Bezẹle Nọn Da Khẹke Nin Uwẹ Re Egbe Guẹ Nin Jehova Yẹ Mianmẹn?

Be a rẹ re egbe guẹ nin Jehova yẹ? Ahamiẹn uwẹ guanọ nin uwẹ re egbe guẹ nin Jehova, uwẹ ki nan erọnmhọn rẹ taman ọlẹn ghe uwẹ muegbe nin uwẹ rẹ mun iho nọnsọle kalo bhi iẹnlẹn yẹ ha ga ọle ọkpa. (Psalm 40:8) Uwẹ ha ve ọne ive nan fo, uwẹ ki mianmẹn. Imianmẹn nọnsẹ ki rẹman ọrebhe ghe uwẹ re egbe ẹ guẹ nin Jehova. Uhọnmhọn-emhin kpataki, ọle iregbeguẹ khin. Ọ dẹ sabọ fi iẹnlẹn ọsi ọria denọ. Be ha re ọria zẹ nin ọle rẹ re egbe guẹ nin Jehova?

1. Be ha re ọria zẹ nin ọle rẹ re egbe guẹ nin Jehova?

Oyẹẹ nin mhan mhọn da iJehova, ọle ha rẹ mhan zẹ nin mhan rẹ re egbe guẹ nanlẹn. (1 John 4:10, 19) Baibo yọle nin mhan re ‘udu rebhe, egbe rebhe, ọkhọle rebhe, bi ahu rebhe rẹ hoẹmhọn iJehova nin Osẹnobulua nọnsẹmhan.’ (Mark 12:30) Ọ iyi unun ọkpa mhan ha rẹ ha yọle ghe mhan hoẹmhọn iJehova. Ọkhẹke nin mhan re ọne oyẹẹ man bhi emhin nin mhan lu. Bhi ọsi ijiẹmhin, okpea bi okhuo ha yọle ghe ele hoẹmhọn egbe, ele ki bọ egbe nin ele rẹ re ọle man. Iriọ yẹ nọn, ahamiẹn mhan hoẹmhọn iJehova, mhan ki re egbe mhan guẹ nanlẹn yẹ mianmẹn.

2. Elele nela eria ne re egbe guẹ nin Jehova miẹn bhi obọ nọnsọle?

Uwẹ ha re egbe guẹ nin Jehova yẹ mianmẹn, uwẹ ki dọ deba agbotu nọnsi Jehova. Ọne agbotu nan manman mhọn okugbe bọsi azagba-uwa. Jehova ki yẹ rẹman uwẹ bhi uwedẹ ne bunbun ghe ọle manman hoẹmhọn uwẹ. Ikolu nin uwẹ bi ọle ko mhọnlẹn ki deziẹn gbera ọnikhẹ. (Tie Malachi 3:16-18.) Jehova ki kiẹn Aba rẹji uwẹ. Rẹ deba ọnin, uwẹ ki dọ ha mhọn ibhio ne bunbun bhi otọ agbọn rebhe, ne hoẹmhọn iJehova yẹ hoẹmhọn uwẹ. (Tie Mark 10:29, 30.) Ọkpakinọn, emhin eso ribhọ ne khẹke nin uwẹ lu ọkuẹsẹ uwẹ sabọ mianmẹn. Ọkhẹke nin uwẹ luẹ ẹmhọn iJehova, nin uwẹ hoẹmhọn ọlẹn, yẹ ha mhọn urẹọbhọ da ọmọn nọnsọle. Ọ yẹ khẹkẹ nin uwẹ re egbe nọnsẹ guẹ nin Jehova. Uwẹ ha lu ene emhin nan rebhe, yẹ mianmẹn, uwẹ ki ha khian bhi odẹ nọn ha re uwẹ miẹn umiẹnfan. Baibo yọle: “Imianmẹn . . . sẹyẹ wo miẹn bha fan.”​—1 Peter 3:21.

MANMAN LẸN OTỌLE NỌNSẸN

3. Imhan rebhe dẹ zẹ osẹ nin mhan ha ga

Bhi ẹghe ẹdẹlẹ, ibhokhan Izrẹl eso da ha riale ghe, ele dẹ sabọ ha ga iJehova yẹ ha ga osẹ ohoghe natiọle Baal. Ọkpakinọn, Jehova da je Elijah nin akhasẹ nọn dọ rẹkpa ele lẹn ghe iria-eria nọn sẹriọ bha gba. Tie 1 Kings 18:21, bha ha zilo nyan ọne inọnta nan:

• Be ibhokhan Izrẹl ha mhọn isẹhoa nin ele rẹ lu?

Bọsi ibhokhan Izrẹl, ọ yẹ khẹke nin mhan zẹ osẹ nin mhan ha ga. Tie Luke 16:13, bha ha zilo nyan ene inọnta nan:

• Bezẹle nan da miẹn ghe, mhan ida sabọ ga iJehova yẹ ha ga osẹ ọbhebhe?

• Be imhan ha rẹ rẹman iJehova yẹ ghe ọle mhan zẹ nin mhan rẹ ga?

4. Ria ẹmhọn ebi Jehova hoẹmhọn uwẹ sẹ yẹ

Jehova sẹ wo re emhin esili ne bunbun rẹ lu ẹsele nin mhan. Be imhan ha sabọ re nanlẹn? Ghe ọne IVIDIO.

VIDIO: Emhin Nin Mhan Ha Sabọ Re Nin Jehova (3:04)

Be hi uwedẹ eso nin Jehova sẹ rẹ rẹman uwẹ ghe ọle hoẹmhọn uwẹ? Tie Psalm 104:14, 15 bi 1 John 4:9, 10, bha ha zilo nyan ene inọnta nan:

• Emhin nela iJehova sẹ lu nin uwẹ, ne manman ti uwẹ bhọ?

• Be emhin nin ọle lu nin uwẹ rẹ rẹso uwẹ yẹ?

Ọria ha re emhin nọn manman yẹẹ mhan rẹ lu ẹsele nin mhan, mhan ki ha guanọ uwedẹ nin mhan ha rẹ rẹman ọlẹn ghe emhin nin ọle lu ti mhan bhọ. Tie Deuteronomy 16:17, bha ha zilo nyan ene inọnta nan:

• Uwẹ ha ria ẹmhọn emhin rebhe nin Jehova sẹ lu nin uwẹ, be ọ dia uwẹ bhi egbe yẹ? Be uwẹ ho nin uwẹ re nanlẹn nin uwẹ rẹ khuẹnmhẹn ọlẹn?

5. Mhan ha re egbe guẹ nin Jehova, ọle ki nan erọnmhọn nin mhan

VIDIO: Bọlu Nan Gbe Mẹn Rẹ Mun Kalo bhi Iẹnlẹn Nọnsẹmhẹn (5:45)

• Bezẹle nin ọne usẹn okpea nan rẹman bhi ọne ividio da zobọ bhi bọlu nan gbe, arẹmiẹn emhin nọn manman yẹẹ ọle nọn?

• Uwẹ be riale emhin esili ọle lu nin ọle rẹ zẹ nin ọle rẹ re ẹdagbọn nọnsọle ga iJehova? Bezẹle nin uwẹ da ta iriọ?

Ọkuẹsẹ Paul nin odibo kiẹn iKristiẹn, ọle ka luẹ uhi ọsi ene iJew bhi obọ ọman-emhin ọkpa nan manman họn ẹmhọn ọlẹn. Ọle da ha khu ọbhi iwẹnna nọn ha re ọle kiẹn okpọria. Ọkpakinọn, ẹghe nin ọle ki rẹ dọ lẹn ẹmhọanta, ọle da fi ikeke gbe ene emhin nan rebhe. Paul be ha kiẹ oya ọbhi emhin nin ọle fi ikeke gbe? Tie Philippians 3:8, bha ha zilo nyan ene inọnta nan:

• Bezẹle nin Paul da ha ghe emhin rebhe nin ọle fi ikeke gbe bọsi “iku”?

• Elele nela ọle miẹn?

• Emhin ọbhebhe be ribhọ nin uwẹ ha re iẹnlẹn nọnsẹ lu, nọn mhẹn gbera nin uwẹ rẹ re ọle ga iJehova? Bezẹle nin uwẹ da ta iriọ?

EBI MHAN LUẸLE

Oyẹẹ nin mhan mhọn da iJehova, ọle hi ebe ha rẹkpa mhan rẹ re egbe guẹ nanlẹn yẹ mianmẹn.

Uwẹ Be Yẹ Yere?

• Bezẹle nin Jehova da yi Osẹ nọn khẹke nin mhan re ọkhọle mhan rebhe ha ga?

• Elele nela mhan ha miẹn bhi obọ iJehova sade mhan re egbe guẹ nanlẹn yẹ mianmẹn?

• Ọ dẹ be yẹẹ uwẹ rẹ re egbe guẹ nin Jehova?

FẸ ENE EMHIN NAN GHE

Fẹghe ebe re okhuo ọkpa nọn ha so illo, bi okpea ọkpa nọn ha gbe ibọlu zẹ nin ele rẹ re egbe guẹ nin Jehova.

Ọta Nin Elasẹre Nọọn​—Be Imhẹn Da Re Ẹdagbọn Nọnsẹmhẹn Lu?​—Ayere (6:54)

Luẹ emhin ebhebhe ne ha rẹkpa uwẹ zẹ nin uwẹ rẹ re egbe guẹ nin Jehova.

“Bezẹle Nọn Da Khẹke Nin Uwẹ Re Egbe Guẹ Nin Jehova?” (The Watchtower, January 15, 2010)

Beji uwẹ ha rẹ ha ghe ọne ividio ọsi illo nan, gbẹlokotọ nin uwẹ daghe ebi ẹbho ne re egbe guẹ nin Jehova rẹ ghọnghọn yẹ.

Mẹn Re Egbe Guẹ Nin Uwẹ (4:30)

Bhi okha nọn yọle: “Mẹn Bha Rẹ Lẹn Ebi Mẹn Dọ Lu bhi Agbọn,” luẹ ebe rẹkpa okhuo ọkpa rẹ zilo nyan ebe gene lu uhọnmhọn-emhin nẹ bhi iẹnlẹn.

“Ẹmhọanta Nọn Ribhi Baibo Fi Iẹnlẹn ọsi Eria Denọ” (The Watchtower, November 1, 2012)