Re Ẹdagbọn Iẹnlẹn Nọnsẹ Rebhe Sun Rẹkhan Ọdọ La Amhẹn Uwẹ

Ibọdọ bi ireokhuo nin oyẹẹ ye re ogẹn ji Jehova. Ọ yẹ re ọne ọdọ bi amhẹn ghọnghọn. (Mr 10:9) Ahamiẹn Kristiẹn guanọ nin ele ha ribhi ibọdọ bi ireokhuo nin eghọnghọn ye, ọkhẹke nin ele re obọ rẹkhan adia bhi Baibo sade ele khian zẹ ọne ele ha bọ la ọne ele ha re.

Ọkuẹsẹ uwẹ munhẹn ha zọshọ, gbera “ẹghe nin egbe rẹ mun usẹn” fo. Ranmhude bhi ọne ẹghe nin, ọ dẹ sabọ nọghọ uwẹ rẹ lẹn ọria esili nin uwẹ ha zẹ bhi ọshọ. (1Co 7:36) Re ẹghe nin uwẹ bha sẹ rẹ bọ ọdọ la re okhuo rẹ ziẹn ikolu nin uwẹ bi Jehova ko mhọnlẹn yẹ ha mhọn ikpẹ esili. Bhiriọ, uwẹ ki sabọ ha yi ọria nọn ha sabọ re ọdọ uwẹ la okhuo uwẹ ha ghọnghọn.

Ọkuẹsẹ uwẹ zẹ rẹ bọ ọne ọria, re ẹghe ọbhi otọ rẹ lẹn unan ọria nin ọle gene khin. (1Pe 3:4) Ahamiẹn uwẹ mhọn edandan si ọne ibọdọ bi ireokhuo dẹ kiọnlẹn nin bha, ne ọne ọria zilo ọle. Ọkhẹke nin uwẹ ka ha mun ẹmhọn ọdọ uwẹ la okhuo uwẹ kalo gbera ọsi egbe uwẹ. (Php 2:3, 4) Ahamiẹn bha sabọ ha re obọ rẹkhan adia ne ribhi Baibo nian, ọ ki lẹkhẹ nin bha yẹ rẹ ha lu iriọ sade bha bọ egbe fo, bhiriọ, bha ki ha ghọnghọn.

GHE ỌNE IVIDIO NATIỌLE MUEGBE IBỌDỌ BI IREOKHUO—OBỌ 3: “LOLO EKA NỌN HA GBE.” BHA HA KI GHE ỌLE FO, WANNIẸN ENE INỌNTA NAN:

• Be emhin dia yẹ ẹghe nin ọne obhio mhan bi Shane rẹ ha zẹ egbe ọshọ?

• Be ọle ki daghe bhi egbe ọne okpea?

• Be ene biẹ ọle rẹ rẹkpa ọle yẹ? Emhin ẹwanlẹn nela ọle ki zẹ rẹ lu?