ILUẸMHIN 55
Ha Robọkpa bhi Agbotu Nin Uwẹ Ye
Esali Jehova bhi otọ agbọn rebhe mhọn agbotu kẹkẹ nin ele da ga. Adia nan re nin ele bhi ene agbotu nan manman wo ti ele bhọ. Ele yẹ wo dọnmhegbe nin ele rẹ ha robọkpa bhi ẹkẹ agbotu. Ọ be hu uwẹ bhi udu nin uwẹ rẹ ha robọkpa bhi agbotu nin uwẹ ye?
1. Be hi uwedẹ eso nin uwẹ ha rẹ sabọ noo ẹghe bi ahu nọnsẹ rẹ robọkpa bhi ẹkẹ agbotu?
Imhan rebhe dẹ sabọ robọkpa bhi ẹkẹ agbotu. Bhi ọsi ijiẹmhin, ahamiẹn ibhio mhan ne khọnmhọn, la ibhio mhan ne dọmanlẹn ribhi ẹkẹ agbotu, uwẹ dẹ sabọ ha re iyobọ nin ele rẹ vae bhi ikolo oga. Uwẹ dẹ yẹ sabọ rẹkpa ele bhi uwedẹ ọbhebhe. Bhi ọsi ijiẹmhin, uwẹ sabọ ne ele miẹnsọn eso bhi uwa, la uwẹ dọ rẹkpa ele dẹ emhin bhi ẹki. (Tie James 1:27.) Mhan dẹ yẹ sabọ zegbere nin mhan rẹ deba gbọnọ iKindọn Họọ yẹ re ọle i nọnsẹn. A isua mhan nin mhan rẹ lu ene emhin nan. Oyẹẹ nin mhan mhọn da iJehova bi ibhio mhan, ọle rẹ “mhan zegbere.”—Psalm 110:3.
Eria ne mianmẹn fo dẹ yẹ sabọ rẹkpa agbotu bhi uwedẹ ebhebhe. Ibhio mhan nin ikpea ne sẹle, dẹ sabọ ga bhi ihe ọsi ene ewanlẹn bi ene zẹ sikẹ ene ewanlẹn. Ibhio mhan nin ikpea bi ikhuo dẹ yẹ sabọ lu iwẹnna ọsi ọkanẹfan nin ele rẹ manman robọkpa bhi iwẹnna itẹmhọn Osẹnobulua. Ibhio mhan eso dẹ yẹ sabọ deba bọn uwa oga la ele dọ ha rẹkpa agbotu nọn guanọ urẹkpa.
2. Be imhan ha rẹ sabọ re igho nọnsẹmhan rẹ robọkpa bhi iwẹnna oga yẹ?
Mhan dẹ sabọ re ‘emhin ne ghanlẹn nesẹmhan rẹ ga iJehova.’ (Proverbs 3:9) Ọ manman rẹ mhan ghọnghọn nin mhan rẹ noo igho nọnsẹmhan bi emhin ebhebhe nin mhan mhọn rẹ robọkpa bhi agbotu nin mhan ye, bi iwẹnna itẹmhọn Osẹnobulua nan lu bhi otọ agbọn rebhe. (Tie 2 Corinthians 9:7.) Igho nin mhan re re, ọle a yẹ rẹ robọkpa ibhio mhan nin emhin idunmhuri sunu je. Ibhio mhan ne bunbun fẹkẹ re igho ya, nin ele miẹn rẹ ha robọkpa ẹghe rẹ sẹ ẹghe. (Tie 1 Corinthians 16:2.) Mhan dẹ sabọ re igho ọbhi ẹkpẹti ne ribhi ikolo oga la mhan noo donate.jw.org. Jehova re isẹhoa nin mhan rẹ ha noo igho nọnsẹmhan bhi uwedẹ nọn ha rẹman ghe, mhan hoẹmhọn ọlẹn.
MANMAN LẸN OTỌLE NỌNSẸN
Luẹ ẹmhọn uwedẹ eso nin uwẹ ha rẹ sabọ robọkpa bhi agbotu.
3. Mhan dẹ sabọ re igho nin mhan mhọn rẹ robọkpa bhi iwẹnna oga
Ọria nọn re eghọnghọn ze emhin bhi obọ, ẹmhọn ọlẹn ti Jehova bhọ. Bhi ọsi ijiẹmhin, ẹghe nin Jesu rẹ daghe okhuo nọn iyẹ mhọn ọdọ nọn dọnmhegbe rẹ re igho ọbhi ẹkpẹti arẹmiẹn ghe ọ imhọn igho, ọ da wo manman ti ọle bhọ. Tie Luke 21:1-4, bha ha zilo nyan ene inọnta nan:
Ọ be khẹke nin mhan ha mhọn udede igho, mhan kuẹ sabọ re emhin nin Jehova nọn ha ti ọle bhọ?
Be ọ dia Jehova bi Jesu bhi egbe yẹ, sade mhan re eghọnghọn rẹ ze emhin bhi obọ?
Nin uwẹ rẹ lẹn ebi agbotu rẹ noo igho nin mhan re re yẹ, ghe ọne IVIDIO, bha ha zilo nyan ọne inọnta nan:
Be agbotu rẹ noo igho nin mhan re re yẹ, rẹ lu iwẹnna oga bhi otọ agbọn rebhe?
4. Mhan dẹ sabọ noo ẹghe bi ahu nọnsẹmhan rẹ robọkpa
Bhi ẹghe ẹdẹlẹ, ẹbho ne ga iJehova wo ha wẹnna kaka nin ele rẹ hẹnhẹn uwa oga nọnsi Jehova, yẹ re ọle i nọnsẹn. Ọ iyi igho ọkpa ele gheghe ha re re, nan rẹ ha lu ọne iwẹnna nan. Tie 2 Chronicles 34:9-11, bha ha zilo nyan ọne inọnta nan:
Be ibhokhan Izrẹl rebhe rẹ deba ha hẹnhẹn uwa oga nọnsi Jehova yẹ?
Esali Jehova yẹ wo re obọ rẹkhan ijiẹmhin ọsi ẹbho nesi Jehova bhi ẹghe ẹdẹlẹ. Nin uwẹ rẹ daghe ebi ele rẹ lu ọnan yẹ, ghe ọne IVIDIO, bha ha zilo nyan ene inọnta nan:
Bezẹle nọn da manman khẹke nin Kindọn Họọ nọnsẹmhan khiakhia yẹ ha mhẹn bhi ẹlo?
Be hi uwedẹ eso nin uwẹ ha rẹ deba ha hẹnhẹn ọlẹn?
5. Ibhio mhan nin ikpea dẹ sabọ zegbere nin ele rẹ ha miẹnsọn ne bunbun bhi ẹkẹ agbotu
Baibo yọle nin ikpea ne ribhi agbotu dọnmhegbe nin ele rẹ manman ha miẹnsọn bhi agbotu. Nin uwẹ rẹ miẹn ijanlẹn ọkpa nin Baibo da ta iriọ, ghe ọne IVIDIO. Bha ha ghe ọle fo, bha zilo nyan inọnta nọn rẹkhan ọlẹn.
Beji ọne ividio rẹman, be iRyan lu nin ọle da sabọ manman ha rẹkpa bhi agbotu nin ọle ye?
Baibo taman mhan emhin nan guanọ bhi obọ ọsi ikpea nan ne ọbhi ihe ọsi ewanlẹn bi ene zẹ sikẹ ewanlẹn. Tie 1 Timothy 3:1-13, bha ha zilo nyan ene inọnta nan:
Emhin nela a guanọ bhi obọ ọsi ibhio mhan nin ikpea ne ho nin ele kiẹn ewanlẹn la ene zẹ sikẹ ewanlẹn?
Be a guanọ nin azagba-uwa nọnsele diayẹ?—Fẹ ulọnlẹn 4 bi 11 ghe.
Be ọrebhe bhi agbotu ha rẹ miẹn elele bhọ yẹ, sade ibhio mhan nin ikpea dọnmhegbe rẹ sẹ eria nan ha ne ọbhi ihe ọsi ewanlẹn la ene zẹ sikẹ ewanlẹn?
ỌRIA SABỌ NỌỌN UWẸ YỌLE: “Ejela Esali Jehova da miẹn igho nin ele rẹ lu iwẹnna oga nọnsele?”
Be uwẹ ha rẹ wanniẹn ọlẹn yẹ?
EBI MHAN LUẸLE
Ọ manman ti Jehova bhọ sade mhan re igho nọnsẹmhan, ẹghe nọnsẹmhan bi ahu nọnsẹmhan rẹ robọkpa bhi iwẹnna oga.
Uwẹ Be Yẹ Yere?
Be imhan ha rẹ sabọ re ẹghe bi ahu nọnsẹmhan rẹ robọkpa agbotu nin mhan ye yẹ?
Be imhan ha rẹ ha noo igho nọnsẹmhan rẹ robọkpa agbotu yẹ?
Uwedẹ nela uwẹ guanọ nin uwẹ rẹ ha robọkpa bhi agbotu?
FẸ ENE EMHIN NAN GHE
Luẹ ebezẹle nin Osẹnobulua bha da yẹ yọle nin ẹbho ne ga ọle ha ne obọ ọkpa bhi igbe bhi emhin nin ele mhọn ji ọle.
Ẹsọn eso ribhọ nin Ebenọnkhiale yọle ọkhẹke ikpea ne mianmẹn fo. Ọkpakinọn, ahamiẹn okhuo nọn mianmẹn ho nin ọle miẹn ọne ẹsọn nan, be ọle ha lu yẹ?
Ihe ọsi Ewanlẹn bhi Ẹkẹ Agbotu” (Ọne Ọkhẹughe ọsi, February 2021)
Luẹ ebi ibhio mhan eso rẹ wẹnna kaka yẹ nin ele rẹ gha ebe nesẹmhan ji ibhio mhan bhi otọ iCongo arẹmiẹn ghe ọ bha lẹkhẹ nin ele.
Luẹ ikẹkẹ nọn ribhi uwedẹ nin mhan rẹ miẹn igho nin mhan rẹ lu iwẹnna oga bi uwedẹ nin otuẹ nekẹle rẹ miẹn igho.
“Ejela Esali Jehova Da Miẹn Igho Ne Rẹ Lu Iwẹnna Oga?” (Ebe nọn ribhi jw.org)