ILUẸMHIN 56
Deba Ha Tuẹn Okugbe Nọn Ribhi Agbotu Okhun
Ahamiẹn mhan ribhi ẹwẹ ibhio mhan nin mhan ko ga, ọ sabọ dia mhan bhi egbe bọsi David nọn yọle: “Sẹ ghe! Ebi ọ rẹ manman mhẹn yẹ, bi ebi ọ rẹ manman niẹnniẹn yẹ, nin ibhio rẹ ha nyẹnlẹn kugbe bhi ọfure!” (Psalm 133:1) Okugbe nin mhan mhọnlẹn bha wo tobọle vae. Imhan rebhe wẹnna ọbhọ nin mhan rẹ ha tuẹn ọne okugbe nan okhun.
1. Be hi emhin ọkpa nan rẹ lẹn ẹbho nesi Jehova?
Ahamiẹn uwẹ yo ikolo oga bhi agbaẹbho ọbhebhe, asabọmiẹn uwẹ ida họn urolo nan zẹ bhi ọne agbotu. Ọrẹyiriọ, uwẹ dẹ sẹyẹ wo ha ghọnghọn, ranmhude uwedẹ nin ibhio mhan ha rẹ tuẹ uwẹ mun egbe. Be rẹ mhan mhọn okugbe nọn sẹnian? Ranmhude, bhi otọ agbọn rebhe, emhin ọkpa, ọle Esali Jehova luẹ. Imhan rebhe yẹ wo dọnmhegbe nin mhan rẹ hoẹmhọn ibo mhan. Eji ọ hi ki rẹ khin nin mhan da nyẹnlẹn, mhan rebhe ‘sotie elin nọnsi Jehova, nin mhan da ha re okugbe ga ọle.’—Zephaniah 3:9.
2. Be uwẹ ha lu nin uwẹ rẹ deba ha tuẹn ọne okugbe nan okhun?
“Bha re ọkhọle rebhe rẹ ha mhọn oyẹẹ nọn dinmhin da egbe.” (1 Peter 1:22) Be uwẹ ha rẹ re obọ rẹkhan ọne adia nan yẹ? Ha ria ẹmhọn ikpẹ esili nin ibhio ẹ mhọn, ọ iyi eji ele ida mhẹn. Yẹ dọnmhegbe rẹ ne ibhio mhan kẹkẹ ha muobọ, ọ iwo yi otu ẹ la ibo ẹ ọkpa. Ọ yẹ khẹke nin mhan dọnmhegbe nin mhan rẹ khọn ọkhọle nan rẹ zọn ẹbho.—Tie 1 Peter 2:17.a
3. Be uwẹ ha lu yẹ sade uwẹ bi obhio mhan bhi agbotu ko mhọn ẹmhọn?
Ẹmhọanta nọn ghe mhan mhọn okugbe. Ọrẹyiriọ, ọ bha gba nin mhan fo. Ẹgheso, mhan sabọ rahiẹ ibhio mhan, la ele rahiẹ mhan. Baibo taman mhan nin mhan wo ha “rẹhunmhan ọdeọde.” Ọ da yẹ yọle: “Beji Jehova rẹ re ọkhọle rebhe rẹ rẹhunmhan bha, ọkhẹke nin bha yẹ ha lu iriọ.” (Tie Colossians 3:13.) A ika ekigba nin mhan rahiẹ Jehova. Ọrẹyiriọ, ọle sẹyẹ wo rẹhunmhan mhan. Ọle guanọ nin mhan yẹ ha rẹhunmhan ibhio mhan. Ahamiẹn uwẹ lẹn ghe uwẹ rahiẹ ọria, ọkhẹke nin uwẹ bu ọne ọria nin bha ko ta ọne ẹmhọn ọbhi ekpẹn.—Tie Matthew 5:23, 24.b
MANMAN LẸN OTỌLE NỌNSẸN
Luẹ ebi uwẹ ha sabọ lu nin uwẹ rẹ deba ha tuẹn okugbe nọn ribhi ẹkẹ agbotu okhun.
Be uwẹ ha lu nin uwẹ rẹ khu ọbhi ọfure?
4. Hẹi ha zọn ẹbho
Ọkhẹke nin mhan hoẹmhọn ibhio mhan rebhe. Ọkpakinọn, ọ sabọ ha nọghọ mhan rẹ sikẹ ibhio mhan eso nin mhan riale ghe e bha diabe imhan. Be ha sabọ rẹkpa mhan rẹ ha re ẹlo ọkpa ghe ibhio mhan rebhe? Tie Acts 10:34, 35, bha ha zilo nyan ene inọnta nan:
Unan ẹbho kẹkẹ, ọle Jehova ne nabhi agbotu nọnsọle. Be imhan ha rẹ re egbe khọkhọ ọle yẹ bhi uwedẹ nin mhan rẹ ghe ibhio mhan ne na bhi ije ebhebhe vae?
Bhi eji uwẹ da nyẹnlẹn, be hi emhin eso nọn re ẹbho zọn ọria?
Tie 2 Corinthians 6:11-13, bha ha zilo nyan ọne inọnta nan:
Be uwẹ ha lu nin uwẹ da sabọ manman hoẹmhọn ibhio mhan rebhe?
5. Ha rẹhunmhan, uwẹ ha yẹ ha khu ọbhi ọfure
Jehova irahiẹ mhan. Imhan ọkpa wo rahiẹ ọle ẹghe rebhe. Ọrẹyiriọ, ẹghe rebhe ọle rẹ rẹhunmhan mhan. Tie Psalm 86:5, bha ha zilo nyan ene inọnta nan:
Be ọne iBaibo nan tayẹ rẹji uwedẹ nin Jehova rẹ rẹhunmhan?
Bezẹle nin uwedẹ nin ọle rẹ rẹhunmhan da manman ti uwẹ bhọ?
Be hi emhin eso nọn ha sabọ re ọle nọghọ imhan rẹ khu ọbhi ọfure?
Be imhan ha rẹ re egbe khọkhọ iJehova yẹ, nin mhan da sabọ deba ibhio mhan ha nyẹnlẹn bhi ọfure? Tie Proverbs 19:11, bha ha zilo nyan ọne inọnta nan:
Ahamiẹn ọria lu emhin nọn re ẹkẹ khọ uwẹ, be ha rẹkpa uwẹ rẹ de ọkhọle re?
Ẹgheso, mhan sabọ rahiẹ ibhio mhan. Be imhan ha lu yẹ sade emhin nọn sẹnian sunu? Ghe ọne IVIDIO, bha ha zilo nyan inọnta nọn rẹkhan ọlẹn.
Be obhio mhan nan rẹman bhi ọne ividio rẹ khu ọbhi ọfure yẹ?
6. Ha ria ẹmhọn ikpẹ esili nin ibhio mhan mhọn
Beji mhan ha rẹ ha sikẹ ibhio mhan, mhan ki dọ kere ghe, ele mhọn ikpẹ esili ne bunbun. Ọkpakinọn, mhan dẹ yẹ kere ghe, ele yẹ mhọn eji ele da wẹghẹ. Be ha rẹkpa mhan rẹ denẹlo ọbhi ikpẹ esili nesele? Ghe ọne IVIDIO, bha ha zilo nyan inọnta nọn rẹkhan ọlẹn.
Be ha rẹkpa mhan rẹ ha daghe ikpẹ esili nin ibhio mhan mhọn?
Eji mhan da mhẹn, ọle Jehova ghe. Tie 2 Chronicles 16:9a, bha ha zilo nyan ọne inọnta nan:
Be ọ dia uwẹ bhi egbe yẹ nin uwẹ rẹ lẹn ghe, ikpẹ esili nin uwẹ mhọn Jehova ghe uwẹ mun?
Aharẹmiẹn ukpolika nan re emhin nọn manman ghan lu mhọn eji ọ da kpanọn an, a ire fia, ranmhude emhin nọn ghanlẹn nọn. Iriọ yẹ nọn, arẹmiẹn ọbha gba nin ibhio mhan fo, ele sẹyẹ manman ghan bhi ẹlo nọnsi Jehova
ẸBHO ESO SABỌ YỌLE: “A ha rẹ yọle nan mun ẹmhọn fia, ọ ribhi otọ ẹkẹ.”
Bezẹle nọn da khẹke nin mhan ha rẹhunmhan ẹbho?
EBI MHAN LUẸLE
Uwẹ dẹ sabọ deba ha tuẹn okugbe nọn ribhi agbotu okhun sade uwẹ hoẹmhọn ibhio mhan rebhe yẹ ha rẹhunmhan ele.
Uwẹ Be Yẹ Yere?
Be uwẹ ha lu nin uwẹ rẹ sabọ khọn ọkhọle nan rẹ zọn ẹbho?
Be uwẹ ha lu yẹ sade uwẹ bi ọria bhi ẹkẹ agbotu ko mhọn ẹmhọn?
Bezẹle nin uwẹ da guanọ nin uwẹ ha rẹhunmhan beji Jehova rẹ rẹhunmhan?
FẸ ENE EMHIN NAN GHE
Luẹ ebi arẹkhọkhọ ọkpa nin Jesu noo ha rẹ sabọ rẹkpa mhan yẹ, nin mhan hẹi ha re ẹlo nọn imhẹn rẹ ghe ibhio mhan.
Ọ be khẹke nin mhan dọ bhii ọria nin ọle mun ẹmhọn fia, aharẹmiẹn mhan rẹọbhọ ghe, mhan bha rahiẹ ọle?
Fẹ ebe rẹkpa ẹbho eso rẹ sabọ re obọ ọkpa ha mun ẹbho rebhe.
Luẹ ebi uwẹ ha lu nin uwẹ rẹ jẹje khu ọbhi ọfure ọkuẹsẹ ẹmhọn nin uwẹ bi ọria ko mhọnlẹn si ozughu re bhi ẹkẹ agbotu.
“Re Oyẹẹ Ha Lu Emhin Ahamiẹn Uwẹ bi Ọria Ko Mhọn Ẹmhọn” (The Watchtower, May 2016)
a Ebi A Gbẹn Ba Ọle nọnzi 6 dẹ rẹkpa uwẹ rẹ lẹn ebi ọkhẹke nin mhan rẹ lu emhin yẹ sade mhan mhọn emianmhẹn nin mhan ha sabọ mun nin ọria.
b Ebi A Gbẹn Ba Ọle nọnzi 7 tẹmhọn ebi mhan ha lu yẹ ahamiẹn ẹmhọn zegbere bhi ẹki nin mhan deba obhio mhan do, la mhan bi obhio mhan ko mhọn ẹzọ nọn khẹke nan gui bhi ikotu.