UNYẸNMHIN NỌN KHẸKE ENE RẸKHAN IJESU
Ebi A Rẹ Ha Kuobọgbe Tẹmhọn Osẹnobulua Yẹ bhi Eji Ẹbho Da Zẹ Urolo Kẹkẹ
Ọ wọ kẹ rẹso ẹbho bhi ọkhọle sade ele họn ẹmhọn nọnsi Osẹnobulua bhi urolo nọnsele. Asabọ miẹn ghe ọnan zẹle nin Jehova da lu ọle nin edibo nesi Jesu re urolo kẹkẹ rẹ tẹmhọn Osẹnobulua man ẹbho bhi ukpẹdẹ iluẹmhin ọsi Pentecost 33 C.E. Arẹmiẹn ghe ene ẹbho nan sabọ yẹ ha họn urolo iHebrew la urolo Greek, Osẹnobulua da lu ọle nin ele sẹyẹ họn ẹmhọn nọnsọle bhi urolo nọnsele tee. (Ac 2:5, 8) Bhi ẹghe nọnsẹmhan ẹlẹnan, eje eso ribhọ nin agbotu ne zẹ urolo kẹkẹ da tẹmhọn Osẹnobulua bhi idunmhun ọkpa. Ọkhẹke nin ele mhanmhan ọlẹn nọnsẹn, nin ele hẹi dọ diabe eria ne bha lẹn ebi ele lu bhi ẹlo ọsi eria nin ele tẹmhọn Osẹnobulua man. Be ele ha rẹ kuobọgbe yẹ ha lu ọne iwẹnna nọnsẹn?
Bha Kugbe Tale (Pr 15:22): Ọkhẹke nin ewanlẹn ne mhọn obọ bhi iwẹnna itẹmhọn Osẹnobulua bhi ene agbotu kẹkẹ kugbe zilo, yẹ mhanmhan ọlen. Ahamiẹn ghe ẹbho ne ze urolo nọnsele bha manman bun, agbotu ọkpa sabọ yọle nin agbotu nọnkẹle hẹi nabhi uwa nin ẹbho ne zẹ urolo nọnsele ye. Bhi obọ nọnkẹle, ahamiẹn ghe ele ikẹ sabọ tẹmhọn Osẹnobulua na bhi ije rebhe nin ẹbho ne zẹ urolo nọnsele ye, ele sabọ taman agbotu nọnkẹle, ‘bha sabọ nabhi uwa nọn ki rẹ khin, ọkpakinọn, bha ha miẹn ọria nọn zẹ urolo nọnsẹmhan, bha ha ji mhan lẹn.’ (od 93 ¶37) Ele sabọ yẹ yọle nin agbotu nọnkẹle rẹkpa ele guanọ ẹbho ne zẹ urolo nọnsele, yẹ gbẹn adirẹsi ọsi ene ẹbho re nin ele. (km 7/12 5, ẹkpẹti) Yere ghe, ẹbho ne zẹ urolo kẹkẹ sabọ ha ribhi uwa ọkpa. Ọ yẹ khẹke nin bha rẹkhan uhi ọsi agbaẹbho nin bha da nyẹnlẹn sade bha mhanmhan ebi bha da rẹ ha wẹnna ọne idunmhun yẹ.
Rẹkhan Adia (Eph 4:16): Ọkhẹke nin ọrebhe re obọ rẹkhan adia ọsi ọwanlẹn nọn mhọn obọ bhi iwẹnna itẹmhọn Osẹnobulua bhi agbotu nọnsele. Ahamiẹn urolo nan zẹ bhi agbotu nọnkẹle ọria nin mhan man ọlẹn iBaibo guẹ nẹ, mhan sabọ guanọ ọria bhi ọne agbotu nin nọn dọ ha man ọlẹn iBaibo. Asabọ miẹn ghe ọne urolo nin ha rẹso ọle bhi ọkhọle nẹ.
Muegbe Nọnsẹn (Pr 15:28; 16:1): Ahamiẹn ọria nọn zẹ urolo ọbhebhe uwẹ ke re bhi uwa beji uwẹ tẹmhọn Osẹnobulua khian, dọnmhegbe nin uwẹ sẹyẹ rẹ tẹmhọn Osẹnobulua man ọlẹn. Lẹn urolo kẹkẹ nin ẹbho zẹ bhi idunmhun nin uwẹ da tẹmhọn Osẹnobulua. Danlod Baibo bi vidio bhi ene urolo fiọ bhi foni nọnsẹ. Uwẹ sabọ yẹ rẹ JW Language app rẹ luẹ ebi a rẹ tuẹ yẹ bhi urolo eso.