UNYẸNMHIN NỌN KHẸKE ENE RẸKHAN IJESU
Hela Uwẹ Deba Lu Imọẹ bhi Ẹkẹ Intanẹt?
Ọmọẹ hi ọria nin uwẹ sikẹ ranmhude ẹmhọn ọle yẹẹ uwẹ. Bhi ọsi ijiẹmhin, ẹghe nin David rẹ gbe iGoliath a fo, ọle bi Jonathan da wo kiẹn imọẹ ne manman sikẹ egbe. (1Sa 18:1) Ele veva da ha mhọn ikpẹ esili ne re ele hoẹmhọn egbe. Ọnan rẹman ghe, ẹbho ko lẹn egbe fo ele kuẹ kiẹn imọẹ. Nin uwẹ rẹ sabọ lẹn ọria, ọ dẹ sabọ gbe uwẹ ẹghe bi ahu. Ọkpakinọn, bhi ẹkẹ intanẹt, ọ wo lẹkhẹ nin ẹbho rẹ kiẹn imọẹ. Ẹbho wo sabọ mhanmhan ebi ele ha ta bi ebi ẹbho ha sabọ lẹn ele sẹ yẹ bhi ẹkẹ intanẹt. Bhiriọ, ọ ida lẹkhẹ nin ẹbho rẹ lẹn unan ọria nin ele gene khin. Ranmhude ọnan, ọkhẹke nin uwẹ ka riale fo nọnsẹn, uwẹ kuẹ zẹ ọmọẹ bhi ẹkẹ intanẹt. Ọria nin uwẹ bha manman lẹn ha yọle nin ibha ko ha yi imọẹ bhi ẹkẹ intanẹt, hẹi ji ofẹn mun uwẹ rẹ yọle eye, aharẹmiẹn ọ dẹ ba ọle bhi egbe. Ranmhude okhẹnan nọn ribhi intanẹt, ẹbho eso iyẹ noo intanẹt nan rẹ ko lu ikolu hiehie. Sokpan, be uwẹ ha mun ọbhi ọkhọle sade uwẹ zẹ rẹ ha noo intanẹt nan rẹ deba ẹbho lu ikolu?
GHE ỌNE IVIDIO NATIỌLE, MHỌN ẸWANLẸN BHI EMHỌN IKOLU NAN LU BHI INTANẸT. BHA HA KI GHE ỌLE FO, WANNIẸN ENE INỌNTA NAN:
Emhin nela uwẹ ha ka ria ẹmhọn ọlẹn ọkuẹsẹ uwẹ ne ifoto la gbẹn ebe ọbhi ẹkẹ intanẹt?
Bezẹle nọn da khẹke nin uwẹ ha noo ẹwanlẹn sade uwẹ zẹ imọẹ bhi ẹkẹ intanẹt?
Bezẹle nọn da khẹke nin uwẹ ha mhanmhan eka ẹghe nin uwẹ gbe bhi ẹkẹ intanẹt?—Eph 5:15, 16