Guẹ Ebi A Rẹ Lu Iwẹnna Itẹmhọn Osẹnobulua Yẹ—Ebi A Rẹ Tẹmhọn Osẹnobulua Man Ẹbho Ne Ruẹlo Yẹ

EBEZẸLE NỌN DA YI EMHIN NỌN KHẸKE: Ọ iyẹẹ ẹbho ne bunbun ne ruẹlo rẹ ha ne eriọbhe talọ. Ranmhude ọnan, ọkhẹke nin mhan guẹ ebi a rẹ tẹmhọn Osẹnobulua man ele yẹ. Ẹmhọn ẹbho ne ruẹlo manman rẹtẹ iJehova. (Le 19:14) Mhan ha dọnmhegbe nin mhan rẹ rẹkpa ele dọ luẹ ẹmhon iJehova, mhan ki ha re egbe khọkhọ iJehova.

EBI A RẸ LU ỌLE YẸ:

• “Guanọ” ẹbho ne ruẹlo. (Mt 10:11) Ejela uwẹ ha da sabọ miẹn ele? Asabọmiẹn uwẹ lẹn ọria nọn mhọn ọria nọn ruẹlo bhi azagba-uwa nọnsọle. Isiku ọsi ẹbho ne ruẹlo la eji a da gbẹloghe ene ruẹlo sabọ ha ribhi idunmhun nin uwẹ da tẹmhọn Osẹnobulua. Asabọmiẹn ọ dẹ yẹẹ ene ruẹlo ne ribhi enin rẹ tie ebe nesẹmhan nan gbẹn nin ene ruẹlo.

• Rẹman ghe ẹmhọn ele rẹtẹ uwẹ. Ẹbho ne ruẹlo ida ha khẹnegbe, sade uwẹ rẹman ghe ẹmhọn ele rẹtẹ uwẹ. Re uhọnmhọn-ọta nọn yẹẹ ẹbho rẹ munhẹn ha nin ele zilo.

• Rẹkpa ele rẹ lẹn iJehova. Mhan mhọn ebe nin ẹbho ne ruẹlo bi ẹbho ne idaghe nọnsẹn ha sabọ tie, nin uwẹ ha sabọ noo rẹ rẹkpa ele lẹn iJehova. Nọọn ele ọnọn ha yẹẹ ele rẹ tie. Ọkhẹke nin ọwanlẹn nọn mhọn obọ bhi iwẹnna itẹmhọn Osẹnobulua fẹ ọle ghe si obhio mhan nọn mhọn obọ bhi ebe yere rẹ je ebe nin ọria nọn ruẹlo guanọ.