UNYẸNMHIN NỌN KHẸKE ENE RẸKHAN IJESU
Mhan Dẹ Rẹman Ghe Mhan Mhọn Oyẹẹ Sade Mhan Re Obọ Ọbhi Adia Nin Jehova Re Nin Ọria
Ugbega nọn rẹji agbotu ahamiẹn a khu ọria nọn bha ka fidenọ sibhi agbotu re. A yẹ re ọle dia ọne ọria nọn bha ka fidenọ. (1Co 5:6, 11) Ahamiẹn ghe mhan re obọ ọbhi ọne adia nan nin Jehova re nin ọne ọria, ọ ki rẹman ghe mhan mhọn oyẹẹ. Be ọnan rẹ yi uwedẹ nin ọria rẹ re oyẹẹ man yẹ beji a miẹn ghe a ha khu ọria sibhi agbotu re, ọ ba ene lẹn ọlẹn bhi egbe, manman nọn ene ribhi azagba-uwa nọnsọle bi ene ewanlẹn ne talọ ọbhi ọne ẹmhọn?
Ọnọn ke okhun nẹ nọn ribhọ hi, mhan re ọle rẹman iJehova ghe mhan hoẹmhọn ọlẹn bi uhi nin ọle re ọbhi otọ rẹji ebi mhan ha rẹ ha yi eria ne khiale. (1Pe 1:14-16) Mhan yẹ re ọle man ọne ọria nan khu sibhi agbotu re ghe mhan hoẹmhọn ọlẹn. Aharẹmiẹn adia nan re nin ọria manman ba bhi egbe, “ọ rẹkpa ene miẹn ọlẹn ọbhi egbe rẹ ha mhọn ikpẹ ọsi ikhiakhiale nọn re ọfure re.” (Heb 12:5, 6, 11) Ahamiẹn ghe ọria nan khu sibhi agbotu re la ọria nọn tobọle sibhi agbotu re, mhan nanlẹn muobọ, ọ ki diabe ghe mhan bha mun ekpẹn nin adia nin Jehova re nin ọne ọria. Yere ghe, adia nọn khẹke Jehova re nin ẹbho nesọle. (Jer 30:11) Mhan mhọn ọne iruduba ghe, ọne ọria nan khu sibhi agbotu re dẹ sẹyẹ fikie dọ ha ga iJehova nọn mhọn itohan. Rẹ sẹbhi ọne ẹghe nin, ọkhẹke nin mhan ha re obọ ọbhi emhanmhan nin Jehova re ọbhi otọ rẹ ha re adia nin ẹbho nesọle. Mhan ki yẹ ha ziẹn ikolu nin mhan bi Jehova ko mhọnlẹn.—Isa 1:16-18; 55:7.
GHE ỌNE IVIDIO NATIỌLE RE ỌKHỌLE REBHE RẸ HA SUN RẸKHAN IJEHOVA. BHA HA KI GHE ỌNE IVIDIO FO, RE EWANNIẸN ỌBHI ENE INỌNTA NAN:
Ọbalọ nela ọ si ji ene biẹ ọmọn, ahamiẹn ọmọn nọnsele zẹ iJehova obọ?
Be agbotu ha rẹ sabọ rẹkpa eria nekẹle ne sẹyẹ ga iJehova ne ribhi azagba-uwa ọsi ọne ọria nan khu sibhi oga re?
Okha nela bhi Baibo gbotọle fanọn an man mhan ebezẹle nọn da khẹke nin mhan ha mhọn asun-rẹkhan da iJehova gbera azagba-uwa nọnsẹmhan?
Be imhan ha rẹ rẹman yẹ ghe Jehova mhan sun rẹkhan gbera azagba-uwa nọnsẹmhan?