Guẹ Ebi A Rẹ Lu Iwẹnna Itẹmhọn Osẹnobulua Yẹ—Nin Ẹbho Rebhe Talọ bhi Eji Mhan Da Tẹmhọn Osẹnobulua

EBEZẸLE NỌN DA YI EMHIN NỌN KHẸKE:Zechariah nin akhasẹ da tale ghe ẹbho ne nanbhi urolo kẹkẹ bhi agbaẹbho rebhe dẹ dọ ha rehọ bhi ọta nọn mhẹn ọsi Agbejele. (Zec 8:23) He bhọ da ha man ele emhin? (Ro 10:13-15) Imhan nọn! Imhan iJehova je ne dọ tẹmhọn Agbejele man ẹbho rebhe ne ribhi idunmhun nin mhan da tẹmhọn Osẹnobulua.—od 84 ¶10-11.

EBI A RẸ LU ỌLE YẸ:

• Muegbe nọnsẹn. Ahamiẹn uwẹ kẹ miẹn ẹbho ne zẹ urolo ọbhebhe, uwẹ sabọ re JW Language app rẹ luẹ ebi arẹ re ọne urolo tẹmhọn Osẹnobulua yẹ. Uwẹ sabọ yẹ re foni la tablẹti nọnsẹ rẹ rẹman ọne ọria eji ọle ha da miẹn ebe bi vidio bhi urolo nọnsọle bhi jw.org

• Ha gbẹlokotọ. Ahamiẹn uwẹ tẹmhọn Osẹnobulua nanbhi ukuwa rẹsi ukuwa, sẹyẹ re isẹhoa rebhe nin uwẹ miẹn rẹ tẹmhọn Osẹnobulua. Uwẹ sabọ nin ẹbho ne gbera la ẹbho ne dotua bhi ẹkẹ imoto talọ. Ahamiẹn itẹmhọn Osẹnobulua nan lu bhi ughe uwẹ ye, sẹyẹ ha mhọn ọle bhi ọkhọle nin uwẹ rẹ nin ẹbho talọ

• Re ọkhọle rebhe ha wẹnna kaka. Guanọ uwedẹ kẹkẹ nin uwẹ rẹ miẹn eria nin uwẹ bha kere bhi uwa. Uwẹ sabọ fikie diọ bhi ọne uwa bhi ẹdẹ uzana ọbhebhe la ẹghe ọbhebhe si uwẹ dẹ ke ọne ọria re bhi uwa. Uwẹ sabọ gbẹn ilẹta ji ọne ọria, la uwẹ tie ọle bhi foni. Asabọ yẹ miẹn ghe uwẹ miẹn ọne ọria bhi uwedẹ ne talọ

• Hẹi lu ọne iwẹnna ukhiọnmhẹn mun fia. Kẹ fikie bu ọria nọn kaehọ. Ahamiẹn urolo ọbhebhe ọne ọria zẹ, guanọ obhio mhan nọn zẹ ọne urolo nọn ha sabọ rẹkpa ọle. Ọkuẹsẹ uwẹ miẹn ọria nọn zẹ urolo nọnsọle, sẹyẹ ha fikie bu ọne ọria.—od 94 ¶39-40

GHE ỌNE IVIDIO NATIỌLE ITẸMHỌN OSẸNOBULUA BHI EJE MANMAN REE. BHA HA KI GHE ỌNE IVIDIO FO, RE EWANNIẸN ỌBHI ENE INỌNTA NAN:

• 

  Be bhọ ene ibhio mhan nan rẹ muẹgbe yẹ ọkuẹsẹ ele ha khian eje manman ree nin ele dọ tẹmhọn Osẹnobulua man ẹbho ne ribhi enin? (1Co 9:22, 23)

• 

  Ọnọghọ nela ele miẹn?

• 

  Elele nela ele miẹn bhọ?

• Be uwẹ ha sabọ lu nin uwẹ rẹ sabọ tẹmhọn Osẹnobulua man ẹbho gbera ọnikhẹ yẹ?