Ọta Nin Eria Ne Tie Ebe Nesẹmhan Nọọn

Rẹji uhi nin Baibo gbe bhi uwedẹ nọn khẹke nan rẹ ha noo aranlẹn, be Esali Jehova rẹ ghe uwedẹ nan rẹ gbẹloghe egbe nan da noo aranlẹn ọsi ọria yẹ?

Nin mhan rẹ gheghe wo lu beji ọ rẹ yẹẹ mhan, la lu rẹkhan ebi ekhẹn dọkitọ taman mhan, ọkhẹke nin ọdeọde bhi ẹwẹ ene rẹkhan Jesu fẹ ebi Baibo tale bhi ọne ẹmhọn nan. Ẹmhọn nọn rẹtẹ ọdeọde bi Jehova ọnan khin.

Jehova nọn re iẹnlẹn nin mhan yọle ghe, nin mhan hẹi ha le aranlẹn. (Genesis 9:3, 4) Bhi uhi nin Osẹnobulua gbe nin ibhokhan Izrẹl bhi ẹghe ẹdẹlẹ, ọle da taman ele ebi ele ha rẹ ha noo aranlẹn yẹ, ranmhude aranlẹn mundia nin iẹnlẹn. Osẹnobulua da yọle: “Ranmhude, iẹnlẹn ọsi efun ribhi ẹkẹ aranlẹn. Imẹn tobọmhẹn re ọle ọbhi ukhuo-izọese nin bha, nin bha rẹ ha zọese ọbhi emhin ebe nesẹbha.” Ahamiẹn ọria gbe elanmhẹn an nin ọle rẹ nyẹn ebale kii? Osẹnobulua da yọle: “Ọle ha da ọle aranlẹn ọbhi otọ yẹ re ekẹn gue ọle.”a (Leviticus 17:11, 13) Igba ne bunbun Jehova gbe ọne uhi nan. (Deuteronomy 12:16, 24; 15:23) Ebe ọkpa ọsi ibhokhan Jew nọn tẹmhọn uhi ọsi Moses da yọle: ‘Nan hẹi mun one aranlẹn ya, nan hẹi noo ọle, sokpan nan gbe ọle ku ọbhi otọ.’ Ọ bha khẹke nin obhokhan Izrẹl soso daa aranlẹn mun ya, la noo aranlẹn ọsi emhin nọn nyẹnlẹn nọn hi ki rẹ khin nin Osẹnobulua nyan iẹnlẹn nọnsọle.

Ẹmhọanta nọn ghe uyumhin nọnsi Jesu re ọkpẹnlẹn ọbhi uhi ọsi Moses. Ọrẹyiriọ, ẹlo nọn ghanlẹn nin Osẹnobulua rẹ ghe aranlẹn bha fidenọ. Ẹlinmhin nọn khiale nọnsi Osẹnobulua bhọ rẹkpa ene etuegbe rẹ ji Kristiẹn lẹn ghe nin ele re egbe nẹ bhi aranlẹn. Uhi nọn manman kaka ọne uhi nan khin. Ọ lu uhọnmhọn-emhin sẹ bii nin ọria rẹ re egbe nẹ bhi igabọ bi igboghẹ. (Acts 15:28, 29; 21:25) Ẹghe nan rẹ khọn okhọn nọnzeva nin agbọn rebhe kugbe khọn fo, nin nan rẹ ha mun aranlẹn nin ọria la nan rẹ ha si aranlẹn ọbhi egbe rẹ kpọa, Esali Jehova lẹn ghe emhin nọn sẹriọ bha diẹn mun ebi Baibo tale.b

Dọkitọ sabọ rẹ taman ọria nọn khọnmhọn ghe nan si aranlẹn nọnsọle mun ya ọkuẹsẹ a lu ọle ọpreshọn, beji a ha da miẹn ghe emhin ha zegbere sade a lu ọle ọne ọpreshọn, a ki miẹn aranlẹn nọnsọle si ọle bhi egbe. Ọkpakinọn, uwedẹ nọn sẹnian nan rẹ noo aranlẹn bha diẹn mun uhi nin Osẹnobulua gbe bhi ẹmhọn aranlẹn nọn ribhi ebe ọsi Leviticus bi Deuteronomy. Aranlẹn iyi ebi a daa mun ya, ọ khẹke nan gbe ọle kua. Bhiriọ ọ ki diabi ghe ọ fikie bu Osẹnobulua nọn nyanlẹn. Ẹmhọanta nọn ghe ẹlẹnan nian mhan iyẹ ribhi odotọ uhi ọsi Moses, ọrẹyiriọ, ẹlo nọn ghanlẹn Esali Jehova rẹ ghe aranlẹn beji Jehova yẹ rẹ ghe ọle. Sẹyẹ, ele muegbe nin ele rẹ re egbe nẹ bhi aranlẹn. Ranmhude ọnan, mhan isi aranlẹn nọnsẹmhan nin ọria, sẹyẹ mhan isi aranlẹn nọnsẹmhan mun ya kie dọ ha noo ọle. Uwedẹ nọn sẹnian nan rẹ noo aranlẹn bha diẹn mun uhi nọnsi Osẹnobulua.

Uwedẹ eso ribhọ nin Baibo bha tẹmhọnlẹn nin dọkitọ ha rẹ sabọ noo aranlẹn ọsi ọria. Bhi ọsi ijiẹmhin, Kristiẹn ne bunbun ji dọkitọ da si aranlẹn nọnsele rẹ fẹghe si ele mhọn emianmhẹn bhi egbe. Ele ha noo ọle fo, ele ki biri ọne aranlẹn kua. Uwedẹ ebhebhe yẹ ribhọ nan rẹ gbẹloghe egbe nan da noo aranlẹn ọsi ọria nin dọkitọ ha sabọ tẹmhọnlẹn man mhan.

Bhi ọsi ijiẹmhin, dọkitọ da ha lu ọpreshọn eso, ele ki si aranlẹn eso sibhi egbe ọsi ọria re diọbhi machine, aranlẹn nọn ki kẹre bhi egbe ọsi ọne ọria, ele ki sa emhin ba ọle. Ele a ki lu ọne ọpreshọn fo, ele ki si aranlẹn nọn ribhi ọne machine fikie egbe ọsi ọne ọria. Ọnan Ebo tiọle hemodilution. Uwedẹ ọbhebhe sẹyẹ ribhọ nin Ebo tiọle cell salvage. Bhi ọne uwedẹ nan, a ha miẹn a lu ọria ọpreshọn, a ki lu ọle nin aranlẹn nọn nẹ sibhi egbe ọle re, ha nẹ diọbhi machine. Ọne machine ki sẹn ọne aranlẹn an, bhiriọ, a ki si ọne aranlẹn fikie egbe ọsi ọne ọria. Bhi uwedẹ ọbhebhe nan rẹ gbẹloghe egbe, a ki si aranlẹn ọsi ọria nọn khọnmhọn diọbhi machine nọn wẹnna beji udu bi efẹn ọsi ọria rẹ wẹnna. Ọne machine aranlẹn ha ki da ha nabhi ije kẹkẹ bhi egbe ọsi ọne ọria. A ha ki gbẹloghe ọne ọria fo, a ki si ọne aranlẹn fikie egbe nọnsọle. Uwedẹ ọbhebhe sẹyẹ ribhọ. Bhi ọne uwedẹ nan, a ki lu ọle nin aranlẹn ọsi ọria ha nẹ diọbhi machine natiọle centrifuge. Ọne machine nan ki wa ọne aranlẹn diọbhi obọle kẹkẹ beji a ha da sabọ ne itọn bi emhin ne imhẹn sibhi ẹkẹ ọle re, la beji a ha da sabọ sa ọle diọbhi eji ọbhebhe bhi egbe. Bhi idia eso ebhebhe, dọkitọ sabọ rẹ manman si aranlẹn sibhi egbe ọria re, sa ikhunmhun la emhin ọbhebhe ba ọle, yẹ kie si ọle ọne ọria bhi egbe.

Uwedẹ ne bunbun nan rẹ gbẹloghe ọria wo ribhọ, iriọ ekhẹn dọkitọ yẹ rẹ zẹ uwedẹ ọsọgbọn dagbare ẹghe rebhe. Mhan imhọn ọne ahu rẹ taman ọria ebi ọle ha lu yẹ sade ọle ka egbe ọle re bhi ene idia nan kẹkẹ. Bhi ẹmhọn nan rẹ gbẹloghe egbe la bhi ẹmhọn ọpreshon, Kristiẹn ha tobọle zẹ uwedẹ nin ọle guanọ nan rẹ gbẹloghe ọle. Ọ kuẹsẹ a lu ọle ọpreshọn la a gbẹloghe ọle, ọ khẹke nin ọle ka nọọn ọne dọkitọ ebi a ha rẹ re aranlẹn nọnsọle rẹ khian yẹ sade a gbẹloghe ọle, ẹghẹnin, ọle ki zẹ ebi ọle ha lu beji ọkhọle nọnsọle rẹ mun ọlẹn. (Fẹ ẹkpẹti ghe.)

Ọkhẹke nin Kristiẹn yere ghe ọle ve nin Osẹnobulua ghe ọle dẹ ga ọle, sẹyẹ ọle dẹ re udu rebhe, egbe rebhe bi ọkhọle rebhe rẹ hoẹmhọn ọlẹn. (Luke 10:27) Ẹlo nọn ghanlẹn Esali Jehova rẹ ghe ikolu nọn mhẹn nin ele bi Jẹhova ko mhọnlẹn. Jehova nọn re iẹnlẹn nin mhan yọle ghe nin mhan ha mhọn urẹọbhọ da izọese nọnsi Jesu. Ephesians 1:7 yọle ghe “Rẹ na bhi obọ ọle mhan da miẹn umiẹnfan ranmhude izọese nan re aranlẹn nọnsọle lu. Ehe, urẹhunmhan ọsi olukhọ nesẹmhan.”

[Ebi a gbẹn ọbhi otọle]

[Ẹkpẹti/Adudu]

INỌNTA ESO NE KHẸKE NIN UWẸ NỌỌN EGBE Ẹ

Ahamien dọkitọ si aranlẹn eso sibhi egbe nọnsẹmhẹn re, sa ọle ọbhi emhin, mẹn dẹ yẹ ka ji a da si ọle fikie mẹn bhi egbe, la mẹn dẹ ha ghe ọle bii aranlẹn nọn khẹke nan biri kua?

Ọkhọle nọnsẹmhẹn dẹ be ha kpokpo mẹn sade ẹghe nan rẹ ha gbẹloghe mẹn, mẹn ji a da si aranlẹn si mẹn bhi egbe re, sa ikhunmhun ba ọle yẹ kie si ọle fikie egbe nọnsẹmhẹn?