Ha Re Ẹwanlẹn Noo Ebe Nesẹmhan

Jesu tale ghe: ‘Ọsọhẹ arẹ re niẹn, yẹ ha re nin ẹbho ọsọhẹ.’ (Mt 10:8) Ọne adia nan zẹle nin mhan ida hian igho ọbhi ebe bi Baibo nin mhan ne nin ẹbho. (2Co 2:17) Ọkpakinọn, ẹmhọn-ata nọnsi Osẹnobulua ribhi ene ebe nan. A manman miẹnsọn yẹ noo igho ọbhọ nanrẹ gbẹn ene ebe nan, yẹ gha ele diọ bhi agbotu kikẹ bhi otọ agbọn nan rebhe. Bhiriọ, ene mhan ha sabọ noo, ele ọkpa ọkhẹke nin mhan ne.

Re ẹwanlẹn ha ne ene ebe nan nin ẹbho, arẹmiẹn uwẹ ribhi iwẹnna itẹmhọn Osẹnobulua nan da re ebe waa. (Mt 7:6) Hẹi wo ha ne ene ebe nan nin ọnọn iki rẹ ha gbera. Ka nin ọne ọria zilo nin uwẹ da sabọ lẹn si ọne ọria dẹ gene tie ene ebe. Noo inọnta ne ribhi ọne ẹkpẹti nọn ribhi ọbera bhi ọne apapale nan rẹ fẹghe si ọne ọria dẹ tie ọne ebe. Arẹmiẹn ukpọkpa ọle lu bhọ, uwẹ sabọ re ọne ebe nanlẹn. Ahamiẹn uwẹ bha sabọ lẹn si ọne ọria dẹ gene tiọle, re itirat nanlẹn. Ọrẹyiriọ, ahamiẹn ọne ọria tobọle taman ẹn nin uwẹ rẹ ebe uki-uki la ebe ọbhebhe nọnsẹmhan nanlẹn, uwẹ ha re nanlẹn.​—Pr 3:27, 28.