Uwẹ Daghe Ikpẹ Esili Nesi Osẹnobulua bhi Emhin Nin Ọle Manlẹn?

Uwẹ ha daghe aroro nọn manman mhọn-ose, ahiẹnhiẹn ne vuọn okhun, la okpẹdẹ, uwẹ ria ẹmhọn ọria nọn man ene emhin nan? Emhin nin Osẹnobulua man dẹ sabọ rẹkpa mhan rẹ lẹn ikpẹ esili nesọle. (Ro 1:20) Mhan ha ria eria nyan emhin nin Osẹnobulua man, mhan ki dọ sabọ daghe ahu nọnsọle, oyẹẹ nọnsọle, ewanlẹn nọnsọle, bi ebi ọle rẹ bhuohiẹn nọn gbale yẹ. Mhan ki sẹyẹ daghe ebi ọle rẹ zẹ emhin bhi obọ yẹ.—Ps 104:24.

Be hi emhin eso nin Osẹnobulua manlen nin uwẹ daghe ukpẹdẹ-ukpẹdẹ? Aharẹmiẹn ghe eje manman tan ẹloa uwẹ da nyẹnlẹn, uwẹ dẹ yẹ sabọ daghe afianmhẹn bi eran bhi enin. Mhan ha gbẹlokotọ nọnsẹn bhi emhin nin Osẹnobulua manlẹn, ọ ki rẹkpa mhan nin ọkhọle nọnsẹmhan rẹ dere. Mhan ida ha kpokpo egbe gbe. Ọ ki yẹ rẹkpa mhan rẹ manman rẹọbhọ ghe Jehova dẹ sabọ rẹkpa mhan bhi ẹkẹ ekpokpo nọn ki rẹ ha khin. (Mt 6:25-32) Ahamiẹn uwẹ mhọn imọn, rẹkpa ele nin ele sabọ luẹ ikpẹ esili nesi Jehova bhi emhin nin ọle manlẹn. Mhan ha re inian ha gbẹlokotọ bhi emhin nin Osẹnobulua manlẹn, ọ ki rẹkpa mhan rẹ manman sikẹ Osẹnobulua nọnsẹn.—Ps 8:3, 4.

GHE ỌNE IVIDIO NATIỌLE EMHIN NAN MANLẸN RE UYI NỌNSI OSẸNOBULUA MAN—ẸFUA BI ALO. BHA HA KI GHE ỌLE FO, WANNIẸN ENE INỌNTA NAN:

• Be rẹ mhan daghe alo?

• Bezẹle nin alo nan daghe bhi egbe emhin eso da fidenọ sade a na bhi ije kẹkẹ ghe ọle?

• Bezẹle nin mhan da daghe alo kẹkẹ bhi okhun?

• Emhin nela uwẹ sẹ daghe bhi eji uwẹ da nyẹnlẹn, ne mhọn alo nọn mhọn-ose?

• Bezẹle nọn da khẹke nin mhan ha gbẹlokotọ bhi emhin nin Osẹnobulua man?