunbun man ẹbho le ghe, ahamiẹn ọria yu, ọne ọria dẹ loya bhi emhin ebe nin ọle lu ẹghe nin ọle rẹ ha ribhi agbọn. Ọkpakinọn, ọ ti mhan bhọ rẹ lẹn ghe, ọria soso iloya sade ọle yu, aharẹmiẹn ọria nọn manman lu emhin ebe nọn. Tie Romans 6:7, bha ha zilo nyan ọne inọnta nan:

• Baibo yọle ghe, ọria ha yu, Osẹnobulua ki gbe olukhọ nọnsọle kua. Uwẹ be riale ghe Ọle dẹ sẹyẹ ha re oya nanlẹn bhi ene olukhọ?

Beji mhan ha rẹ manman ha lẹn ọria nin Jehova khin, mhan ki do kere ghe ọle iyi Osẹnobulua nọn re oya nin ẹbho ne yu. Tie Deuteronomy 32:4 bi 1 John 4:8, bha ha zilo nyan ene inọnta nan:

• Uwẹ be riale ghe, Osẹnobulua nọn mhọn ikpẹ esili nan tẹmhọnlẹn bhi ene iBaibo nan dẹ ha re oya nin eria ne yu?

• Ọne ẹmhọanta nan nin uwẹ luẹle rẹji ebe sunu ji eria ne yu be ko uwẹ udu re? Bezẹle?

EBI MHAN LUẸLE

Ọria ha yu, iẹnlẹn nọnsọle fo. Ẹbho ne yu iloya. Sẹyẹ, ele ida sabọ kuan mhan.

Uwẹ Be Yẹ Yere?

• Be sunu ji eria ne yu?

• Be ẹmhọanta nin mhan luẹle rẹji ebe sunu ji eria ne yu rẹ miẹn mhan fan yẹ?

• Be ẹmhọanta nin mhan luẹle rẹji ebe sunu ji eria ene yu rẹ re ikoudure nin mhan yẹ?

FẸ ENE EMHIN NAN GHE

Fẹ ebi “oriọn” mundia nan bhi ẹkẹ iBaibo.

“Be hi Oriọn?” (Ebe nọn ribhi jw.org)

Fẹghe si Osẹnobulua gene re oya nin eria ne imhẹn bhi agbọn-eranlẹn.

Agbọn-eranlẹn Gene Ribhọ? (3:07)

Ọ be khẹke nin mhan ha mun ofẹn eria ne yu?

Ene Yu Dẹ Be Sabọ Kuan Mhan La Rẹkpa Mhan? Ele Be Gene Mhọn Ẹlinmhin Nọn Sẹyẹ Nyẹnlẹn? (brokiọ)

Fẹ ebi okpea ọkpa rẹ miẹn ikoudure yẹ, ẹghe nin ọle rẹ luẹ ebe sunu ji ene yu.

“Ewanniẹn Nin Mẹn Miẹn bhi Baibo Da Mun Mẹn Ẹlo Kore” (The Watchtower, February 1, 2015)