Uwẹ Be Rẹ Lẹn?

Be bhọ hi iwẹnna ọsi ọnọn gbẹloghe uwa (steward) bhi ẹghe ẹdẹlẹ?

BHI ẹghe ẹdẹlẹ, ẹbho ki ha re ọria mundia nọn ha gbẹloghe uwa la emhin uku nọnsele. Ọria nọn sẹ iriọ a tiọle “ọnọn gbẹloghe uwa.” Ukpọta bhi urolo iHebrew bi Greek nan zedu ọle kiẹn “ọnọn gbẹloghe uwa,” a dẹ yẹ sabọ zedu ọle kiẹn “ọwanlẹn nọn gbẹloghe.”

Ẹghe nin Joseph nin ọmọn nọnsi Jacob rẹ ha yi igbọn bhi otọ Egypt, ebeanlẹn ọlẹn da re ọle mundia nọn ha gbẹloghe uwa nọnsọle. Bhi ọsi ẹmhọanta, ọle da zẹ emhin rebhe ne ribhi uwa nọnsọle obọ nin Joseph. (Gen. 39:2-6) Ẹghe nin Joseph ki yẹ rẹ kiẹn ọkpa bhi ene gbẹloghe Egypt, ọle da yẹ re ọria mundia nọn ha gbẹloghe uwa nọnsọle.—Gen. 44:4.

Ẹghe nin Jesu rẹ ha ribhi ọne otọ nan, eji ẹbho eso da mun ugbo bha sikẹ eji ele da nyẹnlẹn. Bhiriọ, ele ki re ọria mundia nọn ha rẹkpa ele gbẹloghe iwẹnna ukpẹdẹ-ukpẹdẹ nan lu bhi ọne ugbo.

Ọria nela a sabọ re ọbhi ọne ihe nan? Ọ-gbẹn-ebe ọkpa natiọle Columella nin obhokhan iRome bhi ore nin ọhẹnhẹn da yọle ghe, ahamiẹn a ho nan re igbọn kiẹn ọnọn gbẹloghe uwa, ọne igbọn dẹ ha yi ọria nọn ki manman guẹ ọne iwẹnna nọnsẹn. Ọle da yẹ tale ghe, ọne igbọn dẹ ha yi ọnọn ha sabọ re ẹbho nekẹle lu iwẹnna nọn khẹke ele, sokpan, ọle ida ha to mun ele. Ọle da yọle ghe, ebe ke okhun nẹ nan guanọ bhi obọ nọnsọle hi, ọle ki ha yi ọria nọn muegbe rẹ luẹ emhin, ọle ida ha riale ghe ọle lẹn emhin rebhe.

Bhi Baibo, Osẹnobulua da re iwẹnna ọsi ọnọn gbẹloghe uwa rẹ khọkhọ iwẹnna eso nin Kristiẹn lu bhi ẹkẹ agbotu. Bhi ọsi ijiẹmhin, Peter da taman iKristiẹn nin ele noo ahu nin Osẹnobulua re nin ele rẹ ha rẹkpa ọdeọde.—1 Pet. 4:10.

Jesu da tẹmhọn ọnọn gbẹloghe uwa bhi ijiẹmhin nin ọle tẹmhọnlẹn bhi Luke 16:1-8. Sẹyẹ, ẹghe nin ọle rẹ ha ta ọta ọkhasẹ rẹji ẹghe nin ọle ha rẹ kiẹn Ojie, ọle da tale ghe, ọle dẹ re “ọguọmhandia nọn mhọn ẹwanlẹn nan gba ẹkẹ ọle,” la ọnọn gbẹloghe uwa mundia nọn ha re ebale oriọn nin ẹbho nesọle bhi ẹghe ọkike. (Matt. 24:45-47; Luke 12:42) Ọ ti mhan bhọ ghe, ebe nin ọne ọguọmhandia nan rẹ zẹ ebale oriọn egbe dagbare wo sẹ mhan obọ.