Ebi A Rẹ Noo “Ebi Uwẹ Ha Sabọ Ta” Yẹ

Re na bhi January 2018, inọnta nan rẹ ne ẹbho zilo bhi Baibo, ele a ki ha rẹman bhi obọ natiọle “Ebi Uwẹ Ha Sabọ Ta” bhi ebe ikolo nọnsẹmhan. Be ọkhẹke nin mhan rẹ ha noo ele yẹ?

Sade Uwẹ Lu Arẹman ọsi A Ha Miẹn Ọria Ọsọhẹnhẹn la Afikie Yo: Inọnta, Baibo, bi inọnta nin uwẹ ha wanniẹn sade uwẹ kiẹ vae ne ribhi enin, ele uwẹ ha noo. Ọrẹyiriọ, ọ iyi oko ghe uwẹ dẹ lu arẹman nọnsẹ beji a rẹ wo lu ọle tee bhi ividio ọsi A Ha Miẹn Ọria Ọsọhẹnhẹn la Afikie Yo. Uwẹ sabọ rẹ re uwedẹ ikẹ rẹ lu ọne arẹman. Uwẹ sabọ yẹ re ọkpa bhi Emhin Kpataki Nin Mhan Rẹ Lu Iwẹnna Itẹmhọn Osẹnobulua man ọria nin uwẹ tẹmhọn Osẹnobulua man, aharẹmiẹn a bha ta iriọ bhi adia nan gbẹn ọbhi ebe ikolo.

Sade Uwẹ Ribhi Inẹbho: Uhọnmhọn-ọta kẹkẹ nin mhan ha rẹ sabọ ne ẹbho zilo, ele ribhi obọ natiọle “Ebi Uwẹ Ha Sabọ Ta.” Ahamiẹn ghe ọria ka mhan ehọ, mhan sabọ rẹ re ẹmhọn nan gbẹn ọbhi otọ Afikie Yo rẹ ne ọle zilo. Mhan sabọ fi emhin eso denọ bhi ẹkẹ ọle, la mhan tobọmhan zẹ uhọnmhọn-ọta ọbhebhe nin mhan guanọ nin mhan rẹ ne ọne ọria zilo. Ahamiẹn ghe inọnta bi Baibo nan ka rẹman bhi ebe ikolo ọsi uki ne gbera, ọle ha ti ẹbho bhọ, uwẹ sabọ rẹ noo ọle. Sẹyẹ, ahamiẹn ghe emhin nọn la sunu bhi eji bha da nyẹnlẹn, ọle ribhi ọkhọle ọsi ẹbho, uwẹ sabọ rẹ re ọne emhin ne ele zilo. Uwedẹ nọn ki rẹ khin nin uwẹ rẹ noo ene inọnta bi Baibo ne ribhi obọ natiọle “Ebi Uwẹ Ha Sabọ Ta,” lu emhin rebhe bhi uwedẹ nin uwẹ ha da sabọ tẹmhọn Osẹnobulua man ẹbho rebhe.​—1Co 9:​22, 23.