MUNHẸN NE ỌRIA HA ZILO
ILUẸMHIN 6
Ha Mhọn Izebhudu
Ebi Baibo Ta Yẹ: “Osẹnobulua da rẹkpa mhan rẹ ha mhọn izebhudu, beji mhan ha da sabọ dọ ta ọta esili nọnsi Osẹnobulua man bha.”—1 Tẹsẹ. 2:2.
Ijiẹmhin Ọsi Jesu
1. Ghe ọne IVIDIO, la uwẹ ha tie Luk 19:1-7. Uwẹ ha lu iriọ fo, re ewanniẹn ọbhi ene inọnta ne ribhi otọle.
Be ha sabọ re ẹbho eso ha nẹ nin Zakiọs?
Be re Jesu tẹmhọn Osẹnobulua man ọlẹn?
Be Imhan Luẹ Bhi Obọ Jesu?
2. Izebhudu ha rẹkpa mhan rẹ sabọ tẹmhọn Osẹnobulua man unan ẹbho rebhe.
Ebi Mhan Ha Rẹ Re Egbe Khọkhọ Jesu Yẹ
3. Mun udu nyan Jehova. Ẹlinmhin nọn khiale nọnsi Osẹnobulua, ọle rẹkpa Jesu rẹ ha tẹmhọn Osẹnobulua. Ọne ẹlinmhin dẹ yẹ sabọ rẹkpa ẹ. (Mat. 10:19, 20; Luk 4:18) Bhii Jehova nin ọle re izebhudu nin uwẹ rẹ tẹmhọn ọlẹn man ẹbho nin ofẹn ele mun uwẹ.—Iwẹn. 4:29.
4. Hẹi ha ghe ẹbho eso bii eria ne ida kaehọ. Ẹgheso, asabọmiẹn mhan ida guanọ nin mhan ne ẹbho eso zilo bhi Baibo, ranmhude ebi ele dia yẹ bhi ẹlo mhan, ihe nin ele ye, ebi ele mhọn igho sẹ yẹ, uwedẹ iẹnlẹn nọnsele, la oga nin ele ye. Ọkpakinọn, ọkhẹke nin mhan yere ghe:
Mhan bha lẹn ọkhọle ọsi ọria. Jehova bi Jesu ọkpa lẹn ebe ri ọria bhi ọkhọle.
Ebi iẹnlẹn ọsi ọria ki rẹ khọ sẹ yẹ, Jehova dẹ sabọ rẹkpa ọle rẹ fidenọ.
5. Hẹi ji ofẹn mun uwẹ, sokpan, re ẹwanlẹn bi ekpẹn rẹ lu emhin. (Mat. 10:16) Hẹi deba ọria ha gbugan. Ahamiẹn uwẹ riale ghe, ọria nin uwẹ ne zilo dẹ sabọ kuan uwẹ, la ọ bha muegbe nọn rẹ kaehọ, fẹkẹ zẹ ọle obọ.—Prov. 17:14.