Okha Nọn Manman Lu Uhọnmhọn Emhin

Bhi ọne agbọn nan rebhe, ebe ọbhebhe iribhọ nọn diabe Baibo. Ebe ọbhebhe iribhọ nọn sẹ rẹso ẹbho sẹ bii Baibo. Sẹyẹ, ebe ọbhebhe iribhọ nin ẹbho sẹ guanọ otọ ọle sẹ bii Baibo.

Bhi ọsi ijiẹmhin, ẹbho eso ne guanọ otọ emhin fẹghe bha rẹọbhọ ghe ẹmhọn nọn ha ribhi Baibo nan ka gbẹn, ọle ribhi Baibo nin mhan noo ẹlẹnan. Ọkpa bhi ẹwẹ ele da yọle: “Mhan ida sabọ rẹọbhọ ghe ẹmhọn nọn ha ribhi Baibo nin ọhẹnhẹn, ọle ribhi Baibo nan noo ẹlẹnan. Emhin ne bha gba wo vuọn Baibo nin ẹbho noo ẹlẹnan. Ẹmhọn nọn ribhi ẹkẹ ele wo manman dikẹ bhi ẹmhọn nọn ribhi Baibo nan ka gbẹn.”

Ẹbho eso yẹ ribhọ ne bha rẹọ bhi Baibo ranmhude uwedẹ oga nan rẹ bẹẹ ele wanre. Bhi ọsi ijiẹmhin, ene biẹ okpea ọkpa natiọle Faizal, da taman ọlẹn ghe, arẹmiẹn ghe ebe nọn khiale Baibo khin, ẹbho fi emhin ne bunbun denọ bhi ẹkẹ ọle. Faizal da yọle: “Ranmhude ọnan, ẹbho ha rẹ yọle ghe ele ho nin ele ne mẹn zilo bhi Baibo, mẹn ida gbaẹkẹ ẹmhọn nin ele taman mẹn, ranmhude mẹn rẹọbhọ ghe ẹmhọn nọn ribhi Baibo bha gba.”

Ọ be rẹtẹ mhan si ẹmhọn nọn ribhi Baibo fidenọ la ọ bha fidenọ? Ehe. Ọ wo manman rẹtẹ mhan. Bhi ọsi ijiẹmhin, uwẹ dẹ be sabọ rẹọ bhi ive nin Baibo vele rẹji ẹghe odalo sade uwẹ bha lẹn si ẹmhọn nọn ribhi Baibo gene gba? (Romans 15:4) La, uwẹ dẹ be sabọ noo adia ne ribhi ẹkẹ ọle bhi iẹnlẹn nọnsẹ bi oga nin uwẹ ga sade emhin ne bha gba vuọn iBaibo nin mhan noo ẹlẹnan?

Arẹmiẹn ghe Baibo nin ọhẹnhẹn nan ka gbẹn iyẹ ribhọ ẹlẹnan, Baibo ne bunbun nin ẹbho noolo bhi ẹghe ẹdẹlẹ sẹyẹ wo ribhọ. Arẹmiẹn ghe emhin ne kẹ riia ọle a gbẹn ene iBaibo nan fiọ, sẹyẹ, ẹbho eso rẹ ha guanọ nin ele khue ele lo, la fi emhin eso denọ bhi ẹkẹ ele, ene iBaibo nan da sẹyẹ tọ sẹbhi ẹghe nọnsẹmhan. Be ọnan rẹ sabọ sunu yẹ? Be uwedẹ nin Baibo rẹ sabọ tọ sẹbhi ẹghe nọnsẹmhan ha rẹ sabọ rẹkpa mhan rẹ mun udu nyan Baibo nin mhan noo ẹlẹnan yẹ? Ji mhan zilo nyan ene inọnta nan.