Uwẹ Noo Ebe Nanrẹ Taman Ẹbho Ẹmhọn i JW.ORG Nọnsẹn?

Iwẹnna nan ha re ẹjiẹje lu, ọle hi iwẹnna itẹmhọn Osẹnobulua nọn sẹmhan ranmhude ẹghe ekpokpo nọn khua sire. (Pr 24:11, 12, 20) Nin mhan rẹ miẹnkpa ẹbho, mhan sabọ noo ebe nanrẹ taman ẹbho ẹmhọn jw.org/ish rẹ denọ ele ọkhọle diọ bhi Baibo bi wẹbsaiti nọn sẹmhan. Kodi ribhi ọne ebe nọn ha sabọ re ọria diọ bhi ọne ividio Bezẹle Aluẹ IBaibo? A yẹ tale bhi ọne ebe ghe, ọne ọria sabọ gbẹn re rẹ nọọn ọta, la nan dọ ha manlẹn iBaibo. Ẹbho eso ribhọ ne iho ne miẹn mhan ebe, sokpan ọdẹ yẹ ele rẹ fẹ wẹbsaiti nọn sẹmhan ghe. Hẹi siegbe nurẹ rẹ ọne ebe nele. Ọrẹyiriọ, hẹi ne ọne ebe nan nin eria ne iho ne ka mhan ehọ.

Beji uwẹ are ha lu ilonmhọn ukpẹdẹ, uwẹ sabọ taman ọria: “I mhọn emhin nin ho nin re niẹn. Ọne ebe nan dẹ taman ẹn ẹmhon wẹbsaiti nuwẹ ada miẹn vidio bi ebe nan gbẹn bhi uhọnmhọnta kẹkẹ.” (Joh 4:7) Ranmhude ene ebe dia khere khere, uwẹ dẹ sabọ ne eso mhọn ẹghe rebhe nuwẹ da ne nin ẹbho.