UNYẸNMHIN NỌN KHẸKE ENE RẸKHAN IJESU

Ha Re Ẹwanlẹn Zẹ Emhin Nin Uwẹ Rẹ Re Egbe Re Ahoho

Bezẹle nọn da khẹke nin mhan mhọn ẹwanlẹn sade mhan zẹ emhin nin mhan ha rẹ re egbe re ahoho? Ranmhude, emhin nin mhan ghele, emhin nin mhan kaehọ ọle, bi emhin nin mhan tiele, ele da ha ri mhan bhi ọkhọle. Ene emhin nan dẹ yẹ sabọ rẹso uwedẹ nin mhan rẹ lu emhin. Emhin ne bha yẹẹ iJehova, ele ribhi emhin ne bunbun nin ẹbho rẹ re egbe re ahoho ẹlẹnan. (Ps 11:5; Ga 5:19-21) Ọnan zẹle nin Baibo da taman mhan ghe nin mhan ha zilo nyan emhin ne yẹẹ iJehova.—Php 4:8.

GHE ỌNE IVIDIO NATIỌLE BE IMẸN DA RẸ RE EGBE RE AHOHO? BHA HA KI GHE ỌLE FO, WANNIẸN ENE INỌNTA NAN:

Be igemu nan da gbono egbe a, nin ibhokhan iRome ha ghe bhi ẹghe ẹdẹlẹ rẹ khọ igemu eso nin ẹbho gbe ẹlẹnan yẹ?
Be imhan ha rẹ rẹkpa ene elasẹre rẹ ha zẹ emhin nọn mhẹn nin ele ha rẹ re egbe re ahoho?
Be ẹmhọn nọn ribhi Romans 12:9 ha rẹ rẹkpa mhan yẹ sade mhan ho nin mhan zẹ emhin nin mhan ha rẹ re egbe re ahoho?
Be hi emhin ne mhẹn eso nin uwẹ ha rẹ re egbe re ahoho bhi eji uwẹ da nyẹnlẹn?

ỌNELA ELELE YE NẸ?

Uwedẹ eva ọria ha rẹ sabọ re egbe re ahoho. Ọne ọria sabọ deba ha lu ọne emhin nin ọle rẹ re egbe re ahoho, la ọle gheghe ha ghe ẹbho ne lu ọle. Ọne uwedẹ nọnzeva, ọle a kẹ miẹn ẹlẹnan. Ahamiẹn ghe ọria ghe ifinmu, la ọle tie ebe, emhin nin ọria ọbhebhe lu, ọle ọne ọria rẹ re egbe re ahoho, ọ iyi ebi ọle tobọle lu. Arẹmiẹn ghe ọnan iyi emhin ọbe, ẹbho ne bunbun dọ kere ghe iregbe re ahoho nin ọria da deba lu ọne emhin nin ọle rẹ re egbe re ahoho, ọle elele ye nẹ. Bhi ọsi ijiẹmhin, ọ yẹẹ ẹbho eso rẹ khue emhin illo la drọ emhin. Ọ yẹ yẹẹ ẹbho eso rẹ gbe ibọlu, gua ẹdẹ, la sasa egbe bhi uwedẹ ebhebhe. Uwedẹ nọn ki rẹ khin nin mhan zẹ nin mhan rẹ re egbe re ahoho, ọkhẹke nin mhan lu ọle bhi uwedẹ nọn ha re “ogẹn ji Osẹnobulua.”—1Co 10:31.