Noo Ẹghe bi Ahu Nọnsẹ Rẹ Ga IJehova

Beji Isaiah nin akhasẹ tale, ẹbho ne ribhi agbotu nọnsi Jehova wo bun ọbhọ ukpẹdẹ-ukpẹdẹ. (Isa 54:2) Ranmhude ọnan, ọ da khẹke nin mhan ha bọn iKindọn Họọ, Asẹnbli Họọ bi Bẹtẹ ọsọgbọn. Mhan ha rẹ bọn ene uwa oga nan fo, ọ sẹyẹ khẹke nin mhan ha hẹnhẹn ele, yẹ gbẹloghe ele. Ọne ẹsọn nan da wo re isẹhoa nin mhan rẹ ha noo ẹghe nọnsẹmhan bi ahu nọnsẹmhan bhi iwẹnna nọnsi Jehova. Be imhan ha rẹ lu ọnan yẹ?

• Ọ ha sẹ ẹghe nin usun nin mhan deba yo iwẹnna itẹmhọn Osẹnobulua ha rẹ gbọnọ iKindọn Họọ, ọ khẹke nin mhan deba ele

• Mhan sabọ rẹ zegbere nan rẹ man mhan ebi a rẹ gbẹloghe iKindọn nesẹmhan yẹ

• Mhan sabọ gbẹn vuọn ebe natiọle Local Design/Construction Volunteer Application (DC-50). Bhiriọ, mhan ki sabọ deba uwa oga nan bọn bhi egbegbe eji mhan da nyẹnlẹn

• Mhan sabọ yẹ rẹ gbẹn vuọn ebe natiọle Application for Volunteer Program (A-19), nin mhan da sabọ dọ rẹkpa bhi Bẹtẹ bhi ẹghe nọn sẹbhi uzana ọkpa, la nọn gbera

GHE ỌNE IVIDIO NATIỌLE UWA-OGA ỌSỌGBỌN NIN AGBOTU GUANỌ NIN ELE BỌN​—UKPỌKHERE. BHA HA KI GHE ỌLE FO, WANNIẸN ENE INỌNTA NAN:

• Rẹ na bhi ukpe 2014 rẹ ha vade, be agbotu ki rẹ ha noo ividio gbera ọnikhẹ yẹ?

• Nan rẹ sabọ ha lu ene ividio nan rebhe, uwa nela agbotu ho nin ele bọn? Eka ikpe ele da rẹ bọn ọlẹn fo?

• Be imhan ha rẹ sabọ rẹkpa bhi ọne iwẹnna nan yẹ?

• Ahamiẹn mhan guanọ nin mhan dọ deba bọn ọne uwa nan ho nan bọn bhi Ramapo, bezẹle nọn da khẹke nin mhan gbẹn vuọn ọne ebe natiọle DC-50, yẹ ha rẹkpa bhi uwa oga nan bọn bhi egbegbe eji mhan da nyẹnlẹn?

• Be rẹman mhan ghe obọ nọnsi Jehova ribhi ọne emhanmhan nan?

• Uwedẹ ebhebhe nela mhan ha rẹ sabọ rẹkpa, aharẹmiẹn mhan bha sabọ vae dọ deba bọn ọne uwa oga nan?