Be Imhan Ha Sabọ Miẹn Luẹ bhi Illo Nesẹmhan Natiọle Illo Ikẹ (Original Songs)?

Illo nela yẹẹ uwẹ nẹ bhi illo ikẹ nesẹmhan? Bezẹle? Uwẹ be sẹ gbẹlokotọ daghe ọle ghe emhin ne rẹtẹ iẹnlẹn ukpẹdẹ-ukpẹdẹ nọnsẹmhan, ọle a rẹman bhi ene ividio? Mhan rebhe dẹ sabọ miẹn ọnọn ha yẹẹ mhan kẹkẹ, ranmhude, uhọnmhọn-ọta kẹkẹ, ọle ene illo tẹmhọn ọlẹn. Sẹyẹ, uwedẹ kẹkẹ a rẹ khue emhin ọbhi ene illo. Ọreyiriọ, a bha mhanmhan ene illo nan ne gheghe ha mhẹn mhan bhi ehọ.

Iluẹmhin kpataki ribhi ene illo nan kẹkẹ ne ha sabọ rẹkpa mhan bhi iẹnlẹn nọnsẹmhan bi iwẹnna itẹmhọn Osẹnobulua nin mhan lu. Eso bhi ene illo nan tẹmhọn ebi a rẹ miẹn ẹbho ọbhi egbe yẹ, eso da tẹmhọn okugbe, ikolu, izebhudu, oyẹẹ, bi urẹọbhọ. Eso yẹ ribhọ ne tẹmhọn ebi ẹbho ne sibhi oga re ha rẹ fikie bu iJehova re yẹ, ebi mhan ha rẹ ha rẹhunmhan yẹ, ebi mhan ha rẹ ha ga nọnsẹn yẹ ukpẹdẹ-ukpẹdẹ, bi ebi mhan ha rẹ ha khu ọbhi iwẹnna oga yẹ. Mhan bhọ mhọn illo nọn tẹmhọn uwedẹ nọn khẹke nin mhan rẹ ha noo ifoni. Emhin ebhebhe nela uwẹ miẹn luẹ bhi illo ikẹ nesẹmhan?

GHE ỌNE IVIDIO ỌSI ILLO NATIỌLE Ọ DẸ KẸ LU ỌLE NIN MHAN. BHA HA KI GHE ỌLE FO, WANNIẸN ENE INỌNTA NAN:

• Be hi emhin esili ne ha sunu bhi ẹghe odalo, nin ọne okhuo bi ọdọ ne ki wanre ria ẹmhọn ọlẹn?—Ge 12:3

• Be imhan ha rẹ sabọ ziẹn urẹọbhọ nọnsẹmhan yẹ ghe Jehova dẹ sabọ mun ive nesọle sẹ?

• Be hi emhin nọn da kẹ sunu nọn ha re eghọnghọn nọn khua ji mhan yẹ rẹ mhan kie kugbe deba eria nesẹmhan ne rẹ yu?

• Be ikhuaẹloghe nin mhan mhọn rẹ rẹkpa mhan yẹ rẹ ziẹngbe edọnmhẹn?—Ro 8:25