Ẹsele Nela Mhan Ha Sabọ Lu Nin Jehova?

Jesu taman mhan yọle: “A ha re emhin bhi obọ re, ọle eghọnghọn ye gbera a ha miẹn emhin bhi obọ.” (Acts 20:35) Ọne ọta nin Jesu tale nan diẹn mun ikolu nin mhan bi Jehova ko mhọnlẹn. Mhan ta iriọ ranmhude, arẹmiẹn mhan miẹn eghọnghọn bhi emhin kẹkẹ nin Jehova rẹ nin mhan, eghọnghọn nin mhan mhọnlẹn dẹ tuẹn okhun sade mhan zẹ emhin bhi obọ nin Jehova. Emhin nela mhan ha sabọ re nin Jehova? Proverbs 3:9 yọle: “Ne emhin ne ghanlẹn nesi uwẹ rẹ ga iJehova.” Eso bhi emhin ne ghanlẹn nesẹmhan hi, ẹghe nọnsẹmhan, iwẹnna obọ nọnsẹmhan, ahu nọnsẹmhan, bi igho la emhin nin igho dẹ nin mhan mhọnlẹn. Ahamiẹn mhan noo ene emhin nan rẹ tuẹn oga ẹmhọanta okhun, Jehova mhan lu ọne ẹsele nan. Bhiriọ, mhan ki miẹn eghọnghọn nọn khua.

Be ha rẹkpa mhan nin mhan hẹi ha yelea rẹ re igho la emhin nin igho sabọ dẹ nin mhan mhọnlẹn nin Jehova? Paul nin odibo taman ibhokhan iCorinth ghe, nin ele ha re emhin ya nin ele rẹ ha rẹkpa iwẹnna oga. (1 Cor. 16:⁠2) Be ha rẹkpa ẹ lẹn uwedẹ nin uwẹ ha rẹ sabọ zẹ emhin bhi agbaẹbho nin uwẹ ye? Huẹan, tie ẹkpẹti nan gbẹn ọbhi otọle.

Bhi agbaẹbho eso, a isabọ noo intanẹti rẹ zẹ emhin bhi obọ. Ọkpakinọn, obọle nan gbẹn “Donations” ọi tẹmhọn uwedẹ ebhebhe nin uwẹ ha rẹ sabọ zẹ emhin bhi obọ. Bhi agbaẹbho eso, ebe a yẹ gbẹn ọbhi enin dẹ rẹkpa ẹbho miẹn ewanniẹn rẹji inọnta nin ele mhọn bhi ọkhọle rẹji emhin nan zẹ bhi obọ.