MUNHẸN NE ỌRIA HA ZILO
ILUẸMHIN 4
Ha Mhọn Idegbere
Ebi Baibo Ta Yẹ: “Bha ha mhọn idegbere, bha ha ghe eria nekẹle bii eria ne mhẹn gbera bha.”—Fil. 2:3.
Ijiẹmhin Ọsi Pọl
1. Ghe ọne IVIDIO, la uwẹ ha tie Iwẹnna 26:2, 3. Uwẹ ha lu iriọ fo, re ewanniẹn ọbhi ene inọnta ne ribhi otọle.
Be Pọl rẹ re idegbere man yẹ, ẹghe nin ọle rẹ ha ne Agripa nin Ojie talọ?
Be Pọl rẹ re ogẹn ji Jehova yẹ? Be ọle rẹ rẹman yẹ ghe, ẹmhọn nọn ribhi Ebenọnkhiale ọle man ẹbho le?—Fẹ Iwẹn. 26:22 ghe.
Be Imhan Luẹ Bhi Obọ Pọl?
2. Ahamiẹn mhan re ekpẹn-ekpẹn bi idegbere rẹ ne ọria talọ, ọ ki ha ti ọle bhọ rẹ re ehọ bhi uhọnmhunje nin mhan wewe.
Ebi Mhan Ha Rẹ Re Egbe Khọkhọ Pọl Yẹ
3. Ha re ekpẹn ne ọria talọ. Hẹi ha lu emhin nọn ha re ọria ha riale ghe ọle bha lẹn emhin soso, ghe uwẹ ọkpa lẹn emhin rebhe. Re ekpẹn-ekpẹn rẹ ne ọne ọria talọ.
4. Ji ọ khia bhi ẹlo ghe ẹkẹ Baibo ẹmhọanta nin uwẹ man na vae. Ọta ne ha sabọ rẹso ẹbho bhi ọkhọle, ele ribhi ẹkẹ Baibo. Ahamiẹn mhan noo ọle rẹ ha ne ẹbho zilo, ọ ki rẹkpa ele rẹ ha mhọn urẹọbhọ da Osẹnobulua.
5. De ọkhọle re. Ahamiẹn ọne ọria bha rẹọ bhi ebi uwẹ tale, hẹi kaka unun ọbhọ ha guanọ nin uwẹ rẹman ọlẹn ghe ebi uwẹ tale ọle hi emhin nọn gbale. Mhan ida ha gbugan. Lẹn ẹghe nọn khẹke nin uwẹ rẹ kpanọ, uwẹ ha yẹ re ọkhọle nọn fu rẹ lu emhin. Iriọ uwẹ ha rẹ rẹman ghe, uwẹ mhọn idegbere. (Prov. 17:14; Taitọs 3:2) Ahamiẹn mhan rẹ ọkhọle nọn fu rẹ ne ọria talọ, asabọmiẹn ọle dẹ ka mhan ehọ nọnsẹn ẹdẹ ọbhebhe.