UNYẸNMHIN NỌN KHẸKE ENE RẸKHAN IJESU
Ene Elasẹre—Ji Jehova Ha Yi Ọmọẹ Nọn Sikẹ Bha Nẹ
Ikpẹ nela uwẹ guanọ nin imọẹ nesẹ ha mhọnlẹn? Asabọmiẹn uwẹ guanọ nin ele ha mhọn asun-rẹkhan, ifuẹkẹ, bi ọkhọle nan rẹ zẹ emhin bhi obọ. Jehova mhọn ene ikpẹ nan rebhe. (Ex 34:6; Ac 14:17) Ọle ka uwẹ ehọ sade uwẹ nan erọnmhọn je ọle. Ọle rẹkpa uwẹ ẹghe nọn irẹ khin nin uwẹ rẹ guanọ urẹkpa. (Ps 18:19, 35) Ọle yẹ rẹhunmhan uwẹ sade uwẹ lu emhin ebe. (1Jo 1:9) Ọmọẹ ọbhebhe iribhọ nọn mhẹn gbera iJehova!
Be uwẹ ha lu nin uwẹ rẹ kiẹn ọmọẹ nọnsi Jehova? Manman ha tie iBaibo nin uwẹ da sabọ lẹn iJehova nọnsẹn. Ha taan ọkhọle a man ọlẹn. (Ps 62:8; 142:2) Yẹ rẹman ọlẹn ghe, emhin ne yẹẹ ọle yẹ yẹẹ uwẹ. Emhin bọsi, Agbejele nọnsọle, Ọmọn nọnsọle, bi ive nin ọle ve rẹji ẹghe odalo. Yẹ ha tẹmhọn ọlẹn man ẹbho. (De 32:3) Uwẹ ha ziẹn ikolu nin uwẹ bi Jehova ko mhọnlẹn, ọle ki ha yi ọmọẹ nọnsẹ rẹ sẹbhi ighegheghe.—Ps 73:25, 26, 28.
GHE ỌNE IVIDIO NATIỌLE ENE ELASẸRE—BHA DỌNMHẸN IJEHOVA FẸGHE, NIN BHA DAGHE ỌLE MHẸNMHIN. BHA HA KI GHE ỌLE FO, WANNIẸN ENE INỌNTA NAN:
Be uwẹ ha lu nin uwẹ da sabọ re egbe nọnsẹ guẹ nin Jehova yẹ mianmẹn?
Be ibhio mhan ne ribhi agbotu ha rẹ sabọ rẹkpa uwẹ rẹ ga iJehova yẹ?
Be iwẹnna itẹmhọn Osẹnobulua ha rẹ rẹkpa uwẹ rẹ ziẹn ikolu nin uwẹ bi Jehova ko mhọnlẹn yẹ?
Uwẹ bi Jehova dẹ sabọ ha yi imọẹ rẹ sẹbhi ighegheghe!
Iwẹnna nela uwẹ ha sabọ lu bhi agbotu nọnsi Jehova?
Be re ẹmhọn iJehova ti uwẹ bhọ?